المساعد الشخصي الرقمي

مشاهدة النسخة كاملة : يا خــــــــــوي

تهــزمني النجـــلاء
04-10-2007, 02:49 AM
يا خـوي دمع العين من ناظري فـــاح ................. عقب البطا يا شين دمـع الملاقا

وقلبـي اللي تلتله بالهــوى صــــــاح ................. من دون مــاويه غــــدابه اسـراقا

راعـــــي جبينا بالدجــــى له توضاح ................. العمـر من دونـه حشا ما يطاقـــا

حبـــه محدحدني على جـــال لولاح ................. ياخــوي حبه في عروقي تساقـا

يا خوي من دونـه فلا اظني ارتـــــاح ................. مالــي بحبـه يالغـــالين امـلاقـــا

مالي جدا يا خـــوي غير التوحـــواح ................. ويلعنك يا حظ (ن) رقد ماستفاقا

ياما على شانه غدا المشـي دلباح ................. وياكثر من شــانه دمــــوع الفراقا

اقفـــت على ذكـــراه يا خوي الارياح ................. ماظنــي عقبــه يجــي ونتــلاقــا

مدري شمال او غـرب ياخوي هو راح ................. اتلــى العهـــد له هرجتلـــه دقاقا

تقطعت عقبه زغـــــــاريد الافــــــراح ................. وتقطعـــت عقبه هذيك الرفـــاقــا

شف ما بقا غير اشلح الثوب بصياح ................. وضرب تخاتيـــخ الخــلاء والرقــــاقا

يا خــوي علمنــي بلا ضحــك ومزاح ................. المـــوت من حبه لفقني الفـــاقا


اتمنى تحوز على رضاكم
السمو
04-10-2007, 04:36 AM
قطيوة نجد

ممكن ارد عليكي بقصيده

يـا يـمـه جـيـت ابـسـأل لـيـه انـا حـظـي مـجـافـيـنــي
اشـوف الـنـاس مـلـتـمـه وانــا مــا بـيــن حـسـراتــي
اشـوف أفراح مــن حـولــي اسـلــم مــا تـحـيـيـنــي
انـاديـهــا وانــا خـجــلان الـــزم فـــي تـحـيــاتــي
احـاكـيـهـا يـافـرحـه ويـن؟ حـلـفــت انــك تـزوريـنــي
اشــد بـحـكــي ثــم ارخــي اداعـبـهــا بـهـمـسـاتــي
ولا بــه فـايــده يـمــه بـرغـبـتــهــا تـمـشـيــنــي
تـواعـد ثـم تـخـلـفـنــي او انـهــا تـنـســى اوقـاتــي؟
انـا اذكْـردعـوتـك لـلــه ... طـلـبــك انــه يـخـلـيـنــي
طـلـبـك انــه بـيـرزقـنــي و يـوفـقـنــي في بـدايـاتــي
تـعـلـمــت الـدعــاء مـنــك وصــارت عــادةٍ فـيـنــي
اذا نـامــت عـيــون الـخـلــق اوجــه لربي دعـواتــي
رجـيـت بـصـوت كـلـه خــوف مـتـأمــل بـيـعـطـيـنــي
لاجــل مــا افـرّحــك يـمــه رجـيــت وزدت رجــواتــي
هـقـيـت ان دنـيـتـي تـصــدق بـدعـواتــي وتـوفـيـنــي
صـبــرت بـحــروة امـالــي وحــروة كــل هـقــواتــي
وجــت لـلـخـلــق ذا كـلــه ولـكــن ازرت تـجـيــنــي
وقـلــت اكـيــد هــي خـيــره حـمــدت الله لـحــالاتــي
كــتــمــت الاه لا تــطــلــع ولا ودي تـشـوفــيــنــي
مـا ودي يـتـعـبـك نـوحــي ولا تـشـقـيــك شـهـقـاتــي
تـجـرعــت الالــم يـمــه شـربـتــه من صغري بــأول سـنـيـنــي
وجـيـتـك مـا بـغـيـت انــك تـحـســي مــر لـوعـاتــي
اضّـحـك هــم دمـعـاتــي واطـمــن خــوف يـحـويـنــي
واجـر بـصـوتـي الـعـالـي لاجـل عـيـنـيـك ضـحـكـاتــي
واذا صـديــت عــن وجـهــك اسـلــم امــري لـعـيـنــي
تـجـيـنــي مـثــل جــلادٍ يــروق ان شــاف دمـعـاتــي
اجـمـلــهــا بــذكــر الله واقـــول الله بـيـجــزيــنــي
اهـدّي نـفـسـي اطـلـبـهــا تـجـمـلـهــا بـبـسـمـاتــي
ولـكـن لــو نـجــي لـلـجــد تــرى كـذبــي مـأذيـنــي
مـا عـاد اسـتـحـمـل الـعـيـشـه بـتـزيـفـي لـفـرحـاتــي

أسجل اعجابي وبأنتظـار جديدك

لكى مني أطيب وأرق التحايا

وتقبلى مروري المتواضع

امشي وانا رافع الراس و مــا اوطيــه مهما
حصل ما هو لاني صاحب السمو ولا هو تكبرلنه
انـــا أبن الكرامه والمعزه والأصل
انـــا بكل فخر وبكل غرور سعودي
الجود جودي وانا أبن الاجاويد مدينتي(طيبه )وانا ولدها
تهــزمني النجـــلاء
04-10-2007, 05:21 AM
يسلمو بؤك ... السمو .....

وشكرا على مرورك المتميز والجميل ....
فيصل المعنى
04-10-2007, 03:06 PM
قطيوة نجد

اشكرك على مفرداتك التي قلما توجد الان في الشعر

ولكن الشعر كل يفقك مع جزء


يعني ودي افهم البيت الاول وهو



يا خـوي دمع العين من ناظري فـــاح ................. عقب البطا يا شين دمـع الملاقا





هل يتفق مع البيت الثامن


اقفـــت على ذكـــراه يا خوي الارياح ................. ماظنــي عقبــه يجــي ونتــلاقــا



الصراحه انا قريت الابيات البارح قبل الفجر بساعه وطرالي المجاراه ولكني حين تمعنت الغيت الفكره


قطيوة نجد

لك حضور جميل وشاعريه اجمل


وتقبلي تحيات فيصل المعنى
يغار الحلا
04-10-2007, 06:19 PM
يسلمووو اختي قيطوه نجد

صح لسانك

تقبلي مرووري:01001:

اختك يغـــــــااار الــحــلااا ^_^
تهــزمني النجـــلاء
04-10-2007, 06:59 PM
هلا وغلا ... فيصل المعنى

يا خوي دمع العين من ناظري فاح ..... عقب البطا يا شين دمع الملاقا

القصيده لها خصوصيه وعلى قولتهم المعنى في بطن الشاعر ..

بس باشرح لك شرح بسيط لكي توصل الفكره لك في هذا البيت .لما تسمع خبر انسان

عزيز وغالي على قلبك من زمان ماشفته وكان غايب عنك وتنتظر رجعته بفارغ الصبر

وياتيك خبر وفانه قبل قدومه ..ومن هنا جا البيت لثامن اللي يقول

اقفت على ذكراه ياخوي الارياح ....ماظني عقبه يجي وانتلاقا

اشكر مرورك اخوي فيصل المعنى يعطيك العافيه ..
تهــزمني النجـــلاء
04-10-2007, 07:02 PM
هلا وغلا ... يغار الحلا ...

شكرا على مرورك الجميل ...
صلعه وحاطه جل
04-10-2007, 09:23 PM
قطيوتي ادعي له بالرحمه والانسان سمي انسان من نعمه النسيان
وكلنا لها
تهــزمني النجـــلاء
04-10-2007, 09:57 PM
هلا وغلا ... صلعه وحاطه جل ...

الله يرحم الجميع .. وشكرا على مرورك يعطيك العافيه ...
أعشق حياتي
05-10-2007, 12:36 AM
http://www.falntyna.com/img/data/media/48/candydoll2_2.gif ('http://www.fa6a.com/img')

ابدي اعجابي بـ قافية الشعر الغريبه ..

والكلام الرائع ..

شعر مره حلو ..

مشكوووره ..
تهــزمني النجـــلاء
05-10-2007, 06:38 AM
هلا وغلا ... اعشق حياتي ...

يعطيك العافيه على هالمرور الجميل ...
سكر زياده
05-10-2007, 07:12 AM
قطيوة نجد


الله يعطيك العافيه حبيبتي ....ومااقول لادايم الا وجهه الله

كلمات ولا اروع ,,,,تحوي من الحزن الشي الكثير ........


ونحن بانتظار..اشعارك الرائعه ...




والله لايحرمنااااااااااااااجديدك
تهــزمني النجـــلاء
05-10-2007, 07:19 AM
هلا وغلا ... بسكر زياده ...

يعطيك العافيه حبيبتي على مرورك الجميل ...
بندر بن محمد
10-10-2007, 07:41 AM
صح لسانك مليون ولا يكفون

سلمت انا ملك الذهبيه عل ماخطت من ابداع

ابيات ذهبنا معها بعيدا عن اجواء الفرح

لنجدد الاهات من بعيد

هنا

انتظار مسافر عند بوابات المطار او عند سكه القطار

ولا نعلم متى قدومه

ولكنه

لم يأت ولم نراه

هنا


اشياء واشياء لاتنتهي

هنا ماء من اراد ان يشرب ليرويه

دام قلمك المبدع اخيه

دمتي بود

بندر بن محمد
تهــزمني النجـــلاء
10-10-2007, 11:29 PM
هلا وغلا ... بنـــــــــــدر

صح بدنك اخوي .....

يعطيك العافيه على هذا المرور الجمــــيل ...
العـطــشان
13-10-2007, 01:28 AM
قطيوة نجد


صـــــــــح لــــــســـــــانـــــــــــــك


تقبلي مروري دمتي سالممممممممممممممه



العطشان :01001:
تهــزمني النجـــلاء
13-10-2007, 05:52 AM
هلا وغلا ... العطشان

صح بدنك وشكرا على المرور الحلو ..
sada اليوفي
15-10-2007, 08:46 AM
حبـــه محدحدني على جـــال لولاح ................. ياخــوي حبه في عروقي تساقـا

يا خوي من دونـه فلا اظني ارتـــــاح ................. مالــي بحبـه يالغـــالين امـلاقـــا





مافيه كلام ينقال في كلام نجد
وزن وقصيد تعدى كل من صد
نجد انتي قصيده اقولها بجد
لك على عرش الكلام حد وحد

لكي أجمل تحياتي وانا متأكد باقي هناك بقيه للإبداع والله يوفقك بصراحه عجبتني جدا الكلمات الي إخترتيها والله روعه

تحياتي وحبي
تهــزمني النجـــلاء
16-10-2007, 12:47 AM
هلا وغلا ... sade اليوفي ...

يعطيك العافيه اخوووى وتسلم على هذي الكلمات والذوق اللي بدرت منك ...

شكرا على مرورك الحلو ....
برنسس
17-10-2007, 11:43 AM
يسلمووووووووووووو قطوتنا لك مني كل احترام وتقدير على الكلمات الحلوه هذي
تهــزمني النجـــلاء
17-10-2007, 09:23 PM
هلا وغلا ...... برنسس....

يسلمو حبيبتي عى هالمرور الحلو ....