وادي الجن

[الجنــــرال]

ياراسم الصـوره علـى هيئـة أنسـان
مالـك صـلاح ولاهـدف مـن وراهـا
لاموصـلاً فكـرة ولا عـلـم ملـيـان
مخطـي ولا لـك واحـده مـن حداهـا
يمكـن تحصّـل قولـة : فـلان فنّـان
يرهـي علـى الريشـه وكفّـه ولاهـا
مـع احترامـي لـك مافيـك نقـصـان
ميـر الحقـايـق لاتـزيّـف عـلاهـا
فتّح سموعـك واقضـب العلـم يافـلان
واخـذ العلـوم وعلّـم اللـي بغـاهـا
البارحـه تجريبـة سنـيـن وازمــان
خلاصـة دروسًــا طـويـلاً مـداهـا
ترهق بنـات الفكـر مـن كاينـاً كـان
ولا لسانـاً عنـوتـه مــن عنـاهـا
حرّكت ساكـن واحْتـرك وادي الجـان
حـرّك سكـون الجـن وأبلـش معاهـا
في وقت موحش والزمن مالـه اخـوان
وارضاً خلا .. وابيـض عـذر ياخلاهـا
غدرى . وبرد . وعوشز عروق واغصان
وأمقومـات الجـن تـفـرح لأذاهــا
في جمعها تبدي لـك اشكـال والـوان
وان سنحـة الفرصـه تمـارس دهاهـا
بلدان تحت الارض وشعـوب واوطـان
وان طلّعوهـا .. ثقـب الابـره خذاهـا
حمر القرون ومحجراً شطـب الاعيـان
واقـدام تقصـر عـن سواعـد يداهـا
ممكن تشاهد فرسـن الشـاه بحصـان!
وممكـن شيـاه مـن الحوافـر حذاهـا
ولو ماتشاهـد جـرّة الخيـل والضـان
تعـرف مداويـر المجـنّـن خطـاهـا
متخولـقـه سبحـانـك الله سبـحـان
وشـق الجيـوب انكافهـا ومغـزاهـا
ماهم جيوش : الّا ميليشيـات واركـان
اصغـر كتيبـه كثـر الارض ودبـاهـا
يبـدأ الظـلام بمقـدم الجيـش بعمـان
وادنى الجيوش بربـع ساعـه غشاهـا
لا مـن عتـاد ولا مدافـيـع هــاوان
واقوى قـوى العالـم ماتـردع قواهـا
بصدور شفّافـه . وعـزّل . وشهبـان
لـو تشبـك يدينـك وراهــا تـراهـا
اعوان زمره جات مـن زمـرة اعـوان
مانـي ملاغيهـا ولا اعـرف لغـاهـا
ماسمعو {ابـن عبيد}وعلـوم {بـرزان}
{وابـن شـرار }وكـل حكمـه رواهـا
ولا قالو الاحسـان يجـزى بالاحسـان
تقطـع وتاكـل مـن لحمهـا عشاهـا
وتعانـق الحـذّاف مـن عـقـب الاذان
مـن طبعهـا تـزوي زوا مـن زواهـا
وان صارت الارواح .. فالواحـد اثنـان
اصل السبـب بيـن اليديـن وحصاهـا
ولاّ حـرارة سيـل مـن فـم بـركـان
يفجـر عيـون مـن الحمـمْ ويغذاهـا
تبنـي علـى النيـران وتزيـد نيـران
وتجمـع غذاويهـا . ويصفـي صفاهـا
غذو العرب للغـرب .. لنهايـة ايـران
تغسـل دمـي المسلمـيـن بدمـاهـا
للمسكنـه ثوبـاً علـى جلـد شيطـان
واليـا عكسنـاهـا تـثـور بخبـاهـا
وان مالت الكفّـه علـى كـف ميـزان
غـزو الفكـر زاد العـروبـه غبـاهـا
علـى بـراد النهـر تاريـخ {لبـنـان}
يفـرض علـى سـود العمايـم حماهـا
حامـي تواليهـا سـلايـل كحـيـلان
واربع {ريِشْهـا} ناشبـه فـي لحاهـا
من خلقتك تاكل علـى خمـس لحيـان
ماحاشـك مـن المستديمـات عـاهـا
لاعب ملـوك انجلتـرا {فـأم درمـان}
وشف لعبت {الشطرنج} ويش امعناهـا
اول دخـول القصـر مفتـاح بيـبـان
قطعـة حديـده للبـيـوت وحجـاهـا
ماتوصـل الفكـره بكيبـل وشـريـان
لا صار مـا فالـروس سرعـة بداهـا
وان كان مخّـك طافحـاً فـول سـودان
الارنـبـه تـاكـل عـشـاك بذكـاهـا
ودغدغ مشاعرنا عن {القـدس} لاهـان
ليـن الاذانــي ينطـفـي مشتهـاهـا
خطط علـى التحريـر {بعكّـرْ ضبـان}
وكيـف {الثروب}تسيـح للـي قـلاهـا
ولو {المكون}تبيـض فهضـاب جـولان
كم يـوم تحـت الارض يبقـى نماهـا
هي عشرة ايام وشهر مـن {حزيـران}
ولّا اربعيـن مـن السنيـن وشقـاهـا
طبعاً مع {البرغوثي} الشيـخ {مـروان}
شغل ونفـاذ ... وبيضـةً فـي ثراهـا
{نقطة لقا}+{بيضة صعو}+{هدنة هدان}
ولا حبـوبًـا مـالـهـا الاّ رحـاهــا
يارايـة {الرومان}عـزوك {رومــان}
كـلاً جلـب روحـه ودونـك ثنـاهـا
وانتي شعارك {ديـك رومـي وساقـان}
{خرقه لها فـي قلـوب اهلهـا غلاهـا}
دون الكيان وكسـره يمـوت شجعـان
حب الوطـن سحـر القلـوب وصباهـا
يذبـح ويسدالـه مـن أعلامـه اكفـان
وصوره على شكـل الصليـب اقتناهـا
وانا على شكل الصليـب أدفـع اثمـان
وعينـي تبـى شوفـه وغايـة مناهـا
ماهو علـى شـان الكنيسـه والأديـان
لاشـك فيـه أمـور نفـسـي تبـاهـا
{أثر الصليـب يصيـر عرقـاة بـدوان}
وسـم وكـوايـا للجـمـال ودواهــا
أمـا علـى الوركـيـن ولا بالامـتـان
ولا الجـلامـد والطـيـور وبـلاهــا
يبحر بـي الهاجـس لحـد التحنحـان
وارجع علـى مجـد العروبـه واباهـا
وان صارت الأمه علـى قلـب ولسـان
ماغيـر ثـوب النصـر ثوبـا زهاهـا
وان كانها هرجـة بـدو مثـل ماكـان
تلقـى مـن الحكـم الشيوعـي غثاهـا
ولا مـن {الاتـراك} تعريـج {علمـان}
بـأوراق بيـض وختمهـا فـي قفاهـا
فيهـا مـن الشفـرات لاتيـن واسبـان
تفكيكهـا يصعـب علـى مـن قراهـا
{وانا رجعت بذاكـرة خمـس شيبـان}
بغيـت أعـدّي عـام {عليـا واخاهـا}
هذي رسالـة {تـرك والتـرك} قشـران
{والقايد ابـو حنيـك} وصّـى علاهـا
فيها مـن التحريـض عشريـن ديـوان
ليـن العـرب قامـت تضـد اقصراهـا
يعني مثل ماقال {ابـوي ابـو سلطـان}
{من ضلعهـا يابـوك تقطـع عصاهـا}
وانا على وضع العـرب حيـل ندمـان
تخنقنـي العـبـره عـلـى مبتـداهـا
دون السياسه حـول {ياضلـع ورقـان}
ليـن اعتقـد منـك وورى منتهـاهـا
رجعه مـع النفـس العزيـزه بالايمـان
وفـي نعمـة النسيـان قلـب يتبـاهـا
مـع انهـا تلهينـي احيـان واحيـان
ثـم تحـلا لــي قـلـل الله حـلاهـا
يرمينـي الـوادي علـى سبـع وديـان
عسـا مسـاه الشيـن يفـدى مساهـا
وحرثة رماد .. ودفنت اطـراف عيـدان
مـن رملهـا ماعـاد يضـوي سناهـا
حتى هبـوب الريـح ماتقضـي الشـان
لاماتـت الجمـره ماينـفـع هـواهـا
من حب موت الـزرع يبقيـه ضميـان
ومن حب موت النـار يطفـي ضماهـا