@ مجــــــــــــهول الأمـــــــــــــاكن@ <<- مسابقه

[عنوود]

:aaa0asmil
:w9:


ياسلام الله على كل المدينه"="النفوس اللي بها بعض المساكن
القلوب اللي توادعنا تجينا"="لان حب المنتدى باالروح ساكن
بإختصار أن المشاعر مستبينه"="شينا مانجهله ياقوم لكن
من يفكر ويتفضل* ويعطينا*"="من هو مجهول الأماكن


صبحــتم ومسيتم با الخير

اليوم الموافدز 16/ 3/ 1427 سوف يبدأ بإذن الله أول جزء من مسابقه

:ety:العــــــــــــــضو المجــــهول :ety:




وش لون ها المسابقه :العضو المجهول هو عضو منكم وفيكم تعرفونه ويعرفكم بس انه متخفي وداخل بنك نيم جديد اللي هو العضو المجهول

وش عليكم :
تسألون ها العضو أسأله والعضو المجهول يرد عليكم ومن خلال ها الشي تقدرون تعرفون منهو العضو المجهول , وكل عضو عنده ثلاث فرص يعني لاقال أسم عضو راحت عليه أول فرصه وتسذا

وش علينا :
الجوااااااااائز الجواائز القيمه <<-- مفرعتن الشوشه لاحظي وش صاير با الدنيا :D بتكون من نصيب اللي يعرف من هو العضو المجهول إن شاء الله



يا الله همتكوا بئــه

*****تقرأ :وي عطينا.
وي يتفضل
:D

[العضو المجهول]

يعيشك برشا اخت عنوود..ولاباس عليكي و يعيشك ربي ومش صحيح اني مجهوله بس محتاجه الدعوه برشا شطاره وبرشا تشكرات عنوود على الموضوع و صبراتي لسؤال اخواتي عن اسمي الصحيح
يالله عسلامه
الأماكن مشتاقه لك <<<إشهارإعلاني حتى وصول الاسئله

[مفرعتن الشوشه]

:060: وعليـــــكم السلااااام

ســـالخــــير عنودوه الصدز مسابقه coooool <<< يعني تراي اعرف انقليش :D
واتمنى من الاعضاء انهم يتقدعنو بئه ويورونا هميتهم :075:


وش لون ها المسابقه <<< بردقاني :060:


من يفكر ويتفضل* ويعطينـا*""مـن هـو مجهـول الأماكـن

<<< حتى انا؟؟؟؟ :060:


الجوااااااااائز الجواائز القيمه

<<<< ايه هين :060:

محتاجه الدعوه برشا شطاره

<<<< الحين يقال للمجهول مغير اسلوبه هاه ;)

س/ انت اي عضو ؟؟؟ <<< على شحم يازينتس ساكته :D

الله يعافيتس على الفكره الجميله :068:

وتشاااو

[@فروحه الحلوه@]

الصوت مو غريب علي


العضو المجهول قل السلام عليكم




<<<<<تنتظر




طيب قل الووووووووووووووو





والله شوفي الصوت صوت بنت اتوقع

الا ان كنتوا مغيرين الاصوات



واتوقع والله اعلم وبمشيئة الله يكون صح



انها بنت الامارات


كل الحزن



وارجوا ان يكون صح



ويسلمووووو عنود بجد لعبه ولا اروع منها

[عنوود]

السلام عليكم

العضو المجهول

الله يعيشتس برشا يا اخيتي :D
س1/ انتي ليبيه ولا تونسيه الله يعافيتس ترا اللهجه ما تعطينا علم دقيق :D
س2/ أنتي من زمان مسجله ولا توتس ؟

وسلااماااااااااااات

[عنوود]

السلام عليكم

مفرعتن الشوشه


مفرعتن الشوشه

ماني نقلب الموضوع سوالف اها بس :D



فروحه الحلوه

هههههههههههههههههههههههههه اجل بتعرفين من الصوت ماشاء الله وش ها الفراسه :D

ننتظر العضو المجهول

تجي تجاوب عليكم

[العضو المجهول]

بسم الله نبدا هسع((هالحين)) بالايجابه((الاجابه)) على الاسئلة مالتكم نبدا بالاوخوت ((الاخت)) مفرعتن الشوشه <<< شو يريد هاي الاسم

<<<< الحين يقال للمجهول مغير اسلوبه هاه
لا مغير اسلوبي ولا شي آني بس آريد أجرب المواهب مالتي :D

س/ انت اي عضو ؟؟؟ <<< على شحم يازينتس ساكته
آني القاليب ((القلب)) اللي يحب كليتي الناس وما يتشره حدا واذا تبغي الحتشي الواقعي آني عضو في الاماتشن وآني بتمنى اليتش حياه سعيده:038:
-------------------
ننتقل هسع للاوخوت فروحه الحلوه <<< ايه هيتشي الاسامي الحلوه
الصوت مو غريب علي
الغريب الشيطان لعنت الله عليه ولعنت الله على العلوج المحتلين

العضو المجهول قل السلام عليكم
السلامي عليكوم عرفتي هاي الصوت هسع:25:

طيب قل الووووووووووووووو
هالوووووووووووووووووو
لا تحتشي وتوقولي ما عرفتي هاي الصوت هالوووووو واضحه مو محتاجيه فهلوه ولا ذتشاء

والله شوفي الصوت صوت بنت اتوقع

الا ان كنتوا مغيرين الاصوات
ما مغيرين الصوتي ولا إيشي بس إنتي حرتشي عقلتش شويه و تعرفي اللوغوز((اللغز))

بنت الامارات


كل الحزن
شنو تحتشي وتوقولي.. شنو هاي الاسماء.. اهداء لصديقاتش والا تعتبرينه جوابتش على اللوغوزو آني بتمنى اليتش حياه سعيده:038:
-------------------------
ننتقل هسع للاوخوت عنوود << هيتشي الاسم صحيح ولا آني غلطان

السلام عليكم

العضو المجهول
وعليكوم السلام

الله يعيشتس برشا يا اخيتي
تسلمي عنوود على هاي الحتشي يالله عليتش آني أحوب هاي اللهجه تشثير واهلها وانتي هسع باللهجه مالت تونس ضربتي على اوتار القالوب الحساسه

س1/ انتي ليبيه ولا تونسيه الله يعافيتس ترا اللهجه ما تعطينا علم دقيق
آني مش ليبيه ولا تونسيه ولا عراقيه بس آحوب اللهجات العربيه تشلياتهاواقرب لكم آني من دوله عربيه<< شفتوا اش قد آني كريم حددت لكم آني من وين

س2/ أنتي من زمان مسجله ولا توتس ؟
آني بكون وياتش بكل وضوح آني من أيام خبزة نت
وبتمنى اليتش حياه سعيده:038:
--------------------
فيه اسئله ثانيه ولا اروح انام عندي مدرسه باتشر:047:

[العضو المجهول]

ابتكلم ولعل وعسى تكتشفوني من كلامي ..تبوني اتكلم لكم عن روحتي انا واهلي لباريس الصيف اللي فات ..يمكن اكثركم ما يعرف باريس فاتكلم عنها احسن منها تعرفون بلاد جديده و منها مصلحه للموضوع يعني اتكلم عن نفسي علشان نشوف الذكي او الذكيه اللي بتعرفني من كلامي .. ايه خلو اقص لكم القصه من البدايه حنا كنا من البدايه مشاكل يوم قررنا نروح لباريس بذاك الصيف امي الله يحفظها تقول نبي الخطوط السعوديه احسن نفس عاداتنا وتقاليدنا وابوي الله يحفظه يقول لا طيران الخليج افضل خدمه وسعر..و أخذ ورد بذا الموضوع كنت انا وخواتي نبي طيران الخليج مثل ابوي يعني ودنا نغير جو ما نبي نفس الاشكال اللي دايم نشوفها حنا رايحين نصيف علشان نغير جو مهوب نروح بنفس الجو فبالاخير اتفقنا على طيران الخليج ورحنا اولا لدبي ترانزيت ومن دبي لباريس وخذ الطريق كله 8 ساعات مع الوقفه في دبي صراحه ملينا بس والله باريس تستاهل الصراحه يستاهل من يقعد علشانها 10 ساعات المهم اول ما وصلنا باريس تعامل تمام ما تغير ابد عن قبل لانا قد رحنا قبل وحنا صغار بس اهلي يقولونه.. وكانوا حبوبين بالمطار وناس تفتح النفس اشكال كيوت بالمره والصراحه موظفين المطار ناس جنتل بالمره وتعاملهم ذوق بالمره المهم خذنا شناطنا من المطار و ختمنا الجوازات الدخول لباريس ارض السحر والجمال وعبق العطور ثم رحنا لسكنا في فندق كاستليون مستاجرينه من يوم حنا بالرياض عن طريق النت الله عليهم ناس متطوره وتفهم وعايشين في عصرهم المهم رحنا هناك ونمنا عقب السفر كنا تعبانين مره ومن بكره من يوم قمنا من النوم على طول انا وخواتي للشانز كانت امنيتي اشوفه يوم حنا صغار نسيتها رحنا افطرنا هناك مع ان الفندق يقدم مع السكن فطور مجاني بس خليناه ورحنا نفطر هناك المهم شوي ثم رحنا لمتحف اللوفر وتمشينا فيه بس ما رحنا لحق الركن الاسلامي اللي دعمه الوليد يقولون عقب ما عطاهم الوليد صكوه يحدثون فيه و لا شفناه يا خساااااااره بس المهم طلعنا من هناك ورحنا لملاهي قدام اللوفر ميوزيم بس ملااااااااااااهي مهوب زي الملاهي اللي عندنا كانها مراجيح بزران ا هناك الصراحه هي الصدق اللي يسمونها مدينة ملاهي مهوب خرابتنا وقعدنا هناك الين جا المغرب بس تصدقون ما كنا مغرب نهار الى هالحين الساعه 7 وكنا العصر بدري الشمس الى هالحين موجوده تصدقون ما غابت الا بعد الثمان المهم رجعنا وتعشينا بالفندق ونمنا كنا بالمره تعبانين وقمنا الصبح وعلى هالحال كل الايام ننوم الليل بدري ونقوم الصبح بدري تصدقون هناك صرنا نظامين لابعد درجه وحابين النظام بعكس هنا نحب الفوضى ونكره ننتظم بنظام معين المهم اليوم الثاني رحنا لضاحيه بعيده شوي عن باريس نفسها فيها قصر فرساي رحنا هالمره كلنا المهم تمشينا فيها وعجزنا نخلصها بس حديقتها والمسطحات المائيه اللي عندها بالمرررررررررررررره جنااااااااااااااااان ما ينمل منها تصدقون رجعنا وانا قاعده في الغابه ما ودي اتركها خذوني غصب عني المهم رجعنا لباريس ومن بكره رحنا لديزني قالوا لنا حقين التذاكر زيدوا يورو ونعطيكم تذكره صالحه لرحلتين مهوب لرحله وحده ونزيد يورو لكل تذكره وما استفدنا منها اصلن غلط الواحد يفكر يروح لنفس المكان اللي راح له المفروض يغير المهم اقولكم رحنا لديزني وفرجونا على كيف يسوون الخدع السينمائيه وكيف يسوون الرسوم المتحركه ثم تمشينا بملاهيهم وحدايقهم وراح اليوم كله عليها و المهم من بكره عاد تمشينا بشوارع باريس نفسها رحنا وصورنا بقوس النصر وبرج ايفل ورقيناه كله رووووووووووعه يشوف الواحد العالم من فوق وبعدها رحنا لمطعم فرنسي شعبي نبي نعيش حياتهم الفرنسيين العاديه وكلنا منه بالمره ديليشوز اكلهم ياليت تنعاد ذيك الايام واقولكم كل يوم مشوار وكل يوم مكان جديد الله بس شفت هناك والا ما يحتاج اقولكم عن ذا الشيء اكتفي باللي قلت لكم لانا رجعنا قعدنا هناك تقريباً 3 اسابيع ورجعنا للرياض وانا كان نفسي اعيش هناك

[عشق الليل]

يسلمووووووووو عنود على اللعبه

بالمررره رايقه ...

سؤال للمجهوله ... :(

ليه كاتبه بهالون يعني مسويه خدعه سنمائيه ... :D

<<<<< ظللت الحكي عشان تقراء...:)

.
.

س1 / انتي صبيه ولا صبي ....؟ <<<< سؤال زكي :D

.

طاااايب اذا انتي بنت

فانتي مفرعتن ..........................:D

مدري احس نفس الخط خخخخخخخخخخخخخ

.
.


يالاااااااابايوووووووووووووو

[عنوود]

السلام عليكم


العضو المجهول

ياكثر قرقك :D

بس استشفينا ان مكان معيشتك با الرياااض :D

[عنوود]

عشق الليلل

تسلمين يا اختشي :149:

يلا بئه كده اجتهدي واستغلي زكائك الحلو :D

[عنوود]

:aaa0asmil

http://www.capricorn007.com/6789/flowerline.gif
النتـــــــــــــايج

فروحه الحلوه خذت فرصه وباقي 2

عشق الليل خذت فرصه وباقي 2

طبعاً ماراح نعلن عن النتايج او من هو العضو المجهول إلا في نهاية المسايقه

يعني ماتدرون يمكن أحد من أجوبتكم صحيحه :0000:

ننتظر العضو المجهول لأكمال الأجوبه :148: http://www.capricorn007.com/6789/flowerline.gif

[سكون]

اقول ان العضو المجهوول


1- عنوود


2- كل الحزن


3- مفرعتن الشوشه

[admin]

العنود اللي متحفتنا بالاماكن
شيخة الخمبدزه والخمبدزه مملكتها
مطربتنا ومتحفتنا وشايله كل الاماكن
كل يومن يالتسالي مفاجـئـتـنا

والله انا بغيت اشارك بس يوم شفت الجايزه ماتشجع ( مفرعنتن الشوشه) هونت
صراحه خفت ابلش بها منيب ناقص عاهات

سوعال /
هل تحس ان مشاركاتك كثيره ولا قليله او شبه معدومه وهل انت طالب ولا موظف ؟

[مفرعتن الشوشه]

سالخيييير :060:

فانتي مفرعتن ..........................

<<< عشقشق ملحتس مسويه ذكيه هاه بس ماتدرين يمكن انا يمكن مهوب انا :068:


سكــون مشاء الله عليتس منتيب تلعبين خلصتي الثلاثه كلها :060:
خلااص ترى ماعاد لتس محاولات :068:


والله انا بغيت اشارك بس يوم شفت الجايزه ماتشجع ( مفرعنتن الشوشه) هونت
صراحه خفت ابلش بها منيب ناقص عاهات

<<<<< من لاعب عليك وبعدين اهلي يبوني :060:<<< ايه هين

وبعدين اجل عاهات هاه :060: انت شايف خشمك بالمرايه تومك تحكي عن العاهات :060::060::060:


س / انت بثانوي ؟؟؟:060:

[*كحيلان*]

هلا والله بالعنود..
ما شاء الله عليتس وعلى افكارتس الحلوه..
شاربه ريد بول انتي؟وش ذا النشاط من موضوع صادوه الى موضوع العضو المجهول..
طيب انا عندي سؤالين للعضو المجهول..
س/ وش اكثر منتدى تشارك فيه ؟
س/ قد رديت انا على موضوعك ولا انت رديت على موضوعي ؟
وبالنهايه احب اشكر العنود والعضو المجهول على الموضوع
<====== له رجعه بعد اجابة العضو المجهول

[العضو المجهول]

عشق الليل
ليه كاتبه بهالون يعني مسويه خدعه سنمائيه
ايه والله وترا اللون اللي استخدمته في الحكي عن سفرتي لباريس هذي اول مره استخدمه في المنتدى
س1 / انتي صبيه ولا صبي ....؟ <<<< سؤال زكي
صبي

:018:

عنوود
بس استشفينا ان مكان معيشتك با الرياااض
فعلا انا من اهل الرياض

:018:

سكون
اقول ان العضو المجهوول


1- عنوود


2- كل الحزن


3- مفرعتن الشوشه
فيه حذف اجابتين ولا اتصال بصديقه:34:

:018:

العيار
والله انا بغيت اشارك بس يوم شفت الجايزه ماتشجع ( مفرعنتن الشوشه) هونت
صراحه خفت ابلش بها منيب ناقص عاهات
وش فيها مفرعنتن الشوشه كلها ملح وقبله
سوعال /
هل تحس ان مشاركاتك كثيره ولا قليله او شبه معدومه وهل انت طالب ولا موظف ؟
الجواب على شق سؤالك الاول استبعد كثيره و الصراحه ما ادري وش اختار قليله ولا شبه معدومه او تقدر تقول الاحسن بين قليله وشبه معدومه اتوقع انه افضل جواب لكن كثيره امبوسيبل ما فيه امل تكون كثيره اما جواب شق سؤالك الثاني اختار الاجابه الاولى

:018:

مفرعنتن الشوشه
س / انت بثانوي ؟؟؟
نو

:018:

كحيلان
س/ وش اكثر منتدى تشارك فيه ؟
الصراحه اكثر مشاراكاتي كانت بالاماكن لاند والاماكن للخمبدزة والاماكن للشعر والرومانسيه والاماكن للصور والاماكن للصداقه والترحيب اما المنتديات الباقيه قليله او معدومه
س/ قد رديت انا على موضوعك ولا انت رديت على موضوعي ؟
تبي الصدق انا قد اضفت رد في مواضيعك وانت قد اضفت رد في مواضيعي

:018:

خلصت الاسئله ولا شو

[عاشق سراب...]

بصراحه بعد قرائتي لردودك اشك في فروحه الحلوة

انتي فروحه الحلوة ولا لا


هذا محاوله اولى
السؤال يقول
اخذتي البكلريوس ؟ ايه ولا لا

[الارهابي]

السلامووو عليكوووووووووم 00

عنوووود ما اقول الا ما شالله 00
فكره رهيييييييييييييييبة ومسابقه حلوووة 00

مشكووووووووووورة 00


بالنسبة للعضووو محاولتي الاولى مدامه ولد : عاشق سرراب


======

العضو المجهووول00

مساك الله بالخير 00 ازيك 00

والله ما عندي اسئلة الحين 00 بس لي انشالله عوودة 00

بايووو

[عاشق سراب...]

حالتك صعبه الارهابي
انا اقول المصرقعه
وهذي المحاوله الثانيه

[عشق الليل]

انااا باخلص جميييع توقعااتي..

اتوقع انه...

ازحف لين تنحف

او

شمالي :)

.
.

يالاااااااااابايوووووووووووووو

[الارهابي]

عاااشق تقول لك صبي = ولد هع

[@فروحه الحلوه@]

ازحف لين تنحف ساكن في القصيم

مو في الرياض



لنبحث عن شخصن آخر




تراه ماهوب انا العضو المجهول

[عنوود]

السلام عليكم


سكوون طيب مافيه سلام ولا كلاااااااام :D خخخخخخخخخخ


العيار

العنود اللي متحفتنا بالاماكن
شيخة الخمبدزه والخمبدزه مملكتها
مطربتنا ومتحفتنا وشايله كل الاماكن
كل يومن يالتسالي مفاجـئـتـنا

الله الله صحححححححح لسااانك يا الشاعر المغووووار على ها الحتسي الجميل
<<-- با الطول با العرض شيخة الخمبدزه تهز الأرض خخخخخخ :0190::0060:<< ماصدقت :D

والله انا بغيت اشارك بس يوم شفت الجايزه ماتشجع ( مفرعنتن الشوشه) هونت
صراحه خفت ابلش بها منيب ناقص عاهات
الله يرجك عاد انا منيب صاحيه يوم احط الجائزه مفرعتن الشوشه تبي محد يشارك مره وحده :D خخخخخخخخخخ لا والله ترا مفرعتن الشوشه كلها ملح وقبله صقيقتي الصقوقه <<-- خافت :D

الجائزه << مفرعتن الشوشه لاحظتي وش صاير با الدنيا

هنا أسلوب إستنكار وتعجب من عنوود إلى مفرعتن الشوشه أستنكر عليها بقولي هل لاحظتي ماذا يحصل والمقصود هنا استنكر بأنني سأعطي الهدايا لأنني من النوع الذي يحب الدراهم والريالات والدنانير وانني كما ابا العتاهيه :076:

تسلم يا العيار على المرور

وننتظر العضو المجهول :090:

[عنوود]

السلام عليكم

مفرعتن الشوشه رديت عليتس :D خخخخخخخخ


*كحيلان*

اهلاً وسهلاً
الله يسلمك يا كحيلان
شاربه ريد بول انتي؟وش ذا النشاط من موضوع صادوه الى موضوع العضو المجهول..
قل ماشاء الله الله يرجك
بتقضي علي اليوم :D
وتسلم على المرور

العضو المجهوول
وش فيها مفرعنتن الشوشه كلها ملح وقبله

لا تسمعك الحين تنسدح علينا :D

[عنوود]

السلام عليكم

عاشق سراب
تسلم على المرور

عشق الليل
أوتسي :D

الإرهابي
تسلم على المرور

@فروحه الحلوه@

ياواد يا ذهين :D
خخخخخخخخخخخخخخخخخخخخخخخخ

[عنوود]

:aaa0asmil

http://www.capricorn007.com/6789/flowerline.gif
النتـــــــــــــايج

سكوووووووووون تدخل بقووه وتقضي على فرصها الثلاثه :D

فروحه الحلوه خذت فرصه وباقي 2

عاشق سراب خذ فرصتين وباقي له وحده

الإرهابي خذ فرصه وباقي له 2

عشق الليل قضت على فرصها الثلاثه

آخر التطورات

البعض فكر وكتب من يكون العضو المجهول والبعض الآخر فضّل المراقبه والصبر :016:

إلى الآن انحصر تفكير الأعضاء في ثمانية أشخاص وهم عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن

هل هم فعلاً من يجب أن نفكر فيهم على أنهم العضو المجهول :027:, أم يجب إستبعادهم :eek:, هل بينهم العضو المجهول فعلاً :confused: .. ربمــــــــــا , وربما لا ;)

لا تعلمون هنا في العضو المجهول بما يمكنكم أن تعتقدوا يقيناً بصحته , أو تجزموا بعدم وجوده ,, كل شيء
ممكن وغير ممكن:0118: في العضو المجهول في الخمبدزه فقــــــــــــــــط :D
يمكنكم ان تشعروا با الحيره والغموض حيال شتى خياراتكم :157:

نياهاهاها :19:
ننتظر العضو المجهول لأكمال الأجوبه :0380:: http://www.capricorn007.com/6789/flowerline.gif

[admin]

عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن


من بقى

دموع الورد / استبعدها لان شغالتهم مسافره ولاهيب فاضيه <<< فضيحه

السحاب/ تحس انه منفصم ولا هوب اجتماعي ولا يحب يلعب مع احد

عشق الليل / ما اتوقع لاني احس انها ناعمه وهالاسلوب فيه خشونه مع شويت نعومه

مدري من بقى
لكن محاولتي الاولى
الارهابي او كحيلان اشك في واحدن منهم
وبشيك على باقي الاعضاء



تشااااااااوز

[*كحيلان*]

رد علي في موضعاتي وانا رديت عليه وصبي..
اقووووووووول1- الزير عبيد 2- شمالي

[دموع الورد]

ههههههههههههههههه قسم بالله تطورات مو صاحيه وش صار بعدي يا عالم وش صاير تكفون

البعض فكر وكتب من يكون العضو المجهول والبعض الآخر فضّل المراقبه والصبر

إلى الآن انحصر تفكير الأعضاء في ثمانية أشخاص وهم عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن

هل هم فعلاً من يجب أن نفكر فيهم على أنهم العضو المجهول , أم يجب إستبعادهم , هل بينهم العضو المجهول فعلاً .. ربمــــــــــا , وربما لا

لا تعلمون هنا في العضو المجهول بما يمكنكم أن تعتقدوا يقيناً بصحته , أو تجزموا بعدم وجوده ,, كل شيء
ممكن وغير ممكن في العضو المجهول في الخمبدزه فقــــــــــــــــط
يمكنكم ان تشعروا با الحيره والغموض حيال شتى خياراتكم

ههههههههههه بالرااحه يا فيصل القاسم

اما انت يا العيار

من بقى

دموع الورد / استبعدها لان شغالتهم مسافره ولاهيب فاضيه <<< فضيحه

السحاب/ تحس انه منفصم ولا هوب اجتماعي ولا يحب يلعب مع احد

عشق الليل / ما اتوقع لاني احس انها ناعمه وهالاسلوب فيه خشونه مع شويت نعومه

عادي خذ راحتك بس المفروض يوم انك عرفت مشكلتي دبرت لي شغاله يا ماال العافيه ولا راحتي ما تهمكم ( بتبكي مقهوورة ما احد حس بكرفها بالمطبخ )

نرجع لعنيده ومسابقتها الرووعه

سؤال

عرفنا ان العضو ولد ويسكن بالرياض

امممممممممممممم طيب باي مرحله دراسيه لانه قال وراي مدرسه نبي نعرف

باي مرحله لا هنت

وهل تحب التصميم

وهل تحب الرياضه

عنود شكلي عرفته بس بصرااحه الجائزة ما تحمس وش اسوي بمفرعتن الشوشه هاه انا باحله بعمري تجيني وحده ثانيه هههههههههه

بس ما هي شينه اقل شي تساعدني بشغل البيت لين ربك يفرجها


برررررررب

[العضو المجهول]

عاشق سراب
اخذتي البكلريوس ؟ ايه ولا لا لا
-----------
الارهابي
العضو المجهووول00

مساك الله بالخير 00 ازيك 00

والله ما عندي اسئلة الحين 00 بس لي انشالله عوودة 00

بايووو
مساك سكر ويا هلابك المره الثانيه
--------
دموع الورد
عرفنا ان العضو ولد ويسكن بالرياض

امممممممممممممم طيب باي مرحله دراسيه لانه قال وراي مدرسه نبي نعرف

باي مرحله لا هنت

وهل تحب التصميم

وهل تحب الرياضه
بالمرحله الجامعيه واحب التصميم وابوريكم في الايام القادمه تصميم لي وامووووت بالرياضه

[العضو المجهول]

نرجع لسالفة فرنسا شفت شي هناك يضحك فيه ثلاثه سعوديين بالمره اشكالهم كلاسيك ..لا و تصرفاتهم تصرفات ناس جاين من الريف دايركت تصدقون قاعدين بالشانز وقاعدين بكوفي الهاجن داز ارخص كوفي شوب في الشانز ولابسين تكميله رياضيه ما ادري هم جايين يتقهون والا يمارسون رياضه المهم كانت اشكالهم بالمره مزريه ما علينا منهم بس مهيب هنا المشكله المشكله مزعجين الناس يتعرضون للجاي والرايح وينكتون الصراحه واحد منهم كان على انه قروي ستايله بس ما شاء الله طول وعرض ووسااااامه وعيوووووون نااااعسه و ذوووووووووق تصدقون شاف وهو رايح كما العاده للكوفي شاف واحد خال يتعرض لسعوديه يبيها خويته عند مدخل فوكيه وهي موب راضيه وازعجها ويجي وهو اللي يخنق الخال ويقول بالحرف الواحد اذلف لاذبحك في محلك تراك ازعجتها والخال دوره ما عاد تلقاه المهم البنت ذي نادته يتقهوى معها في فوكيه كوفي شوب محل كوفي غالي اغلى محل هناك هي واضح انها بنت عز المهم وهو يقول لا الله يغنيك المهم البنت قالت لا والله لازم تجي المهم وافق واشوف اخوياه حاسدينه عاد اشكال اخوياه خلق الله حسن ما تنحب ابد اظاهر بيتمون عزاب على طول المهم انا اشوفه هو والبنت لانهم جلسوا في الطاوله اللي قدامي واسمع سوالفهم والله طلع ذوووووووق الولد بس يبيله ترتيب شوي في لبسه ويطلع ستاااااااايل المهم هي تساله عن اسمه ويعلمها وتساله عن نفسه وهو يجاوب بس ذرب الولد ما سالها شي المهم و يوم قضوا متقهوين قالت له ودي اشوفك على نفس الطاوله الساعه سبع بكره قال لها اوكي وانا على طول برمجت موعدهم قلت ابي اشوف وش نهايتها السالفه المهم اقولكم من بكره جت البنت قبل الوقت بعشر دقايق وهو جا على الوقت وتلوموني فيه يوم اقوووووول ذوق المهم وترحب فيه وهو مثل طبعاً اخوياه الشيون ما فيه امل ياصلون ذا المحل اظاهر انهم بتروح رحلتهم كلها على هاجن داز ما علينا منهم المهم واحط اذني على طاولتهم واسمعهم يسولفون شوي وتكلموا عن الشعر وسالته قالت تكتب شعر قال ايه ويعطيها قصايد رووووومااااااانس روووووووووعه دريت ان الولد روووومااااانس من راسه الى زبيرياته تكرمون اللي كان لابسها والبنت ماخذه راحته وتساله قد حبيت وهو يقول لها ايه مره وحده في حياتي ويعلمها قصتها<<<< ابقولكم قصة حبه في المره الجايه قصه تقطع القلب اليوم بس بنتلكم عن قصته هو و السعوديه اللي بفوكيه واقولكم وقالت وين انت ساااااااااكن وعلمها وهنااااااااااااااااا انا انهبلت لاني صرت اعرفه<<<<في المره اللي عقب الجايه اقولكم من صار هو واقولكم وش نهايته مع البنت السعوديه اما المره الجايه ابقولكم قصة حبه هو

[مفرعتن الشوشه]

مســــاالنور


وش فيها مفرعنتن الشوشه كلها ملح وقبله

<<<<< ينصووووور دينك هيا دي الناس اللي بتفهم :060:


الله يرجك عاد انا منيب صاحيه يوم احط الجائزه مفرعتن الشوشه تبي محد يشارك مره وحده
<<<< تكفيين على هونتس ولو اني الجائزه تسان شفتي الصفحات الحين وصلت 2365 :060:
<<<< ايه هين


عنود شكلي عرفته بس بصرااحه الجائزة ما تحمس وش اسوي بمفرعتن الشوشه هاه انا باحله بعمري تجيني وحده ثانيه

<<<< ياحظتس لو اني الجائزه بس للأسف منيب الجائزه انظر الاعلى توضيح عنوووووود :060:


بس ما هي شينه اقل شي تساعدني بشغل البيت لين ربك يفرجها
<<<< خخخخخخخخخخخخخخخخ ياملحتس تنكتين اضحكي عنووود :060:
ياحليلتس انا في بيتنا مااشيل عوود تبين اساعدتس اللي رحتي فيها ولا استفدتي شي :060:


العضو المجهوول
س/ من صديقك بالمنتدى او من اكثر شخص بالمنتدى قريب منك ؟؟؟؟؟:3yar:




اعلااااااااااان هااااااااااااااااام :-

تقر مفرعتن الشوشه وتلعن وتوضح انها مهيب الجائزه وتقول ياحظكم لو اني الجائــــــزه
وان هناااك سوء فهم من حتسي عنوود اللي ماينفهم :060:
مع العلم ان عنووود اخذت تشرح وجه نظره بأنها انسانه قعيطيه وماتصرف الريااال الا بالطق
والمطاااااق وسلااامتكم

[العضو المجهول]

مفرعتن الشوشه
العضو المجهوول
س/ من صديقك بالمنتدى او من اكثر شخص بالمنتدى قريب منك ؟؟؟؟؟
الارهابي

[عاشق سراب...]

والله اني اشك فيك يا مزوني

واعلنها صريحه مازن هو العضو المجهول

[العضو المجهول]

معليش ودي اسولف لكم عن روحتي لجيزان ابقطع سالفة روحتي لباريس مؤقتا ً لاني مشتهي اسولف عن مدينة جميلة مثل جيزان القصه وما فيها رحنا رحلة قنص قبل 7 سنين انا و خوالي وعيال عمي كان وقت نزل (( الطيور المهاجره على قولة الخكاريه)) و نروح اول لمكه نبي نعتمر قبل القنص المهم وتعرفون طلعات الشبابيه ما فيها عجله على راحتنا كنا نمشي معنا جيبين لاندكروز وبينا كنود تتواصل السيارتين فيه المهم وصلنا ظلم ووقفنا باستراحة ساسكو وتعشينا هناك وطلعنا منها و نبي نريح قبل العمره قلنا خل نوقف اجل قبل الطابف على الخط ونرقد والله نمت نومه ما مثلها تصدقون ان بطانيتي مربطها علشان ما تطير لعب فيها الهوا وبالاخير اشد اطرافها واتوسدها علشان ما تطير المهم قمنا قبل ما تطلع الشمس وصلينا الفجر ونزين قرصنا بالمله وقهوتنا وجغم حليب ونمشي على مكه اعتمرنا ثم خذنا شقه نتلين ويوم جا عقب العشاء وحنا اللي نسري رايحن لجيزان عن طريق الساحل ونرقى الهدى وانا اللي ادوخ وارقد بالطريق والمهم وحنا اللي نمسك خط الساحل ونمر على دير اهل الجنوب كلها معلقه بالضلعان وانا نااااااااااايم وربعي يفكرون يزينون عشاهم ولا يدخلون ديره من ذا الدير ويشوفون لهم مطعم وانا نااااااااااااااااايم المهم قرروا يوم شافوا بني مالك انهم يوقفون فيها ويشوفون لهم مطعم فيها وانا نااااااااااااااااااااااااايم ونحول للمطعم وانا نااااااااااااااااااااااايم ويطلبون وانا نااااااااااااااااااااااااااااااايم ويقولهم صبي المطعم ما عندي شي شطبنا وانا ناااااااااااااااااااايم المهم قال لهم تبون الحكاكه قالوا ايه اي شي جايعين قال ابشروا وانا نااااااااااااااااااااااااااااااايم لا تصدقون تراي واعي بس تو قاعد اشوف مسرحية شاهد ما شافش حاجه وتاثرت فيها المهم اقولكم وناكل الحكاكه ونطلع من بني مالك ونلقى لنا يالله ذيك الحياله اللي جمب الخط لان خطوطهم هناك ما فيها سعه كلها وديان اللي جمبها المهم اقولكم يوم لقينا ذا الحياله المستويه وحنا اللي نصفط ونرقد قبل الباحه ب0 3 كم تصدقووووووووون جاني النوم باتسر اكمل لكم السالفه

[عشق الليل]

ههههههههههههههههه

انتبه تقولناا روحتك لسودان

ركز على شي واااحد وكملهااا غدااا...

.
.

صحيح اختياراتي خلصواا

بس ودي اقولكم مدري

اشك بكحيلان

نفس اسلوبه بالسواليف .... :D وخصوصا صديق الارهابي ..:)

.

هذي محاوله بدون جائزه خخخخخخخخخخخخخخخخخ

.
.


يالااااااابايووووووووووووو

[الارهابي]

والله من اول مره شفت سالفة باريس وانا جاي ابقول سواليفك كنها سواليف كحيلان 00
بس خفت تضحك علي قلت اصبر شوي 00
بس خلصنا
كح كح 00
يا دووب اخر مره يوم اطلع معك تلعب علي احس انه فلان وماحس انه فلان 00

هين هين
يللا وخر وخر زعلت :(

هههههههههههههههههههههههههههه

مشكووووووووورين على اللعبة 00

ولعبت دورك صح 00


بايووو 00

[العضو المجهول]

نتابع قصة جيزان كنا حنا عشرة رجاجيل ويوم قمنا من النوم ((يا ذا النوم اللي ذبح سالفتك))
افطرنا بمحلنا قرص مله وقهوه كما كل الرحله هذا فطورنا ثم يوم قضينا رحنا للباحه وخلصنا اشغالنا اللي فيها شرينا مقاضي لزوم الطريق لجيزان واللي بيمدد اجازته من الموظفين لانهم يبون فاكسات وهلم جره ثم الى وقت الغدا جاي وتغدينا ونهجنا الى جيزان يوم وصلنا جيزان سكنا عند واحد من عيال عمي نقيب في جيزان طالب النقل والى يومكم ما جاه شي احد يعرف واسطه تنقله للرياض ما علينا المهم اقولكم ذبح ذاك اليوم ذبيحتين كرامه لنا والله لايوريكم الرز كان الوان والله في حب رز ازرق وفيه اصفر وفيه احمر وفيه ابيض تصدقون ولا ما تصدقون((اقتنعت فعلاً ان الجيزاني اذا بغيت تعذبه لبسه لون واحد)) مالكم بالطويله وامرحنا ذاك اليوم ويوم قمنا والاه يوم خميس وسوق الخوبه يبدا سوق الخوبه في الخوبه ديرة قريبه يم جيزان حول حدود اليمن المهم ان ذا السوق وش تبي تبي محاضرات دكتور بالجامعه تلقى تبي اسلحه تلقى تبي وعول وش اقول فيه كلش المهم عودنا منه عقب الظهر حنا من الصبح وحنا فيه اقولكم يوم عودنا عاد بتلنا لوادي عندهم حول جيزان يقول ولد عمي اللي ساكن هناك انه يكثر فيه الطيور وقعدنا فيه اسبوع وقنصنا فيه من قطا الى كرووان مهوب العصفور اللي يصفر لا ذا طير كبير كانه ديك رومي اظاهر اسمه ديك حبشي
(( كروو------- وان))<====== كذا ينطق
المهم اقولكم وقنصنا فيه وبارا ((الوبر اللي كانه ارنب بس بني غامق)) وش اقولكم بعد قنصنا بذا الوادي ما خلينا شي الا وجبناه وكنا منوخين يم عين تمشي والله انها صافيه نزين عشانا وغدانا منها ونشرب منها اقولكم عين انقى من الغيمه المهم ذاك اليوم قررنا نمشي نشوف نهايتها وحنا اللي نتبعها الين وصلنا على حافة جبل وهي اللي تصب مع ذا الحافه شلالات ولا شلالات نياقرا والله يا جماعه ما تتصورون جمالها الشلالات والله روووووووووعه وسبحان الخالق اللي صورها اقولكم ولو تشوفون الجبال اللي حولها خضار والله كانه اللي يجبونه بقناة اليمن يا الربع ما تفوت
<======== ولم عزيته بيروح لمكانهم ذاك من يخاويه
ما تصدقون الصراحه ما عطيتها حقه الغابات اللي هناك شوفوا قناة اليمن اذا جابوا لقطات الجبال الخضرا وتعرفون بس اليمن ينقصهم ذيك العين والشلالات اقولكم دايم قبل المغرب نتسدح على الضلعان الخضر نشرب الشاهي روووووووعه روووعه وش اقولكم يوم قضينا من ذاك الوادي وحنا اللي نروح لفيفا نبي نمرح فيها الين باتسر لانا ناوين نروح لمنطقه فيها ارانب يمدحونها طبعاً مهيب مثل الرمله لكن احسن منطقه في الجنوب اقولكم بس نهايتها ما امرحنا الديره ريحتها قات عاد اللي ما تعود عليه تصرعه ريحتها المهم نزلنا من فيفا بس ولو ديره ما تفوت المهم اقولكم يوم نزلنا ونمنا حدر يوم قمنا الصبح وحنا اللي نروح لذيك المنطقه اللي يمدحونها المهم قعدنا هناك مدري بس يمكن حول الاسبوع عودنا عاد نحط ولد عمي بجيزان وحنا بتلنا للرياض عن طريق بيشه الطايف خط الحجاز الصراحه ودي اسولف عليكم بس مشغووووول يعني ما فيه امل استرسل يالله الرد القصه الجايه قصة الحب اللي في فوكيه والقصه اللي عقبها قصة القروي ابو زبيريات ورياضه اللي في باريس من طلع يوم علم وينهو ساكن..
<<<<< تناقضات في سواليفه لابعد درجه اجل سفره لباريس وسفره لجيزان
ايه لازم نشجع السياحه الداخليه والسياحه الخارجيه ما لنا عنها غناة

[عنوود]

السلام عليكم

العيار

ما اتوقع لاني احس انها ناعمه وهالاسلوب فيه خشونه مع شويت نعومه
ياسلام على الوصف :D

السحاب/ تحس انه منفصم ولا هوب اجتماعي ولا يحب يلعب مع احد
ههههههههههههههههههههه مسيكين ليت من يروح ويقوله :D

دموووع الورد
ههههههههههههههههه قسم بالله تطورات مو صاحيه وش صار بعدي يا عالم وش صاير تكفون

اها من قالتس تغيبين بعد ها الشغاله مالقت تروح إلا الحين :15:

ههههههههههه بالرااحه يا فيصل القاسم
خخخخخخخخخخخخ يمديتس :D


وتسلمين يادموع الورد وترا الجايزه مهيب مفرعتن الشوشه :D

*كحيلان*

حياك الله

العضو المجهول


خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخ أقول ورا ماتقولنا قصتك في العراق لأن لهجتك العراااقيه مررررررررررره خطيره ياني فقعت ضحك
بالمره اشكالهم كلاسيك لا
طيب ماينفع يصيرون لا كلاسيك :D خخخخخخخ

ناس من جاين من الريف دايركت تصدقون قاعدين بالشانز وقاعدين بكوفي الهاجن داز ارخص كوفي شوب في الشانز ولابسين تكميله رياضيه ما ادري هم جايين يتقهون والا يمارسون رياضه

أوه لا لا :038: عسا جاين من الريق القروي الأشكال القرويه يااااااااااااااااااااااااااي :056: لا وقاعدين بهاقن دااز ارخص كوفي <<-- ايه هين :D يارببببيييييييه كيف تحلمتي تجلسين معهم كيف تصير قصه عليهم اصلا قررررررررررررررررررررررررررررررررف <-- يا الله لا تحقرنا :D

المهم وش صار با البنت والولد :36:

مفرعتن الشوشه
<<<< خخخخخخخخخخخخخخخخ ياملحتس تنكتين اضحكي عنووود


ههههههههههههههههههههه :36:
خخخخخخخخخخخ :D
عاشق سراب

حياك الله

[عنوود]

السلام عليكم

العضو المجهول

ماشاء الله يا العضو المجهول ماخليت ديره مارحت لها :D

كان وقت نزل (( الطيور المهاجره على قولة الخكاريه))

هههههههههههههههههههههههههه

عشق الليل

يا الله حيها


العضو المجهول

كان الوان والله في حب رز ازرق وفيه اصفر وفيه احمر وفيه ابيض تصدقون ولا ما تصدقون((اقتنعت فعلاً ان الجيزاني اذا بغيت تعذبه لبسه لون واحد))

ههههههههههههههههههههههههههههههههه

اقول لايكون ات جايننا من الوزارة وتشجع على السياحه الداخليه وتسوي دعايات لجيزان وفرنسا :D
خخخخخخخخخخخخخخخخخخخخخخخخ
طاح سوق الجراح :3yar:
خخخخخخخخخ

[عنوود]

:aaa0asmil

http://www.capricorn007.com/6789/flowerline.gif
النتـــــــــــــايج

العيار اخذ فرصتين وباقي فرصه
*كحيلان* خذ فرصتين وباقي فرصه

عاشق سراب قضى على فرصه الثلاثه

الإرهابي خلصت فرصه الثلاثه

سكوووووووووون قضت على فرصها الثلاثه

فروحه الحلوه خذت فرصه وباقي 2

عشق الليل قضت على فرصها الثلاثه

آخر التطورات

دخوووووووووووووووووووووول جديد لمجهولين محتملين:0380: ,الزير عبيد , *كحيلان* MAZAN, الإرهابي ليصبح مجال تفكير الأعضاء في المجهولين منحصر في هذه المجموعه المكونه من 11 شخص
عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن , MAZAN, *كحيلان* , الإرهابي , الزير عبيد


هل يجدر بنا القول أن الدخول جديد للأعضاء زاد إمكانيه فوز كم :009: , أم لم تزد الإحتمالات الجديده ولم تنقص :016:
كــــــــل شيء وارد وكما نقول دائماً :036:
كل شيء ممكن وغير ممكن:0118: في العضو المجهول في الخمبدزه فقــــــــــــــــط :075:
يمكنكم ان تشعروا با الحيره والغموض حيال شتى خياراتكم :27:
نياهاهاها :19:

ننتظر :0380:: http://www.capricorn007.com/6789/flowerline.gif

[مفرعتن الشوشه]

^
^ ^ ^
^ ^ ^ ^
خخخخخخخخخخخخ لايكثر انتي ووجهتس



العضوو المجهووول ..

عن روحتي لجيزان <<<< من باريس لجيزان :060:

بما ناي مالي بالصيد والقنص :060: <<<< هو انتي لتس بشي اساسا :060:
اطـــالب بأكمــــــــــــــــــــــــــال قصه باريس والكووووووووفي سريييعا

عاشـــق ..
مسوي ذهيـــن الحين انت يقول لك بالجامعه وانت تقول مويزين تراه بثالث ثانوي :060:


:075:

[admin]

وش السالفه هالحين عرفتوه ولا ............... لا

انا صراحه شاكن في واحد واذا صار هو اللي في بالي فهو غبي لاني كشفته بحركه سواها

<<< الله يستر مسوي ذهين وشكلي انا اللي بطلع غبي

المهم ان طلع توقعي صح

الهديه ابهديها لحد المهم فكوني منها يرحم والديكم :3yar:

[دموع الورد]

ايه وش السالفه

<== يا حبها للتقليد

انا كنت شاكه انه مازن بس مازن بالثانويه وهذ جامعي

نقول ازحف لين تنحف هذي سوالفه وشكله ولد نعمه كل سنه بباريس اجل هو ما فيه غيرة

ننتظر ردك عنوود

واذ غلط اقدر اكمل ولا خلاص ما فيه امل اشارك

برب

[العضو المجهول]

قصة عشق ولد فوكيه
ايه اقولكم وسالته قد حبيت قال ايه مره وحده قالت وين ومتى وكيف<<تقولها وهي مصدومه..اقولكم وقال لها في الرياض قبل سبع سنين بالصدفه يقول بداية القصه كنت مار من عند طريق ديراب توني راجع للرياض جاي من تبراك ويقول كنت على حدود اذان العشا ويقول يوم وصلت عند بنده وانا اللي اشتري لي شي بارد عقب الخط يقول والاهم يصكون ويطلعون الزباين يقول وانا طالع الى فيه وحده تناديني تقول يا اخ وقف لو سمحت يقول والتفت والاها شابه باول العشرينات قالت لو سمحت ممكن تنتظر معي شوي الين يجيني السواق انا مواعدته بعد صلاة العشاء احسبهم مهوب طاردينا وهالحين ابقعد بالشارع لحالي وتعرف يوم اربعاء الشباب يضايقون اللي مثلي وخصوصاً اني لحالي يعني ودي انك تحرسني الله يخليك يقول قلت ابد ما فيه مشكله اخت لي انتي اوصلك اذا بغيتي يقول اني كنت تعبان وما فيني حيل اوقف على رجليني لاني لاعب كوره بمزرعة بتبراك الين انهد حيلي قالت لا ما يحتاج توصلني اخاف يفهمون غلط يقول حسيت انها خايفه زود عن فهم الناس يعني تخاف على قولتها يفهمون الناس غلط وتخاف ان لي نية شينه المهم وقلت خلاص ابقعد بالسياره حولك منيب بعيد اذا بغيتي شي طقي دريشتي قالت لا تكفى اخاف يجيني احد وانت ما تنتبه قال طيب ابوقف السياره قدامك وانتي بتصيرين قدام عيوني وان شاء الله ما حاصل الا الخير قالت الله يجزاك خير والله اني مستحيه منك بس حيل الله اقوى قال لا تستحين ولا شي هذا واجب والناس لبعضهم المهم ويتكي بالسياره ويلعب بالرادو ويلقب ويطلع له واواواواواواو<<< ازعاج الرادو
ثم تطلع له محطة هنا لندن ثم يقلب الين طلعت له اذاعة الرياض وفيما هو يقلب يمر شباب بهوندا ما يحتاج اعطيكم وصف زود عن الهوندا هوندا وبالشفاء اكيد عرفتوا وشهم المهم ويتكلمون عليها ولا ردت واخينا باللله ما درى مسوي حياوي حاط عيونه بالمسجل خوش حراسه الين نزل عليها المعاوني اللي جمب السواق وجايها طاير وهي اللي تطمر وما تطقت دريشة خوينا الا فتحت باب المعاوني وركبت وقالت جااااااااني جاااااني يقول وانا منلخم وارفع راسي من جهتها وهي تشر قدام السياره ويقول والتفت لاشارتها و القى ذاك العير اللي قدام سيارتي كان واقف محلها اللي كانت جالسه فيه يقول وانا اللي اقولها اقفلي بابك وانا افتح بابي واقفله و احوووووووول امشي مليووووووووون واستقبله ببوقس طرحه من طوله ويقول وانا اللي اتولجه تبقيس يقول وما دريت اصلن ان معه احد يقول ومادريت الا واثنين واحد معه موس والثاني سكين متولجين ظهري وكتوفي ورجيلاتي تطعين ويبون يسحبوني عن خويهم ويقول انا خلاص ما عاد اشوف قدامي الا خويهم يقول حتى تطعينهم ما دريت الا نهاية الامر ويقول وانا اللي ما عاد ادري عن نفسي الا بالمستشفى يقول وما دريت الا هلي فوق راسي وخواني يبشرون بعضهم يقولون صحى وينادون الدختور يقولون صحى ويجيني الدكتور ازيك يا استاز فواز كويس دي الوئتي يقول قلت له ضميان ضميان ابي ما((مويه)) قال حيقيبو الميه وكل حاقه بس انت ريح نفسك خالص وقال لاهلي ما توتروه هو محتاج راحه وقلت انا وين قالوا اهلي بالمستشفى بسيطه قلت وشلون قالوا لقطوك الاسعاف و ثيابك رويانه من دمك لاقطينك مغشي عليك من قدام بنده يقول وانا اللي اسالهم وسيارتي قالوا ما عليك الا من نفسك السياره بلعنتها قال لا سيارتي وينها وش صار فيها قالوا ما فيها شي بالبيت يقول قلت ما كسرت ولا شي قالوا لا قلت منقز بابها ولا شي قالوا لا ما فيها شي قالوا واللي طعنوك بلغنا عنهم الشرطه قلت وش دراكم عنهم قالوا فيه وحده كانت شايفك وانت تطعن قلت وينهي قالوا ما عاد ندري عنها يقول وانا تدور بي الدنيا ما عاد ادري وش صار فيها ولا وش صار عليها ولا وين دنياها هي مشرقه ولا مغربه يقول سؤال يوديني منا وسؤال يجيبني وهواجيس لعبت بس وانا على السرير يقول مانيب مع اللي حولي اللي بالجسم بس يقول يوم انتهت الزيارة قلت ميدهم خلاص روحوا لبيتكم ما ابي اعطل احد قالوا لا اخواني بنقعد معك قلت يا رجاجيل انا مافيني الا العافيه قالوا ولو نبي نوسع صدرك قلت بصركم المهم و قعدوا و سوالف وضحك وانا منيب معهم المهم شوي وتجي الدكتوره تغير المغذي ويوم راحت قالوا اخواني ذي سهره عليك من اول يوم دخلت يقولون مره جاي مشعل يبي يمرح عندك ويقول لقاها مسندة راسها على جال سريرك نايمه من التعب وحتى دخل مشعل وتنحنح ولا فيه فايده الين قومها قال يا اختي وقامت على صوته وهو يناديها وقالت انا آسفه قال معذوره الله يعينكم على شغلكم وراحت الدكتوره.........
8
8
8
الحلقه الجايه نكمل لاني ودي ارقد شوي وراي دوام من صبح الله
الحلقه الجايه نقولكم قصة الدكتوره وبيعرف فواز وين خويته ذيك
واشياء واجده بس انتظروها في احتفاليات العضو المجهول

[كل الحزن]

ترى ذبحتنا بقصصك ورحلاتك:060:
أنا عندي سؤال
س: قبل ما تسجل وتدخل بهذا الاسم (العضو المجهول)
من متى ما دخلت وشاركت بالمنتدى؟

عنود الغالية:
ألف شكر لك على المسابقة الرااااائعة
صراحة فكرة في القمة
دمتي لنا

شاكة بـ 3 بس راح أنتظر الإجابة علشان ما تروح فرصي:36:

[دموع الورد]

يا جماعه احد يرد على ليه صافطيني اجابتي صح ولا غلط واذ غلط لي فرصه ولا خلاص

انتظر وجايبه ترمس شاي بالنعناع ومتكيه باشوف اخرتها

هذ والجائزة ما تشجع اجل لو لكزسس وش باسوي هههههههههههه

بس اكتشفت اكتشاف خطير وهو ان العضو المجهول شجااع وبدوي ههههههههه

قصه حلوة والف الحمد لله على السلامه يا بطل وتعيش وتاخذ غيرها

بس تدري انا اشك ان الدكتورة هي البنت الي كانت عند بنده

<== ذهينه بس ما احد يقدر المواهب الفذه

[العضو المجهول]

كل الحزن
س: قبل ما تسجل وتدخل بهذا الاسم (العضو المجهول)
من متى ما دخلت وشاركت بالمنتدى؟
كل يوم ادخل بيوزري الصدزي حتى ومعي العضو المجهول ما نسيت يوزري اشارك فيه وعندي له رديف يعني هذا الثالث

[العضو المجهول]

دموع الورد
يا جماعه احد يرد على ليه صافطيني اجابتي صح ولا غلط واذ غلط لي فرصه ولا خلاص

انتظر وجايبه ترمس شاي بالنعناع ومتكيه باشوف اخرتها

هذ والجائزة ما تشجع اجل لو لكزسس وش باسوي هههههههههههه
اول شي اعلان النتيجه في اخر المسابقه وثاني شي جاوبي الين تشبعين لا يهمك احد

[دموع الورد]

اجل شكي الثاني شمالي اذ مو هو ميه بالميه

وربي شمالي عرفته شميت ريحة عطرة الي من ابو ريالين ههههههههههههه

خلاص ثبتوا على شمالي اخر مرة

بررررررب

[العضو المجهول]

<<<<<<<متطيب بالعطر اللي عطته دموع الورد
الله ياخذ شيطانك اثره بريالين وانا مبسوط ورازه على التسريحه
اجل ابرجع عطري
Yves Saint Laurent M7
وعطرك دواه الزباله حتى شغالتنا ما بغته بعذرها وانا اقول ليش ما بغته
قلت ما يطلع منها الا الزين وتاليتها ابو ريالين حسبي الله عليك زاد اقول ليش يعيروني طيب مغاسل

[عنوود]

السلام عليكم


نعتزر على التأخير


الله يعطيك العافيه العضو المجهول من جد من جد من جد الله يعطيك العافيه :D

مفرعتن الشوشه
أنا لايكثرولا تبين اقولهم ان انتي الجايزه :D <<-- الله واكبر <<-- تهدد خخخخخخخخخخخخ

العيار
وش السالفه هالحين عرفتوه ولا ............... لا

يمكن ويمكن لا :D <<-- يقالتس رديتي الحين :36:

ودامك شاكن في واحد ورا ماتقوله يمكن يطلع هو :30:


ياليل الليل قسم با الله ان مفرعتن الشوشه مهيب الجايزه :D


دموع الورد
هلا وغلا ماتدرين ترا تصير تمويهات :004:
وتراني ما ارد على الاسئله العضو المجهول هو اللي بتااااااااااااااع كوووله :0150:

[دموع الورد]

يا ويلي شكل اجابتي غلط

اقول يا العضو المجهول يا راعي الكزسس

<== اسمعي عاد يا الخبله راعي لكزسس ويصيف بباريس وعطرة من ابو رايلين هذ انتي وخشتك يا بنت الفقر

<== ما عليكم منها تتحاوش مع قرينتها

والله وان صدق حدسي انه شميل ما فيه غيرة وخصوصا بعد ما قال نوع العطر حقه ولد فلووس ااه يا القهر بس

اسمع يا ولد النعمه ترى عطري كوكو شانيل يعني مثلك عندي ذووق ههههههه


خلاص تحطمت باطلع

برب

[عنوود]

السلام عليكم


العزو المجهول

قولتها يفهمون الناس غلط وتخاف ان لي نية شينه المهم

الحين كل ها الدق الحنك ومستحيه من الناس :D الصراحه من جد هذي اصول الحيا الحقيقيه

بهوندا ما يحتاج اعطيكم وصف زود عن الهوندا هوندا وبالشفاء اكيد عرفتوا وشهم

ههههههههههههههههههههههههههههههههههه الله يرجك :D
ظهري وكتوفي ورجيلاتي تطعين ويبون يسحبوني عن خويهم
:(<<-- تأثير كلمة رجيلاتي

طيب الدكتوره حبت فواز ولا هو حب ذيك البنت ؟
من جد دراما يا العضو المجهول

ربنا يديك الصحه والعافيه على هيك اصص

كل الحزن
هلاااااااااااااااااااااااااا ومسهلا
تسلمين الله يسلمك
وترا الفكره مهيب فكرتي بس برضك مهيب شينه

دموع الورد
هلا وغلا

هذ والجائزة ما تشجع اجل لو لكزسس وش باسوي هههههههههههه
الحين انتي مع وجهتس عرفتي الجايزه يومتس تقولين انها ماتشجع :068: لو انها مفرعتن الشوشه اوكي كلامتس مضبوط :D<<<-- مفرعتن الشوشه حلووه :D بس ترا الجايزه شي ثاني صدقيني ابتل :D


بس اكتشفت اكتشاف خطير وهو ان العضو المجهول شجااع وبدوي ههههههههه

اها هنا تقصدين ان الاعضاء الثانين مهوب شجعان <<-- معقدة شوش :D

تسلمين ياذهينة الذهنااااء

العضو المجهول
عا القووووووووووووه :075:


دموع الورد

ياكثرتس يادميعه :D

العضو المجهول
احلىىىىىىىىىى تبي تعلمنا ان عطرك افسلوران :068:
س! : وين ساكن :D ولو ماتبون العطر وشغالتكم ماتبيه انطلوه علينا نعطيه جايزه :D التوفير ثم التوفير ثم التوفير :D

[admin]

العضو المفقود


ك



ك





ك





ك





ك




صح ولا غلط ياعنود


تاكد منه هالحين

وشلون اعلمكم بعدين اهم شي صح ولا غلط

[دموع الورد]

ههههههههههههههههههه الله يرجك يا المرجوجه بس تعالي وش الجائزة هاه لا يكون

امسح واربح ترى ما هنا حظ

اما من ناحية التوفير الله يا عندي افكار بس انتي امري

<== بنت جيده وذهينه يعني تنفع وين تحصلونها ذا اليومين ههههههههههه

تدرين عاد يا عنوود

<== فصخت العباة والنقاب وجابت الشاي بتدق حنك

المفروض تعلنون عن الجائزة افرضوا ان الجائزة ما عجبتني وش السواه هاه او انها من ابو رايلين وش اسوي فيها ذي

امتنع عن المشاركه لين اعرف نوع الجائزة من حقي ولا لو لا

برب

[دموع الورد]

العيار بسم الله عليك وش جالس تقول انت

يا ربيه هذ واحنا ما نعرف نوع الجائزة افرض طلعت الجائزة بعير وش بتسوي فيه هاه اقول اهجد واتمنع مثلي لين يوقلون وش الجائزة

<== صجتكم ذي وش تبي عطوها الجائزة وافتكوا منها هههههههههه

[عنوود]

:aaa0asmil

http://www.capricorn007.com/6789/flowerline.gif
النتـــــــــــــايج

العيار اخذ فرصتين وباقي فرصه
*كحيلان* خذ فرصتين وباقي فرصه

عاشق سراب قضى على فرصه الثلاثه

الإرهابي خلصت فرصه الثلاثه

سكوووووووووون قضت على فرصها الثلاثه

فروحه الحلوه خذت فرصه وباقي 2

عشق الليل قضت على فرصها الثلاثه

دخوووول لدموع الورد بفرصتين وباقي فرصه

آخر التطورات



المتواجدين على الساحه : عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن , MAZAN, *كحيلان* , الإرهابي , الزير عبيد
في هذه المره لم يدخل أحد من الاعضاء ياترى هل اكتفوا الأعضاء بهذا القدر أم أن هناك عضو منسي :016:

كما نقول دائماً
لا تعلمون هنا في العضو المجهول بما يمكنكم أن تعتقدوا يقيناً بصحته , أو تجزموا بعدم وجوده ,, كل شيء
ممكن وغير ممكن:0118: في العضو المجهول في الخمبدزه فقــــــــــــــــط :D
يمكنكم ان تشعروا با الحيره والغموض حيال شتى خياراتكم :157:

إعلان هــــــــــام
تنتهي المسابقه بإذن الله يوم الجمعه الموافق 23/3/1427
ننتظر :0380:: http://www.capricorn007.com/6789/flowerline.gif

[admin]

دموع العضو موجود بيننا هالحين
مافيه الا انا وانتي وهو



كحيلان الغبي

بس الجايزه من نصيبتس ( مفرعنه ) خخخخخخخخ حلال عليتس

بعدين اقول لكم وشلون عرفته

يالله فتح السوق

تشااوز

[*كحيلان*]

8
8
8
وش يبي ذا العوووووووووود فكوووووووووووووني من هضولة الشياب
انا اقوووووووووووووووووول العيار وان ما صار هو فهو الارهابي

[دموع الورد]

اخر كلام كحيلان

نعنبوا الغش يا زينه زياانه يريح

<== هذ وهي ذهينه ااه يا القهر بس

بانتظر يوم الجمعه بس ليه يوم الجمعه بااقي وقت يا ربيييييييه

[عنوود]

السلام عليكم
أهم شيء اسلوب الأكشن خخخخخخخخخخخخ
ماشاء الله وش ها الثقه يا العيااار :D
على العموم كل شيء بيطلع في يوم الجمعه إن شاء الله
وماخفي أعظم :D

نياهاهاهاهاهاهاهاها

[دموع الورد]

يا ربيه احترت

هو يا شمالي يا كحيلان

خلاص باموت قهر ماني قادرة مخي توقف

برب

[دموع الورد]

يامااااااااااه العضو المجهول وكحيلان متواجدين الان

اذن هو شمالي خلاص

يلعن جد التمويه الي كذ بتكبي خلاص

[العضو المجهول]

العنود
س! : وين ساكن ولو ماتبون العطر وشغالتكم ماتبيه انطلوه علينا نعطيه جايزه التوفير ثم التوفير ثم التوفير
انا ساكن بالرياض يا حبي للرياض ومن ناحية العطر يا بنت الحلال حتى راعي البلديه قال الزباله فوقه ولا خذه معه يعني كالونيا((كالونيا ولا كولينا)) حق مغاسلكم ابرك والا انهبي رسيفر من سوق سلطانه اللي عند بيتكم اشوف فيها توفير وله قيمه
قولتها يفهمون الناس غلط وتخاف ان لي نية شينه المهم

الحين كل ها الدق الحنك ومستحيه من الناس الصراحه من جد هذي اصول الحيا الحقيقيه
وش تبين ..الا راعية حيا وش تسوي طردوها السوق تبينها تقعد كذا ما لها والي شافت ذاك اللي فيه نخوه وانتخت به يعني والضرورات تبيح المحظورات

[admin]

يامااااااااااه العضو المجهول وكحيلان متواجدين الان





ريحتيني من الشرح :)


4 مرات تكررت هالشغله علشان تسذا شكيت في كحيلان :)


وللحديث بقيه

تشااوز

[@فروحه الحلوه@]

ههههههههههههههههههههههههههههه

بصراحه فله هالموضوع


بجد رهيب


فرصتي الثانيه والاخيره بما اني ساكنه بالشفا




يعني قريبه من راعي القصه




















هههههههه<<<<فيني ضحك قوي




العضو المجهول

هو الارهابي

وبسسسسسسسسسسسسسسسسسسسسس

[إم راس]

الله وش ها العلوم السنعه:075:
انا أقول ان العضو المجهول هو أنتي ولا أنا طيب ليه ولا احد فكر فيني :d

[دموع الورد]

وبعديييين بقاااااء بالخبصه ذي يا نااس مو ناقصين لحسه مخ تكفوون

اقول وش بلا شمالي مرقط والله ان صدق حدسي انه هو ما فيه غيرة ههههههههههه

برررب

[عنوود]

السلام عليكم

دموع
خخخخخخخخخخخخخخخخخخخخخخخخخخخخخخ
تسيف الحال :D

العضو المجهول
طيب معذوره أحد قال شي :D خخخ

العيار
كل شيء جايز :D الوعد الجمعه إن شاء الله

فروحه الحلوه
ههههههههههههههههههههههههه جعل ايامتس كلها فله وشي

إم راس
أحد معه ريال :D

دموع الورد

وبعديييين بقاااااء بالخبصه ذي يا نااس مو ناقصين لحسه مخ تكفوون
اقول وش بلا شمالي مرقط والله ان صدق حدسي انه هو ما فيه غيرة ههههههههههه
برررب

أقول انتي خليه يرد على الموضوع أول بعدين شكي فيه :D

[كحيلانه]

هلا وغلا بالجميع الصراحه موضوع حلو يا اخت العنود ولا يهون العضو المجهول..
بس بما ان ما لي بالمسابقات بلا والله الحظ المقرود لكن
اطاااااااااااااااااااااااااااااااااااااااااااااااا الب بتكملة قصة باريس وسلامتكم

[عشق الليل]

^
^
^

انا اشك في حليلك كحيلانه ..... :D


.

واليوم الخميس وبكره الجمعه زيييييييييييييييين

ماعاد بقى شي ... :D


بس قبل تعلنون النتيجه خلوه يكمل سالفته....:)

.
.
.

يالاااااابايوووووووووووووو

[a7la reem]

السلام

الصراحه ياخت عنود موضوعك مرررره حلوووووو


يوسع الصدرر


بس من هو العضو المجهول



ابي اعرف

[مفرعتن الشوشه]

بس قبل تعلنون النتيجه خلوه يكمل سالفته....

<<< اوافقتس الرايي :060: مابقى شي اليوم الخميس :D


بعديين انا اقول العضو المجهووول عنوود :060::068:
<<< يازينتس ساكته :D

[عنوود]

السلام عليكم

كحيلانه
كلامتس في محله برضو

عشق الليل
ومنا إلى العضو المجهول << سمعت

a7la reem

وعليكم السلام ورحمة الله وبركاته
هلا بأحلى ريم والله وغلا
عيونتس الحلوين
والله يعطيتس العفايه على المرور وكان قلتي أي توقع يمكن يصير صح عليتس :D


مفرعتن الشوشه
يمكن يصير أنا ليش لأ :D <<-- حامت تسبدي وأنا أراوغ :D
خخخخخخخخخخخخخخخخخخخخخخخ


العضو المجهول
كمل قصة باريس ياخي معجبينك ذابحيننا :D

[عنوود]

:aaa0asmil

http://www.capricorn007.com/6789/flowerline.gif
النتـــــــــــــايج

العيار اخذ فرصتين وباقي فرصه
*كحيلان* خلصت فرصه الثلاثه
عاشق سراب قضى على فرصه الثلاثه

إم راس خذت فرصتين باقي فرصه

مفرعتن الشوشه خذت فرصه وباقي ثنتين

الإرهابي خلصت فرصه الثلاثه

سكوووووووووون قضت على فرصها الثلاثه

فروحه الحلوه خذت فرصه وباقي 2

عشق الليل قضت على فرصها الثلاثه

دموع الورد خذت فرصتين وباقي فرصه

آخر التطورات




عنوود , مفرعتن الشوشه , فروحه الحلوه, عاشق سراب, ازحف لين تنحف , شمالي , المصرقعه , كل الحزن , MAZAN, *كحيلان* , الإرهابي , الزير عبيد , إم راس
14 من 1,720
والمطلوب
1 من 1,720
شدوا حيلكم :)
إعلان هــــــــــــام
سوف يتم إعلان النتيجه غداً بإذن الله
: http://www.capricorn007.com/6789/flowerline.gif

[عنوود]

.

[مفرعتن الشوشه]

.

.

:060:

[كحيلانه]

يا العضو المجهول يامال العافيه كمل قصة باريس ترى النت عندي نهاية الاسبوع وبس ودي اقراها قبل ما يصك عليه ودي اعرف وش النهاية تسوى ولا..
ياجعل لعدوينك الجدري اللي يشق ريتهم والطاعون اللي يشق بطونهم و الكسور اللي تكسر عظامهم يا جعل من يكرهك موت القهر..

<=====انتبه ترى يمكن توجه الدعوات لك

[mazan]

موضووووووع رووووعه عنووود
بس جيت متاخر

وانا اشك في

كحيلان
او
عاشق سراب

[عنوود]

السلام عليكم

مفرعتن الشوشه
ياحبي لتس أنتي اللي فاهمتني :D خخخخ

كحيلانه

ماشاء الله لسانتس يلحس اذانتس نبي نعينتس في قسم الدفاع في المنتدى هاه وش قلتي <<-- :D



MAZAN

هلا والله وغلاااااااااااااااااااا أهم شي انك جيت مابعد تخلص المسابقه
وإن شاء الله تكون محاولاتك صحيحه
والله يعطيك ألف عافيه على المرور


العضوووووووووووووو المجهوووووووووووووول تعال كمللللللل

[المصرقعة]

السلااااااااااااااااااااام عليكم هلا وغلا بحبي هلا >>>>>> لا تصدقين عاد ههههههههه >> امزح


والله عليتس فناااااااااااااتك خطيييييييييييييرة و تسلم ايدينتس على هالمسابقه الرهيييييييييييييييييبة



وانا اشك بكحيلان واقولك بعدين ليه
اوكي بيني وبينك
لا تعلمين احد
ههههههههههههههههههههه


توها تجي على اخر يوم ههههههههههههههههههههههههه

تحياتي لك
من اختتس صرقوووووووووووعه

[العضو المجهول]

اقووووووووووووووووووول عنود لا تعلنين الا عقب العشاء مباشره
ناوي اكمل القصه بس ما فضيت اكتب ولا فضيت اقعد على النت يعني اجتمعن

[العضو المجهول]

اقووووووووول يا العنود ورا ما تعلنين بعد النهائي مباشرة مهوب احسن

[المصرقعة]

وبديت اشك بالارهابي واحس انه هو

[*كحيلان*]

وين الناس ورا ما اعلنتوا بس مواعدينا الجمعه وبالاخير هملتونا..

[مفرعتن الشوشه]

الا كحيـــــلام ماودك تكمل لنا القصه :060:

[دموع الورد]

هلحين وش السالفه بديتوا مرة ثانيه ولا السه هو نفسه كحيلان

<=== دايما تخش اخر الناس

برررررب

[عنوود]

السلام عليكم
المصرقعه

يا الله حيها وتو الناس مره ثانيه إن ماجيتي بدري ابسطرتس <<-- تسمع بالاسلوب :D

العضو المجهول

إلا وين كمالة الموضوع ياكحيلان
مفرعتن

توني بقول

دموع الورد
لامابدينا بلا إشاعات :D

الله يجزا الكل خير والله يعطيكم العافيه على المشاركه
وإلى عضو مجهول جديد إن شاء الله

الموضوع مغلق

[حليب منعنع]

سؤال :

هل انت مشرف ولا عضو عادي ؟

متى سجلت بالمنتدى؟

وش اكثر منتدى تشارك فيه؟

في اي منتدى كان اخر موضوع لك ؟

انا حاس اني اعرف العضو المجهوول هههههههههههههههههههههههههههههههه


<<<<<<<<<<<<<<<<<<<<<< محشش وبقووه

هههههههههههههههههههههههههههههههههههههههههههههههههه ههههه

اذا اخترتوا عضو جديد اسالوه الاسئله هذي هههههههههههههههههههههههههههههه


عنووود يسلمووو على الموضووع