تغيير الشريك (لعبه ذكوريه أم إختراع أنثوي )...
 

بسم الله الرحمن الرحيم

السلام عليكم ورحمة الله وبركاته ...
راح أبدي موضوعي بمشهد :
عبد الرحمن : حياتي ...
مشاعل : قلبها ...
عبد الرحمن : ياعمري أنت , بس بغيتك تعرفين عني كم شغله قبل لا نتزوج ترا أنا فيني كم عيب ...
مشاعل : كل شي فيك يعجبني ...
عبد الرحمن : ياقلبي , أنا عصبي شوي ..
مشاعل : أموت بالرجال العصبي ...
عبد الرحمن : أنا فوضوي ...
مشاعل : حلاة الرجال فوضى ...
عبد الرحمن : أنا ماحب الصرف الزايد ...
مشاعل : إيه ياعمري لازم نكون مقتصدين التبذير ميب زين ...
عبد الرحمن : تراي راعي سهر ...
مشاعل : وليش في رجال مايسهر ؟؟!!
وهلم جراً هو يسرد بعيوبه وهو ياقلبي وياحياتي ( طبعاً حاولوا بعد تقلبون السيناريو بالعكس )...هذا طبعاً قبل الزواج ...
***************************


قبل الزواج كلا الطرفين من رجال وحرمه كل واحد فيهم يشوف عيوب الثاني عسل على قلبه ,وبالعكس يقولون الأختلاف يخلي الحياة أحلى ...
ويكونون راضيين ببعض مثل ماهم بدون تغير هذا بفترة الخطوبه ...
أما فترة الملكه كل واحد فيهم يحاول يصبغ للثاني الرجال يحاول قد مايقدر إنه يسوي كل الحركات والأشياء إلي تحبها البنت , والبنت ونفس الشي ,فتشوفهم ياربيييي إشحلاتهم كأنهم طيور الحب ...
نجي عاد لبعد الزواج من المعروف إن السنه السنه الأولى ع قد ماهي حلوه ع قد ماهي صعبة للجميع لأنه إنتقال كبير من حياة لحياة ثانيه جديده من كل النواحي على الطرفين ...
بـــــــــــس...بعد السنه ليش العيوب إلي كنا نشوفها عسل قبل صرنا مانتحملها ؟؟!!
وكل واحد يبي يغير الثاني ةيصير الوضع متأزم بين الطرفين كل واحد يقول للثاني أنت تبي تفرض رايك علي ...
وشد من هنا وشد من هناك لين ينفلت الحبل منهم ...
الرجال يلجأ لزوجة ثانيه والحرمه ممكن تتصرف نفس التصرف وتطلب الطلاق وتدور لها عن شريك لحياتها ع مزاجها
ومن الممكن إن الزوج هو إلي يطلب الطلاق علشان يلاقي لحياته شريكه ع مزاجه ...
ليش تطلع الأمور عن السيطره بمرحله من المراحل مو شرط في السنوات الأولى ممكن بعد ثمان , عشر سنوات أو أكثر بعد ...
ليش مايصير في تحمل وتنازل من الطرفين ؟؟!!


للبنات :هل تقبلين مستقبلاً أن تكون لك ضره؟
هل تقبلين أن تكونين زوجه ثانيه؟
وش السبب إلي يخليك تدورين زوج ثاني غير زوجك ؟

للشباب:
وش السبب الرئيسي إلي يخليك تدور غير زوجتك ؟
هل هو صحيح إن الرجل عنده فطرة حب التغيير ؟



للبنات والشباب :
هل تغيير الشريك
لعبة ذكورية أم إختراع أنثوي ؟؟!!



أتمنى ألاقي التفاعل من الجميع , وأتمنى مايكون موضوعي مكرر ...

الموضوع منزلته بمنتدى ثاني من زمان