من فتره ما جبت شي من مواقف خويي المشهور عندي بـ (راعي النيميل) .. و(النيميل) لمن لا يعرف معناها المقصود بها (الإيميل) وسبق ذكرها في موقف سابق في هذه الدونات


في أحد أيام الأسبوع الماضي .. كان فيه زميل من قسم ثاني .. مسيّر علينا يسلّم

قاعد أنا وياه سوالف .. ويطب علينا خويي ما غيره راعي النيميل زي عادته لازم يمر يشيك على الوضع .. طبعا ما نسميها لقافه منه لأن هذي طبيعته يحب يطل على الجميع ويسلم


المهم دخل وسلم على الزميل المسيّر .. وأخباركم علومكم

الزميل المسيّر جاه رساله على جواله من زملاه في القسم حقه يقولون تعال محتاجينك

قال بعد اذنكم باستخدم تلفون مكتبكم اتصل عليهم أشوف وش يبغون .. قلت خذ راحتك المكتب مكتبك بدون ما تستاذن

نط راعي النيميل ويبغى يحسس الرجال إنه راعي محل .. قال :

ياخي لا تصير رسمي انت .. خل البساط أحمدي .. ترى الوضع ( ثري ) .. قصده فري free

هو طبعا ما يعرف لغه بس يتكلم من اللي يسمعه .. ويا كثر ما يسمع غلط أو عكس

قلت وش ثري انت وخشتك؟! .. دامك ما تعرف قلينزي لا تتفلسف احتس عربي وفك عمرك .. أحسن ما تفشلنا في خلق الله !!

من الميانه طبعا ومزح بيني وبينه قلت له هالكلام موب إهانه لا سمح الله

وعشان يصرّف الموضوع .. قالي :

يا هووووه انت يا لغه .. يحق لك حركات .. عندك كمبيوتر شاشته دي اس إل <<قصده LCD >> .. وطابعتك ( اشت بي ) << ما يبيلها HP

قلت : اشت بي الله ياخذ العدو .. انت اللي يبغى لك اشت برا .. يعني شوته .. قمت طردته
قلت قم اطلع الله ياخذ ابليسك بتخرب ألسنتنا من كثر ما تعكس الكلام


قال : عارفكم تبغوني أطلع عنكم .. شكل بينكم سر ما تبغوني أعرفه !!

خلاص أخليكم تتنفسون السعداء

هههههههههههههههههه يا ويل قلبي

قلت اسمها .. الصعداااااااااااء .. يا جنط .. يقولون فلان تنفس الصعداء .. حتى العربي بتنكبنا فيه


بس ولو .. الجميع يحبونه .. ولو يغيب فقدناه وشطحاته اللي ما تخلص





ربي يسعده وكل من يسعد قلب غيره .. لو بابتسامه