الشهر عليكم مبارك مقدماً .. والله يبلغنا وياكم صيامه وقيامه .. ويعين الجميع على طاعته سبحانه


ما أدري وش في ربعنا .. كل شي لازم يحسسونك إن فيه أزمه

سمنت وحديد صاروا أزمة .. إيجارات البيوت صارت أزمة .. رز صار أزمة .. وآخرتها أزمة توت

ما نيب أمزح .. ترى السالفه جد .. وأقولكم شلون

كل رمضان لازم يطلع لنا أزمة توت


الخميس الماضي .. مدري وش لقفني وخلاني أروح أتقضى أغراض خفيفه بعد صلاة الظهر في أسواق كبيره موب قايل اسمها .. عشان ما أسوي لهم دعايه وعشان منقهر منهم

وأكيد عارفينهم .. هم حاطين عرض على التوت

تاخذ ثلاث قوارير عليها تخفيض .. وما زاد عن الثلاث كل حبه بالقيمه الأصليه يعني أعلى

وهالإعلان هو اللي سوى .. أزمة توت

المهم رحت لذا السوق على أساس أغراض بسيطه باخذها وأحاسب وأطلع .. لا لها علاقه بمقاضي رمضان ولا يحزنون

جمعت الأشياء في عربيه .. مع إنها ما تستحمل .. مفروض سله .. بس مسوي أتيكيك في التسوق << إلا عشان تدفدف العالم بعربيتك

يوم جيت أحاسب .. يا دافع البلا .. وش الصدمه .. أنواع السرا والزحمه عند الكاشيرات

المهم وأصف في ذاك السرا الطويل العريض اللي العالم والعربيات مكامخ في بعض من الضيق

ويريد الله على أخوكم .. ويقز له واحد من الكاشيرات كان مقفل وفتح .. قلت سو نفسك ذهين وإزرق قبلهم عشان تحاسب وتطلع من ذا الاختناق الآدمي

وقدامي واحد قلت له وخر شوي والا ادخل قدامي في ذا الفاضي .. راح هو قدامي


توني بأدف العربيه .. إلا زرقت قدامي شغاله لابسه نقاب .. ومحمله العربيه قوارير توت .. بتقولون وش دراك إنها شغاله .. عشان النقاب ساده جاي مسحه وحده متساوي .. يعني ما فيه خشم يدفه قدام .. والعيون صغينونات

وتقفل معي .. أدفها بذا العربيه الحين؟ .. قلت لنفسي اهجد .. وخلك اتيكيك وبرستيج وجنتل <<كلهن يالطماع>> واعمل بمبدأ .. ليديز فيرست .. يعني السيدات أولا

شوي إلا تجي عجوز ومعها شغالتها .. برضه محملين توت في عربيه وفي سله مع الشغاله .. ونفس الحكايه يزرقون قدامي .. بغيت أصيح .. بس كتمت العبره .. قلت حرمه كبيره خلها تروح

وكان فيه حرمه الله يجزاها خير .. موب كبيره مره .. يعني نصوف <<وين رطب>> ومعها بنتها الله يستر عليهن .. كانت تنتظر قبلنا .. عيالها كل واحد وحده معه سله وفيها توت

قلت تفضلوا انتم قبلنا كلنا .. قالت لا رح انت .. انا أنتظر ولدي راح يجيب أغراض .. شوي الا جا ولدها الله يخليه لها عمره في الأربع طعش تقريبا .. شايل سله فيها توت

وكانت الحرمه أخلاق معي .. وبأدب وحشمه طبعا .. لين قلت كلمه شكلها زعلتها .. وأنا ما قصدت إلا احترام لها

قلت شكرا يا خاله .. شكلها حست إني كبرتها .. مفروض أقول أختي لو تسذب

ما أدري وش مشكلة الحريم مع سالفة العمر خخخخخخخخ

المهم شكلها تضايقت .. لأن البرقع تكرمش من فوق << يعني عقدت حواجبها


وتأخرنا ذا الشغاله اللي زرقت قدامي .. لأنها مكثره قوارير التوت .. وحضرتها تبغاهم يحسبون لها بنفس سعر العرض .. وقال لها اللي يحاسب .. لا ما فيه زي كذا .. ثلاث حبات بس

قالت : استقفرو الله .. يقالها تستغفر .. ايس هادا

أما العجوز يا حليلها .. مسويه حركه .. هي تحاسب على قوارير .. ومخليه شغالتها شايله سله وتحاسب على قوارير ثانيه .. يوم زاد عندها قاروره أخذها المحاسب وحطها تحت جنبه
وتروح العجوز وهو لاهي في الحساب وتدور من ورا المكينه وتاخذ القاروره وترجعها قالت احسب ذي عساك الصلاح

قايلكم .. أزمة تووووووت

عاد أنا من التعب في انتظار الحساب .. قسم بالله يمكن ساعه الا ربع تقريبا على ما حاسبت .. يوم جا دوري تعطلت مكينة الدراهم .. شكلها قامت تثاغي من كثر الفلوس

وتعقدت من التوت وقتها .. وجتني غفوة مدري حلم يقظه .. وتخيلت كل الناس اللي حولي مزدحمين في السوق.. كل واحد منهم ماسك قارورة توت ويشرب .. ومن كثر ما قحنوا توتت .. صاروا يقوطرون دم .. وخدودهم تنز من الحمـَار (بفتح الحاء والميم) والعافيه


المهم ضفيت غريضاتي <<تأثر بالعجوز>> وهزأت نفسي عشاني جبتني ذا الحزه .. لدرجة إني صرت أعاني من كوابيس بالتوت


المشكله .. ما شفت أحد متقضي تطلي << يعزه بقوه



السالفه صارت لي صدز والله .. موب أرنب وإلا تأليف





لكل من توقف هنا باقة من الود والورد