الموضوع
:
صفحتي .. ثرثرة وضحكة وهمسة !!
عرض مشاركة واحدة
20-10-2009, 02:29 AM
المشاركة
143
عضو له مكانه في قلوبنا
تاريخ الإنضمام :
Apr 2002
رقم العضوية :
127
المشاركات:
6,276
الأخ مخنزر ..؟!!
يالله حيهم
من زمان عن السوالف والهذره
<< يعني ناوي تمسك خط
كلنا عايشين هالأيام حالة الاستـنفار اللي صايره عشان إنفلونزا الخنازير .. الله يكفينا وياكم الشر
بس المشكله .. الدعوى قلبت وسوسه عند أغلب العالم .. يعني ما يمدي الواحد يعطس إلا شكوا فيه
على طول يصمخونك بالسؤال إياه :
الأخ مخنزر؟!
تفاولوا خير يالربع .. لا والله بس عطسه جت تمشي ألف .. وخبركم جونا وش حلوه .. غبار فطبيعي الحساسيه !!
برضه يستمرون يطالعونك يعين .. ويقولون :
بس ولو .. رح اكشف!!
مشكله والله .. إذا كل من عطس وإلا كح راح يكشف .. كلنا بنتجمع في المراكز الصحيه والمستشفيات .. الله يستر
ومره نسولف مع الزملاء .. ويتكلمون عن اللي أصيبوا واللي يعرف أحد مصاب والا شي .. فسألوني :
تعرف أحد عنده فنزا ونزا؟!
قلت لا .. بس أعرف واحد عنده كامري
<< أم الشطحه
أثر فنزا ونزا .. يقالهم اختصار لأنفلونزا الخنازير .. الله يستر منها
ذاك اليوم واحد دوب صدز .. يعني جثه .. معه كحه ناشفه <<عادي رشوا عليها مويه تلين
>> .. المهم وهو يسولف علينا .. ويقبع بذيك الكحه الميكسد .. يعني مختلطه
.. كحه مع شرقه مع تفحيط في الصدر
من الخوف .. تفرقنا بسرعه .. انحشنا
.. شفنا خنازير صغار طالعه تركض من حلقه <<أرنب>> موب رذاذ عطاس
ثاني .. مسكين عنده اللحميه لاعبه لعبتها .. ويجيه زكام قبل كم يوم .. وصار خشمه كنه كورة بلياردو حمراء من الاحتقان
عاد دوروا أحد يقرب بجنبه .. والا يسلم عليه
نفس الشي .. يسألونه :
لا تكون مخنزر؟!
يرد :
لا والله ياخوان .. بس مزكب
خخخخخخخخخ .. قصده مزكم
قايلين لكم الخشم مصمت
.. عشان كذا منلغي حرف الميم عنده .. وصايره الباء كثيره عنده
يجي يقول :
شلونكب؟ .. أخباركب؟!
... يعني وشلونكم وأخباركم
عاد نتريق نقول :
الحبد لله .. تباب التباب (تمام التمام)
بس ذا الخنزره .. اللي هي الـ (H1N1) أو الاتش واحد إن واحد .. زي ما يتفلسف واحد من الكباتن الربع على باله يتكلم بلغتين إذا اخترع أم الكلمه وقالها تسذا
تخوف بسبب الأشياء اللي يقولون مفروض نسويها عشان الوقايه
أهم شي إن الواحد دايم يغسل يده
طيب واللي غاسل يده من العالم كلهم؟!
<< طلع برا الموضوع رجعووووه
وانتشر ذا الأيام حركه بين كثيرين .. كل واحد شايل في جيبه جل مدري معقم .. كل ما لمس شي أو أحد قام يتدهن به
وأنا قريت موضوع يقولون فيه إن ذا الجل سريع الاشتعال .. حتى فيه واحد مدخن يستخدم ذا المادة يوم جا يولع مره بغى يشب في شنبه خخخخخخخ << برااا بلا شطحات
لا عاد صدز .. والله قريت إنه سريع الاشتعال فانتبهوا
بعدين تعالوا .. عندنا ناس .. مستحيل ينفع معهم التعقيم .. لو أيش !!
يعني أنا وش يدريني .. يا غافلين لكم الله .. مثلا بأجي أسلم على واحد .. توه وانتم بكرامه حافر خشمه بإصبعه السبابه لين وصل مخه ومطلعه وماسحه في الشماغ .. وش عرفني
وفيه ناس عليهم أصابع .. ما شا الله .. الواحد تسنه جزره
وموب أي جزر .. من ذاك الجزر المستورد الكبار .. اللي لو نخبط بالوحده على جبهة أحد غفل (إصفر .. يعني أغمي عليه) من قوتها
أذكر واحد من طول أصابعه .. ما يلعب بلياردو بعصا خخخخخخخخ .. يكتفي بأصابعه << آااااوووت
والا أجي أسلم على واحد توه عاطس في يديه .. وشلون أدري .. وبعضهم إذا جا يعطس غمض بقوة أمه وأبوه وحط يديه على خشته .. وصقع بذيك العطسه اللي تسنها فحطة سياره
وإذا وخر يديه عن خشته .. لينها مليانه سعابيل .. تسنه أحد بيكوي ملابس موب عاطس .. من قوة البخاخات عنده والطرطشه
طيب زي هالاشكال .. وشلون الوقايه منهم .. وكيف أتعامل معهم وأنا ما أدري عن وش كانوا يسوون قبل أشوفهم
وإلا ذا الكمامات الحين .. يقالكم إذا غطوا بها الخشش .. إنها بترد الفيروس !!
انتم شوفوا الأشكال بس .. تفطسون من الضحك .. وطبعا شكل الكمام يحدده نوع الخشم
تلقون كمام منفرش .. على طول تدرون اللي لابسه أفطس الخشم .. سوا سوا سقـّاله (شغاله)
واللي كمامه ماد بوزه .. هذا يعني خشمه تسنه نقار الخشب من طوله
وإن كان الكمام وش حليله وملموم .. فهو خشيم ليدي
<< براااااااااا
عاد الفيروس شوفوا وين بيروح من ذا الثلاثه .. طبعا أول اثنين .. بينحاش عنهم .. عشان قوة دفع الهواء عندهم كبيره .. وفي الزهيق مدري الشهيق والزفير .. يشفطون أم اللي ما ينشفط
فطبيعي إنه يروح لخشيم ذيك المسيكينه << بيخلي الحريم يوسوسون زود
ولو جا تطعيم .. لا تطعمون لين تتأكدون .. والله الحافظ
على طاري التطعيم .. والله أمس كنت تعبان من فولنزا صدزيه .. بس أشوى موب مخنز
بعدين بأقولكم عن سالفة .. الدريل .. قصدي الإبره
دمتم طيبين .. ومبتسمين
™ تشاوو .. يرحمكم الله
رد مع الإقتباس