الموضوع
:
صفحتي .. ثرثرة وضحكة وهمسة !!
عرض مشاركة واحدة
24-08-2010, 10:26 PM
المشاركة
230
عضو له مكانه في قلوبنا
تاريخ الإنضمام :
Apr 2002
رقم العضوية :
127
المشاركات:
6,276
أنا وبرنامج ( منتديات ) .. !!
الأحد 5 رمضان 1431هـ
المناسبة :
برنامج ( منتديات ) تقديم المذيع الراقي / تركي سليمان .. يسلط الضوء على منتديات الأماكن
سعد
.. يجي يستقعد قدام شاشة التلفاز .. فاغراً فاه .. كونه بزكوباً
.. يعني مفلوز .. وتفاجأ إنه يشوف الأماكن على الهواء
يبدأ المقدم باستعراض بعض صفحات ومواضيع المنتدى بشكل عشوائي .. لكنها تبقى
الأماكن
الجميلة
اتصال من الأخ
شمالي
أبو يزيد .. يستقعد
سعد
عشان يركز في كلام المدير الأطخم
ويدور حوار راقي بين المذيع وشمالي .. ويتكلم بإسهاب وبمعلومات عن المنتدى والمشاكل اللي واجهته وإجابات وافيه وذكر بعض الأشخاص اللي لهم دور في تطور الأماكن
وكانت بعض المعلومات جديده علينا والإجابات يمكن أشفت غليل البعض وردت على تساؤلاتهم في بعض الجوانب
ويتحمس سعد أكثر مع البرنامج وينشد من ثوبه ودمجته وكل شي
ينتهي شمالي .. ويجي اتصال من الأخت الراقيه هي الأخرى سوزان .. قصدي
شيزون
وفعلا كانت من خيرة من يمثل أخواتنا في المنتدى خصوصاً والعنصر النسائي بشكل عام
هدوء وثقه وردود متزنه وإجابات مباشره في حدود المعلومات اللي عندها عن بعض الأشياء
لكن غصب عني ضحكت عليها في بعض الأشياء اللي جت منها عفويه
هو أصلا يوم قدمها على انها سوزان .. قلت في نفسي وش ذا الاسم؟
.. تو شمالي جايب اسمها ويغلطون فيه !!
أكيد انه يقصد أختنا
شيزون
المهم وأسمع حوارها مع المذيع .. وضحكت يوم غلطت وقالت الاستاذ عبدالرحمن الفطين .. وهي قصدها الطفيل طبعا
قلت في نفسي وش فيتس وأنا أخوتس اختبصتي .. تو شمالي قايله قبل شوي .. أمداتس تنسين؟!
<< من الربشه
ويوم حجر لها المذيع .. وسألهاوش تسوون لو أحد دخل بيوزر نسائي للأقسام النسائيه وهو رجال؟
قالت : كل واحد وذمته !
هههههههههههههههه الله يسعدتس .. ندري إن كل واحد وذمته .. بس فيه ناس ذمتهم وسيعه .. وبعضهم مشقوقه
استغفر الله
ويستلج سعد أكثر .. وتبدا يديه تاكله إلا يدق عليهم
.. هذي الأماكن .. تسن ذا الاسم حرك شي بداخلي
ولا إرادياً .. من الاختراشه .. قمت أدقدق عليهم ويعطي مشغول
.. وأقول يا ربي وش ذا الزحمه على الخط ما لنا حظ
ومواصل أعيد الرقم .. ومتى مسك؟
يوم خلص الأخ اللي اسمه ابو باسل خخخخخخخخخخخخخ
من الفهاوه أثاريني قاعد أدق عليهم والرجال يكلمهم .. الله لا يبلانا بس
وعلى بالي زحمة اتصالات
مدري وش قردني ذاك اليوم اتصل .. وإلا وقتها أنا مزكوم والصوت رايح والخشم مقفل والأذاني متسدده يالله أسمع لين أحد زعق عليّ
ويوم مسك الخط .. ويرد الكنترول .. شكله مصري
قال مين معايه؟
وأرتبش .. حسيته صعيدي عند ترعه يقول ميييييين هنااااااااااااااااك؟
بغيت أسكر الخط على بالي غلطان ومتصل على شقة مصاريه
قلت برنامج منتديات؟
قال : أيوه؟
قلت ممكن أكلم الأخ تركي؟
قال : مين انته؟
قلت معك سعد عضو في الأماكن !!
قال لحظه .. ويبعد صوته .. تسنه ينادي المذيع من بعيد يقول سعد مدري ايش
الا يلخمني المذيع الله يهديه .. ويقول معنا اتصال الأخ سعد
هو قالها .. حسيت إنه يعلم عليّ موب يقدمني خخخخخخخ
المشكله فيه صدى في الصوت يعني لين حتسيت ما يسمعني الا بعد شوي .. وهو صوته يالله أسمعه
وفيه ناس توقعوا مرتب للاتصال .. لكن وربي كان جاي تسذا .. كل شي ارتجالي وبدون ترتيب أو تخطيط
صح إني مسكت خط في بعض الاشياء .. لكن كل شي الحمد لله جا طبيعي << وين ولاده؟
بس والله ابن الحلال المذيع الله يوفقه .. التحاور معه كان مريح وراحت الرهبه .. مع انه أول اتصال بأي برنامج قسم بالله
والا أخوكم والله لا هو راعي برامج ولا اتصالات .. بس كله من الأماكن .. احساسي إن لها حق على سعد خلاني أتحمس أتصل
المذيع بغيت أحجر له .. يوم سألني عن اسمي وقلت الرجه .. وضحك
بغيت أقول اعترف انت مشارك معنا في الاماكن؟
الصراحه كان ودي أوجه رسايل لبعض الأخوه والأخوات الغايبين من زمان
وكذلك ناس زي أختنا
أم فهد
وبقية الطاقم الاداري
والناس المميزين بأقلامهم .. والأقلام الواعده .. وتسذا
لكن الوقت .. وكل شوي ماسكين خط في جهه .. عشان تسذا ما أمداني أذكر أحد غير الثنائي المدهش
طبعا لأني بديت وهم فيه ولازالوا ما شاء الله تبارك الله .. الله يعطيهم طول العمر .. ويستحقون بدون قصور في الباقين
وبغيت أذب على أختنا
شيزون
على الهواء .. بس خفت تزعل
قلت الأخت شيزون مدري سوزان .. وبغيت أكعها وأقول سوزان مبارك والا سوزان تميم
<<< اااوووووووووووت
أما تشبيه الأماكن بالاستراحه والأكلات خخخخخخخخخخ .. مدري وش يبي ذا التشبيه
وقتها من الزكمه ما أفطرت زين .. وكنت جايع .. وجا ذا التشبيه على بالي
والأكيد إن الأماكن سوت دعايه للبرنامج .. زي ما البرنامج سلط الضوء على الأماكن
يعني خدمه مشتركه
أشين شي .. إني سمعت صوتي بعدها .. وتصدقون إني ارتعت مني
صرت أتعزز للي يسمعوني كل يوم
هذي كانت هذره ملخصه لما تم .. وإن ذكرت شي رجعت لكم
™ تشاوو .. يرحمكم الله
رد مع الإقتباس