منتديات الأماكن - عرض مشاركة واحدة

15-06-2011, 01:51 PM

المشاركة 9

زائره

Guest



رد: كان ياما كان . . !

. . .

يعطيك العافيه العطشان على الطرح الجميل
كالعاده مميز .. انا في الواقع ماعندي تعليق كثير
لكن وصلني برودكاست يتكلم عن نفس موضوعك
لكن من زاويه ثانيه .. يقول :

( عزيزاتي حريم أول :
ترى جننتونا وجبتوا لنا الضغط ... قال إيش
قال حنا من أول نشتغل شغل ماتسوّون ربعه
ولاعندنا خدامات .. ونطبخ ذبايح حامين غدا وعشا
ونربي عيالنا ولاشكينا .. وصابرين عالشقا !
ولا انتوا ماعليكم مرتاحين ومتدلعين !

أقول الله يعطيكم العافيه ترى فقعتوا مرارتنا مع كامل احترامنا

أي راحه اللي تتكلمون عنها ... والله انتوا اللي كنتوا مرتاحين
من أول لاجاكم الضيف أقصاها دله قهوه وباديه تمر ويخب عليه
وقطّت الوحده ذبيحتها في القدر وتكّت لين ينطبخ
بعدين كبّته في الصحن ودفّته لضيفانها !
يعني لاتمدون سفرة حلى وموالح مع القهوه والشاي
ولا تمدون سفره ثانيه من أنواع الأطباق المعقده مع العشا !!
وبيتكم كله غرفتين وحوش وإذا الوحده ذبحت نفسها بالتنظيف
قشّته بالعسو ! وإحنا الوحده تهلك وماتلحق وهي تمسح أرضيات
وأثاث وتحف وجدران ودرايش وحمامات ومطبخ وغسيل حوش
وكوي ملابس وطبخ وغيره ! ويمكن تكون فوق هذا طالبه ولا موظفه !
وتبونا مانجيب خدامات !!
البزارين داجّين بالشوارع مره وحده في الأسبوع تروشه وتغيّر له
ويمكن يمر اسبوعين او ثلاثه والوساخه ميبسته !
ولا عنده دراسه ولا امتحانات .. وحتى لو عنده ماذاكرت له أصلآ !
مو احنا لو ينزل مستواه لأي سبب أو يوم يلاقونه مو نظيف أو يمرض
حطوا على أمه وطلعوها ماعندها أمومه ولاعرفت تربي ومهمله !!
حريم أول مايعرفون حمام مغربي ولاسشوار وسنفره ولا عنايه بالبشره
ولاتنسيق ملابس ..!! حدّها ترش جسمها بشوية ماي ولبست الدراعه
ودقت الكحله ورشرشت عمرها بريدفور ولا ابو طيرين !!
والرجال مافرقت معاه مايعرف شي وماشاف غيرها !
مو اللحين كل ماشاف وحده في التلفزيون قال ابيك مثلها وياليت عاجبه
ولا مالي عينه عسى عينه البط !!
والله حياتكم كانت أحلى وأريح ببساطتها )

عاد انا قريت المسج هذا على أمي .. قالت :

( اقول انتي وياها ... يالله بس .. أكلكم كله مطاعم وبوفيات
والخدم يسوون كل شي .. وانتوا بس تمدون يدكم على السفره
احنا من صباح الله خير نغسل ملابسنا في الطشت تحت الشمس
خلّي وحده منكم تغسّل بيدها ... حتى سراويلكم ماتغسلون !
خلّي وحده تروح المستشفى مشي وماسكه بزر في يدها والباقي وراها )

وانا رايي ان كل زمن كان متعب من جهه
وعادات أول لايمكن انها تّتطبق اللحين !
الزمن فرض علينا كذا ... طلعاتهم اول مع الجيران خفّافي
اللحين طلعة العيله الوحده ثقيله مع مصاريفها والبزوره
ولا قبل حدهم ترمس ماي ياخذون معهم!

عوافي بوعبدالله ... والسموحه طلعت
من الموضوع شوي ... ويمكن ماعطيته حقه
من الجوانب اللي انت أشرت لها ...
ربي يوفقك

رد مع الإقتباس