على ذكرى
المواجع والحل والترحال
..........طويت آخر ورق عندي في دفتر أحزاني
طويته وانكسر قلبي وصوته بالمواجع سال
.......... ودريت ان الظلام اللي تحت كف السهر جاني
جلست اجمع مسافاتي واغني للسفر موال
..........على صفحه من الماضي بها حلمي وعنواني
بها كم سافرت عيني ليالي والظلام أهوال
..........وبها كم سافرت روحي وأنا بالليل وحداني
حبيبي كل ما أشوفك تجي بالذاكره تختال
..........نهر من فايض الذكرى يجي من داخل أشجاني
تخيل يوم عانقني خيالك خاطري وش قال
..........تخيل قبل أسولفلك نشدني عنك وجداني
نشدني لين خلاني مدينه هزها زلزال
..........تخيل ماهدا حتى لقاك بوسط شرياني
أروح لسدرة الموعد معاي لموعدك مرسال
..........وأخاف انك تجي قبلي وترحل قبل تلقاني
هنا كانت ليالينا غلا والمقبلات آمال
..........وهنا كانت مواعيدك مطر تخضر به أغصاني
هنا شف باقي آثارك على رمل الوعد مازال
..........وهنا شف دمعه طاحت من عيونك على شاني
حبيبي لاتنشدني عن أوضاعي وكيف الحال
.......... أنا بعدك سحاب أبيض اضم الريح بأحضاني
تسافر بي الذكرى وأحسب اني وصلت آخر وطن بالبال
..........وآثرني ماوصلت إلا بداية درب حرماني
وتبقى سيرة الذكرى قصيده تكتب الرحال
..........سواليف للعيون للي صداها دمعة أحزاني