الموضوع: أيتها البنت العفيفة ..هل ترغبين بهذا الحب؟؟!!
عرض مشاركة واحدة
قديم 29-11-2007, 04:07 AM
المشاركة 26
الصورة الرمزية آآآسر القلووب
آآآسر القلووب
عضو يفوق الوصف
  • غير متواجد
اقتباس المشاركة الأصلية كتبت بواسطة صـدى الوجدان
عسى رمضان ينعاد عليك وأنت بصحة وسلامه
أولاً ..
أحب أعتذر على عدم ردي على موضوعك قبل الآن
وثانياً ..
( الدنيا ما زالت بخير ) وأكبر دليل وجودك ووجود أمثالك
مع أنكم قله قليله ونادره ( لكن الندرة لا تلغي الوجود )

فيه عباره أنت كتبتها في موضوعك لفتت نظري كثير
وهي ( الفتاه الضحيه ) ......!!!!!

بما أنك وصفت عالم الشباب .. سأتكفل أنا بوصف الضفه الأخرى من العالم
عالم ( الجنس الناعم ) أو بالعاميه عالم البنات
صــــــــــــدقني ..
بهذا الوقت ما فيه بنت ضحيه .. ماعاد عالم الشباب مجهول بالنسبه لنا مثل أول
مغامرات الحب ( الكاذب ) صارت مجرد مغامره
وعلى فكره حتى عند البنات
الوحده تخرج معه بكامل إرادتها ..... وتقولي ( ضحية ) !!!!تلبس أحلى ملابسها .. وتقابله بكامل زينتها .... وتقولي ( ضحية ) !!!كل بنت تعرف وش رح يصير في نهاية المطاف
كل بنت تعرف أدق تفاصيل نهاية الطريق ..
بس تعرف وين المشكلة .. هي عدم وعيهم لوجود المشكله
والمشكله الحقيقيه .. هي بحثهم عن المغامره
في وحــــــــــل المجهول ..
يبدونها ... بمكالمه و شوي شوي يتراسلون صور وشوي شوي
يتقابلون .. ببساطه هذا كل إلي يصير
كلهم ينظرون لبعض بنظره ( حيـــــــــــــــــوانية ) .. وأنا آآسفه على اللفظ
الشاب ...
ينظر للبنت على أنها فريسه يجب أصتيادها كلما سنحت له الفرصه
والبنت ...
تنظر لشاب على أنه ملكية خاصه .. لا يسمح بالأقتراب منه
وإذا سألت الوحده فيهم .. أنتي ما تخافي على نفسك ؟؟؟؟
ترد بكل جرأه ( ياشيخه لا تكوني معقده !!! خلينا نستانس ونعيش حياتنا )
بالله عليك ( هذي ضحيه !!! )
تسمع من صحباتها مغامراتهم مع الشباب .. وتفكر بالتجربه
هنا يكمن الخلل ( التقليد )
( يعني فلانه أحسن مني .. رح أتعرف على شاب أحلى من خويها )
ويبدأ الموضوع تحدي بينهم .. ومثل ما قلت ( تقليد )
طبعا بدون التفكير في العواقب ..
و إبليس يعمل دائما بإخلاص متناهي .. يزين في عيونها الموضوع
ويطلع لها مية طريقه وطريقه .. وصديقات السوء ( ماشاء الله عليهم ما يقصرون )وأزيدك من الشهر بيت .. مثل مايقولون
صاروا يطلعون مع بعض ( يعني شلل ) تخرج وتاخذ معها كل صديقاتها
وطبعا خويها في المقابل .. يجيب بدوره كل أصحابه ..
ولي ما تعرف تتعرف !!!يمكن ما تصدق لو أقولك ...
بنت متخلفه وفيها نقص .. ويمكن بعد يقولوا عنها ( شاذه ) الي ماتعرف شباب
( معقوله .. أنت ماعدك حبيب !!! .. ياااااااااالله مقده أنتي حيييل )
بعنى .. صار الموضوع دارج بشكل غريب .. والصح صار نادر ومستغرب
أذكر مره وحده من البنات قالت لي :
نص بنات السعوديه يعرفوا شباب .. ورديت عليها بالحرف
أنا من النص الثاني إلي ما يشرفه يتعرف على أمثال أخوياك

ماصار واحد .. عدد لا يحصى من الشباب
ومثل ما يتضاهون الشباب بكثرة أرقام البنات في جوالاتهم
البنات صاروا يسون نفس الشيء
وتقولي ( ضحايا !!!!!!!! ) ..
بس معظمهم يتناسون .. أن لطريـــــــــق نهاية مهما طال بهم

وبعدين .. ما على الرسول إلا البلاغ ..أحنا علينا نوجهم ونحاول نخاطبهم بلغة العقل والقلب
لأن لغة النصائح ما تنفع ... صدقني ماعاد لها فايده
وكل وحده ( عقلها براسها ) ..
الحلال بين والحرام بين .. والي ودها تضيع نفسها ( عســــــــــــاها )

والأخوان والأخوات إلي ردوا قبلي ... ناقشوا بقيت جوانب موضوعك
عشان كذا ..
ما ودي أكرر نفس الكلام

ومثل ما قلتلك ..
( تعاد دائما الحكايه منذ البداية )

من كل قلبي ...
أشكــــــــــــــــــــــــرك على إهتمامك وحرصك على بنات المسلمين عامه
وبنات مجتمعك خاصه ..
لك كل تقديري وإحترامي ..


الله يسلمك اختي صدى ويحفظك ان شاء الله من بنات وعيال الحرام

وفعلا صادقه مااحد اتوقع اللحين مايعرف وش اللي راح يصير ,وانا اعرف ان فيه بنات فاسدات وعلاقاتهم اكثر من علاقات الشباب وفاهم ومريت بحياتي بنكرات مثل هذول ,,,

وبصراحه انا اترفع اني اخاطب مثل هذا النوع من البنات ,,لاني مقامي ومقام أمثالك أكبر من النزول لمستواهم المنحط,,,واللي يكون في الوحل ..محد بيقرب صوبه لانه نجس ..

وبالنسبة لقولك ان البنت اللي ماتعرف شباب يقولون لها شاذه >>>تري حتى عند الشباب نفس الشيء >> والله يديم على هذا النوع شذوذه عن هذا الانحطاط الحيواني الشهواني الموجود حاليا ..

وبعدين اللي يقول نمتع نفسنا ؟؟؟ كم سنه تتمتع ..اذا صارت بقبرها لوحدها ..ساعتها تلاق المتعه اكثر ..>>>وهو مثلها طبعا

وبالنسبة لكلمة >>الضحايا>>> طبعا مو البنات هذول حقات الطلعات والخرجات وفاقدات الشرف نقول ضحايا >>>والله محد غصبها تفقد شرفها واللي باعت نفسها برضاها ...هذا شيء يخصها ولا لنا دخل فيها >>>واليوم عمل وبكره حساب ...

الضحيه ان بنت تنخدع بحب شاب قبل ماتسمع اي توعيه من اي احد وكانت تتمناه زوج وغدر بها انه تركها او طلب منها مقابله او غيرها ورفظت وتركته وهي حافظه شرفها ودينها ...وغيرها اعتبرها بغيه (عذرا على اللفظ).


بصراحه سردتي نقاط مهمه في العالم اللي اجهله وزين اني عرفته من انسانه عفيفه مثلك
وان شاء الله اني بينت العالم اللي تجهلونه >>>وبعدها لكل شخص حرية الاختيار .

مانغصب احد على اي امر لكن >>>>نبين الصح والغلط >>وهو يختار .
وبعد اليوم ماني بتحسف على هذي الامور اللي تصير على الاقل عرفت ان البنت الشريفه تعرف الصح >>وان كل البنات اللي اسمع عنهم واصادفهم بمواقف كثيره انهم بايعات لعزتهم وكرامتهم ومقتنعات بالذل اللي هم فيه >>>

والله يحمينا ويثبتنا على كل حق ويبعدنا عن كل شر ويرد كيد كل منهم في ذا الطريق في نحورهم

ربنا لا تؤاخذنا بما فعل السفهاء منا ,,

دمتي أختي صدى الوجدان بوعيك وبأخلاقك وألتزامك بدينك ,,والله يكثر من امثالك

أخوك

آآآسر القلووب




.

وإن أختلفت المعرفات !!! لكني وجدت الاماكن لازالت مميزه

مزيدا ُ من التطور والابداع