العلاقه بين كحيلان واليسا
دقت الساعة..الساعة تشير عقاربها إلى الرابعة صباحاً..الهدوء مخيم بالرياض..
<========= مخيم ولا منوخ اقول احتس عربي لاصفقك((وجه معصب))
ابشر ولا تزعل حتى انا احس ان غالوقة الثوب خانقتني و الصروال الطويل وربدزته لاعبين بحسبتي ما خذت راحتي..
<<<<< قاعد يفصخ ثوبه وصرواله الطويل وخلى المقوصر والعلاق
<<<<< هالحين يتلوبس القميص وفي رواية ثوب النوم وقال محماس ثوب البيت
ايه يا شيخ كذا اريح..اقول دام الدعوه تسذا ترا ابخربط فشوري عليكم يا اهل الـdial up افصلوا اتصالكم((وجه يتعزز لكم)) اما حنا يا اهل الـdsl خذوا راحتكم((وجه دالع لسانه))..
ايه اقولكم ليلة جمعه طلعت تالي الليل من استراحة ربعي وقلت خل اخذ لي لفه على شارع الحوامل قبل ما اروح للبيت كذا انزل همومي وافرغ شحنات عواطفي واحاسيسي بذا الليل والمسجل يصدح باغنية صوتك يناديني وما دريت الا حمر عطر واقف يمد يده لي مبنشر يبيني افزع له وانا اللي اصفط عنده واجيه واشر له بيدي كاني اكرب على لمبة بيوت طين الصفرا اقصد فيها وش بغيت وهو اللي يشر لي على كفره والقاه مبنشر وانا اللي اومي له بيدي كاني اشغل سيارة هتلر بحديدة هندل يعني معك عفريته وهو اللي يومي براسه يقول ايه وهو اللي يجيبها وينزل الاستبنه وازين له بنشره وقبل ما امشي قال لي كلمه ما دريت وش معناها اللي هي good job k7ailan thanxxx a lot المهم انا فهيت((وجه فاق خشته)) بس دريت انه يمدح قلت ما عليك زود واحتياطاً كل تبن ان تسانك تسب يا حمر عطر..
المهم وانا اللي ازهم على عزوز ولد خالي على طول هو مستشارنا بالاندليزي ايه هو متمدن ورايح دارس ببريطانيا في واشنطن المهم انه يعرف يحتسي اندلينزي وقلت له وش قال الحمر وقلت ترجملي بالله قال يقولك شغلك سنع يا تسحيلان ومشكور..
وانا اللي تلخبط ملامح وجهي قلت وش دراه بكحيلان ذا الحمر اخبرهم ما عندهم الا تباً لك و سحقاً و اذهب الى الجحيم بالافلام ما شاء الله وش ذا التطور المهم نسيت الموضوع ويوم حطيت راسي على الوساده الساعه 6 ومركد ساعة الجوال لصلاة الجمعه والوساوس توديني وتجيب تقول يا رجال الارهابي كاب سطلك مفضح بك ما خلى احد الا خر له شخابيطك بخبزة والاماكن وانا ارد على نفسي اقول اها بس ارقد..
وكل ما جيت اغمض يجيني نفس الهوجاس اقول اكيد ان الارهابي كاب سطلي ومعلم اني كحيلان وعلى هالحال الين قومت الجوال انا لاني ما نمت واروح للجامع اللي بحارة الارهابي المهم ابي اصلي بمسجدهم اظاهر اللي مزين مسجدهم مزين قبل بيت شيوخ لان كله ملاحق من هنا ملحق ومن هناك بيت شعر المهم ادخل للمصلى الاساسي والاه مليان قلت مالي الا الملحق وانا طالع طب في وجهي خمس ملاحق كل شوي طاب ملحق في خشتي كانك في بيت جيزاني كل شوي طاب لك ورع في خشتك المهم وكل ذا الخمسه مليانه واروح لاطرف ملحق واشوى لقيت لي محل تحت كرسي شايب المهم وحنا بنص الصلاة انقطع صوت المكرفون ولا عاد نسمع حس الامام وحنا كل واحد يمسك خط لحاله المهم قضينا صلاتنا ما بعد قضى المصلى الاساسي ترا حركه تفك ازمة الزحمه طلعنا على دفعات من المواقف المهم والقط عمري لبيت الارهابي واطق الجرس وترد علي شغالتهم قلت فلان موجود قالت لا ما فيه موزود هو روح صلاة من فيه كلام قلت قولي له فلان قالت ايوا هزا فلان هو سيم سيم كهيلان في هزا كبزة..
وانا اللي تسني مصطور براشدي يلعن شايطينها وشلون درت بنت سوهارتو عني اكيد وجهان كاب سطلي وانا القط عمري واذلف لبيتنا وانا شايل عليه قلت دام يوزري كب سطله وهو ماله معنى اجل وشلون علومي اللي اخصه فيها وانا اللي تجيني ام الهكي وتقفل معي واروح ارقد..
<============عسى ما تكلفت
اقول انثبر تراها قافله معي ابعد عني لاقبرك في محلك============>
<=========== جرب حظك
وشوله الهمجيه الله يسامحك بس(( وجه يتراعد))=============>
أقولكم يوم رقدت وقمت وانا ما عاد ادري وين اذلف له قلت مالي الا استراحة الشباب خلني اغير جو وانسى الموضوع المهم وانا اللي اطب عليهم واثر ما فيها الا دحيم ولد عمي وعزوز ولد خالي قاعدين بالدكه يسولفون عن الزواج وما الزواج ومشغلين مباراة البرازيل وسدوس وانا اللي اطب عليهم قلت هذا اللي ابيه مباراة البرازيل وسدوس وهالسوالف هي اللي بتنسيني صدز وجهان((وجهان=الارهابي)) وعلومه..
المهم ولقيتهم يتبادلون ثقافاتهم في التعامل مع الحريم ويقول عزوز الواحد المفروض يصير كل يوم عسل مع مرته ولازم يسوي كسر روتين لحياتهم الزوجيه والحرمه قد ما تعطيها حب تعطيك (( ما قلت لكم متمدن))
ويرد عليه دحيم يقول المره ما لها الا عردز يسوط ظهرها((في هذي اللحظه دحيم يومي بعردز)) الين تمشي معك صح بلا حب بلا هم الرجال رجال (( ما قلت لكم عزوز متمدن)) المهم قالوا وانت يا كحيلان وش رايك قلت يا ابن الحلال انا اشوف شغل عزوز صح
وهو اللي يخزني دحيم بعينه ويتنهوصني ويومي بعردزه يمي قلت بس دحيم اصح (( وجه يتراعد))
المهم مشى دحيم يقول الشرهه علي اللي قاعد مع خكاريه اجل بتدلعون حريمكم الله يرحم رجاجيل اول شاكمين حريمهم يجي للبيت ويلقى كلش و المره تمشي له على النيه اذا اشتهى الرجال مويه نقزت الحرمه وجابت الغضاره مزبوره مويه واذا بغى المره لقاها حاله صروال خط البلده وفاكه ربدزته لان ما احد معه رقم السري حق الربدزه الا هي ولا ضرهن شي ازين من دلوعات ذا الوقت اخلاق وسنع وطبخ ونفخ بالبيت اما الدلوعات ظفري انكسر الروج القرمزي وينه .. وبعد ذا الكلام و وفوقه وابل من السباب والشتائم الثقيله مشى دحيم وخلانا(( ما قلت لكم عزوز متمدن))
ثم قال عزوز لي ما عليك منه وش يفهمه بالرومانسيه ذا القروي اجل صروال خط بلده وين عايشين بسنة السبله.. وعزوز يكلمني دق جواله ويرد عزوز بصوت خافت تسنه صوت واحد من مذيعين fm ما كنه اللي معي تو ثم قال اكلمك بعد شوي المهم وجا يمشي وقلت له وين يا عزوز يرحم والديك زبني شف عندها اخت ولا صديقه ولا شي ودي اعيش قصة حب تظهرني من همي اللي سواه الارهابي فيني قال عزوز وش الارهابي قلت لا ما عليك قصة طويله الا اسالها قال ابشر المهم ويطلع المهم شوي ويدق علي ويقول خذ هذا رقم خويتها بس الله الله بالاسلوب قلت لا توصي حريص صحيح اول مره بس اعجبك المهم واخذ الرقم واتصل ورد علي ذاك الصوت اللي كانه صوت اليسا وانا اللي انلخم واقول هذا جوال خالتي قالت لا غلطان وانا اللي اصك السماعه وقلبي يقول طربق طربق طربق ولساني نشف غدى كانه خردزه مواعين حقت عزوبي له شهر ما مسح فيها مواعين ثم شوي واخذ نفس وقلت يا رجال قو قلبك وكلم المهم واكلم مره ثانيه وقالت على طول غلطان مهوب رقم خالتك قلت احب الغلط اللي خلاني اتصل عليك قالت من معي قلت كاتم الآهات قالت وش تبي يا كاتم قمت اتميلح عليها قلت كاتم ولا دزدر قالت يا مصلك قلت الله يسامحك هالحين وانا خايف يجيك الضغط من ملحي وانتي تقولين يا مصلك قالت اخلص علي وش تبي انت قلت تبين الصدق ما ابي شي بس ابي اسولف ابي احد يسمعني قالت وش قالوا لك موقع تشات رقمي قلت لا بس ودي انتي بالذات تسمعيني قالت غن خل اسمعك اول قلت خير ان شاء الله ما يطلبه المستمعون وش اغني اقولك ابي اسولف قالت خلاص اذلف قلت لا اغني ليش ما اغني وش تبين تسمعين قالت شي لعبدالحليم قلت توبه توبه توبه ان حبيتك انا تاني وهي اللي تصك السماعه واتصل عليها قلت وش بلاتس صكيتي السماعه قالت لا ابد صوتك مشخ اذني شوي وكلماتك وصلت قلت وش وصلت قالت وش كنت تقصد فيها..واقعد اتذكرها قلت يلعن ابليس فهمت اني ما ابيها قلت لها لا بس الاغنيه ما اعرف الا هي لعبدالحليم اطلبي اي شي لام كلثوم وابشري بعزتس قالت لا خلاص يسد ما ابي اسمع لك اغاني ابي سولفي لي نفسك..قلت انا بديت من الصفر وبنيت نفسي بنفسي قالت اقول خل مصالة التجار ترى ملينا منها كلمي بواقعيه شوي قلت لا انا قصتي كيت وكيت خذت الابتدائيه من ام سليم.. قالت خلاص يسد اظاهر انك بتجيب قصة حياتك انت شاعر ..قلت تسيف انا شاعر مهوب شاعر انا تردد الجماهير قصايدي كل يوم قالت ليه وشي قصيدتك قلت سارعي للمجد والعلياء ((اذكر ما حطوا اسم كاتبها بكتاب النشيد قلت خل الطشها مهيب داريه)) وكتبتها بعد ما تهيضت لموقف رومانسي واعجبت الملك وحطها نشيد وطني
<===== ما يعرف يتسذب
طوط طوط طوط <=== الخط مقفل
انا مغير الو الو <==== ما احد رد عليه
شوي ويزهم عزوز قال انت تبي تفشلني يا اللحجي قلت ليه عسى ما شر قال وشو دزدره وش سارعي وش ام سليم متطيب بكالونيا قبل ما تكلم ولا وش جاك..قلت لا بس كنت ابي اسوي جو..قال اقول انثبر والزم حدودك وصر رجال وخل عنك الخمبدزه احتس بالعقل وتسوي جو.. قلت ابشر ما يصير خاطرك الا طيب..
اظاهر خويتي علمت خويته وخويته علمته<===امداها تصير خويتك
المهم واكلمها واعتذر منها وقلت وانتي على طول تصدقين انا بس استخف دمي ..طيب انت وش اسمك قلت كحيلان وانتي يا حياتي وش اسمك قالت غاده قلت عاشت الاسامي <===ما شاء الله متى التطور
المهم سباحين انا وياها وعلى هالحال اسبوع بس ابشركم كل يوم عن يوم بتطور الاسلوب وبعد ذا الاسبوع قالت مرني قلت هوى ما طلبتي شي وين بس قالت في المشغل الفلاني اللي على الشارع الفلاني وكلمة السر قرموشي قلت جاي مسافة الخط بس والبس جنز مع تي شيرت على توصية عزوز يقول اشيك بس ما لقيت كنادر تكرمون البس معها وادور ادور قلت مالي الا الزبيريات حتى لونها يركب معها كلهن كاجوال المهم وادور طيب قلت صح يقول الشاعر يشدني ريح السمر في ثيابه اجل ابطمر للملحق دزمين اخواني شابين الضو اتطيب فيها و فعلاً القاهم شابين الضو وانا اللي اطامر فوقها تقل من الهنود الحمر واطلع على طول بالسياره متجه للمشغل ويا سلام اخر تكشيخه بدله و زبيريات ومتطيب بسمر المهم واروح امر قرموشي واجيب منه دزلابه قلت علشان اذا وصلت اقول ذا الدزلابه شاريها من قرموشي لراعي المشغل وبتعرفني وتركب موتري(( ما ادري وش فايدة الجوالات)) المهم فعلاً صار كلش زي ما خططته وتركب معي ويافرحتي المهم قالت خل نروح لمطعم تعشيني قلت ما طلبتي شي انا مولم كلش معي دزلابه من قرموشي عارف انك تحبين دزلابة قرموشي ولا ليش تقولين كلمة السر قرموشي قالت بس نبي ناخذ راحتنا قلت لا بناكل بالسياره وما عليتس كولي انتي وانا شبعان ما ابي شي سابقتس عليتس بالعافيه المهم كاني لاحظت انها زعلانه بس كلت ثم قالت غصيت ابي شي اشربه قلت ابشري ما طلبتي شي عاد انا اذكر فيه موية سبيل على راس الشارع اللي حنا فيه وادور والقى معي كاس وانا اللي اصب لها فيه واجيبه قالت لها الدرجه ما لي خاطر عندك موية سبيل قلت بس انتي غصيتي وهذي حاله مستعجله شوي قامت تحرقص تقول ياليتنا كنا بمطعم ولا كوفي شوب عندهم دورات مياه..انا على طول فهمت قصدها ذيبان ما شاء الله علي وانا اللي اروح لمخططات ما فيها مخلوق قلت يالله تشطري شوي وخذي راحتك قالت تستهبل انت قلت يا بنت الحلال ما شفتيني انا والارهابي وشلون صفطنا على طريق المطار القديم بالحياله وشلعت وطيرت الشراب((تذكر يالارهابي.. لا ومن زين وجهي كنا نتكلم عن الحياء واقول انا حياوي ثم قلت لك صفط وانا اللي اشنترها لا حياء ولا يحزنون)) المهم واظاهر انها فعلاً هالمره عصبت لانها كتمت طول الخط ورجعتها لمحلها واتصل عليها ابسالها عن التمشيه والقاى الجوال مصكوك وعلى هالحال الى يومكم ما ردت علي..
ورجعت للبيت والقى عين حميده الارهابي عند الباب وانا اللي اقلب عليه صن قلت حتى الشغاله علمتها حتى حمر عطر داري قال ما علمته قلت اجل وشلون درى قال ما ادري انا بس نشرت بالcnn ولا علمت احد قلت بس كذا قال ايه قلت ما قصرت قال يا رجال انا جايك بخصوص ذا الموضوع يا رجال ما تسوى زعل ولا شي وعندي لك رضاوه ترضيك قلت وشي وهو اللي يقول ما يصلح عند الباب خلنا بالملحق احسن قلت ابشر اقلط وندخل الملحق ويطلع لي بادية خلاص متسنوز تسنه اللي تحط @فروحه الحلوه@ بتوقيعها قلت ميده وش جاب توقيع فروحه معك قال يا رجال ذا الخلاص فيه دنبوشي يحولك لحرمه ومعي سكري متسنوز يرجعك لحالك قلت وشلون قال رحت لمشعوذ وسوى لي ذا الشغله قلت من جدك انت العالم وصلوا القمر واخترعوا الكمبيوتر وانت دجل وشعوذه اقول كبر عقلك قال جرب مهوب ضارك..وهو اللي يمد لي فذة من اللي معه وانا اللي اكلها وما ادري وش جاني دخت شوي واغمي علي وقمت والا كل شي متغير اتلمس صدري واثره غادي دعامات جيب واتلمس المصباح السحري والاه مهوب موجود يلعن بليسك وشعر وجهي وينه اتلمس مهوب موجود قلت ابفصخ ثوبي ابتاكد وعلى معطتي لطرف ثوبي وجاين اشلعه والاني افتح على الركبه وانا اللي اوقف ما عاد كملت لاني شفت الركبه السوداء وايقنت اني تحولت لسحليه ما عليكم اللي يثبت جنس المولود هو الركبه اذا ركبه سوداء سحليه ولا تشاور الله ياخذك يالارهابي وش سويت.. وانا اللي اشوف احلام قدامي قلت الفنانه احلام وش جابتس قال انا الارهابي قلت وشلون صرت احلام قال خذت فذة خلاص من نوعية احلام وصرت هي .. وقلت انا وش صرت قال اليسا انا معطيك فذة اليسا قلت طيب ليش انت ماخذ شيفه وانا معطيني شليخه قال بتدري بعد شوي قال يالله خل نعجل قبل يجي تالي الليل نبي نتمشى نروح للملاهي ونروح للبراجون والفيصليه واي شي وندخل قسم العوائل وكلنا ثقه قلت اي والله ياهي امنيتي من زمان وبتحقق الله ابدخل ملاهي الله ابدخل البراجون يلعن حياة الشقى يا شيخة احلام((احلام = الارهابي)) المهم وحنا اللي نطمر بلموزين يوم حولنا للملاهي يلعن ام السيارات اللي حجرت لي مواكب وراي الله ياخذك يا احلام وش ذا المواكب اللي تطردني قالت احلام هذي يا اليسا الله يسلمك ضريبة جسمك قلت ويش القصه قالت ذولا المغازلجيه وشوي وقاموا ينطلون اوراق وانا اللي ادخل الملاهي تقل زبالة بمكتب مسؤوال كلها اوراق معاريض مليانه شوي يوم دلخت وانفض الاوراق والله ونلعب بالملاهي فعلاً حسيت لحظتها اني امبراطور بس الى هالحين ناقص الامبراطوريه دخول البراجون وكل شوي اقول احلام يالله عجلي نبي البراجون والله ونروح للبراجون طبعاً لا يخفى عليكم المواكب اللي حجرت للموزين وحنا بطريقنا للبراجون بس كل شي يهون لعيون البراجون ويوم حولنا عندي وانا اللي اعض عبايتي واركض داز وادخل مع البوابه وانا اللي اطب بنص السوق اقول واخيراً خلاص اكتمل عقد الامبراطوريه عندي وترد علي احلام تقول لا باقي الروزنه اللي بشبرا قلت اي والله انتس صادزه قلت خلي نلف سريع سريع ونذلف للروزنه اليوم ذا عالمي ما يفوت اليوم ذا يخلد بالتاريخ والله ونذلف للسويدي ونطب الروزنه يا سلام الروزنه قلت خلاص ما ابي شي يسدني اللي شفت اليوم خل نرجع يوم رجعنا للبيت و تطلع احلام من شنطتها ماعون الستسري المتسنوز والا ما فيه الا فذة وحده ويلهمها ما شاور ويرجع لطبيعته قلت يالله سلمني فذتي قال قضى كل شي قلت هههههههههههههههه حلوه حلوه ياخي انت نكته خلاص عطني فذتي قال والله قضى كل شي قلت تبيني انجلط عندك علشان تدري اني معصب قال يا بنت الحلال احمدي ربك وشكلك مثل اليسا يعني ما فيه امل تعنسين كويس مهوب شكلك عايشه المرطه والا اختها عايشه الكيلاني قلت هههههههههههه برضو نكتك دايم حلوه بس عطني فذتي قال انا لا اعرفك ولا تعرفني لا تورطني بمشاكلك انا وانتهى التمر اللي معي ما دريت جا فيه غلط بالحساب ويتركني..
المشكله هالحين وشلون ابفهم اهلي وشلون ابفهم الناس يا والله البلشه وانا اللي ادخل عليهم جوا واعطيهم القصه كامله قالوا يا والله ذا البلشه وقالوا بتقعدين طول عمرك كذا ما عاد فيه امل قلت ايه قالوا ما لنا الا نجوزك علشان ما تكبر الفضيحه وامي تقول بنجوزها ولد اخوي عزوز ابقول لاخوي اليوم يملك ولده عليها قال ابوي الا ولد اخوي دحيم ابقول لاخوي يملكون عليها اليوم وقالوا ترى اسمك كحيلانه قلت ما علي من الاسم بس دحيم ما ابيه ما ابيه ابي اقعد عانس ولا يسوطني بعردزه دحيم قال ابوي اقطعي واخسي ما عندنا بنات لهم حتسي قلت ليش قبل امس لي راي وهالحين لا قال عناد كبرت براسي ازوجك لدحيم ويكلمون عمي و يعلمونه قال خلاص بس مهوب اليوم باتسر اليوم انا تعبان.. وانا اللي ارقد دموعي شعيب يمشي فوق خدي(( وجه يصيح)) والله واقوم الصبح واشوى النفسيات ازين اظاهر اني تاقلمت مع الوضع واول ما قمت طمرت من السرير واسوي بشم((تمارين ضغط = push up))..
ماش احس اني اليوم ما قدرت ارفع صدري واناظر والا الثقالات معلقه فيني(( خوش متاقلمه)) الله ياخذك يا اليسا ماليه صدرك سليكون الين غدى تسنه خزان وايت...يتبع
8
8
اكملكم سماجتي بعدين جاني النوم..
hgughri fdk ;pdghk ,hgdsh
لبنانُ مجدكَ في المشارق أوَّلُ..
والأَرضُ رابـيــة وأَنـتَ سَنـــــامُ..
هذا مقامُ القولِ فيك ولم يـــزلْ..
لك في الضمائر محفلٌ ومقـــام..