تقليعات مشعوذين .. !!
يالله حيهم
من زمان عن المواضيع اللي تسذا .. والشطحات
الآتي .. كنت ناوي أنزله في رمضان الله يعيده علينا وعليكم بكل خير
عشان فرصه وقتها الشياطين مربطه
والواحد يقدر يطقطق على ذا التماسيح وهم هاجدين
لكن تأخر لبعض الأسباب والله يستر الحين << خايف هم اللي يجون ويطقطقون على المنتدى وأهله
كلكم تسمعون بالمشعوذين .. الله يكفينا شرهم وشر أعمالهم
وبعض الطقوس والأعمال الشركية اللي يتعاملون بها .. وهذا مب موضوعنا << خلك في الصور أزين لك
موضوعنا .. يخص تقليعاتهم الغريبه في ملابسهم .. اللي يمكن لهم اعتقاداتهم الخاصه فيهم وطريقة لبسهم
خلونا نشوف .. واللي وده منكم يطقطق عليهم من الزاويه اللي يشوفهم فيها .. ترى المجال اوبن << ما يبغى يتوهق بلحاله !
هذا كنت أحسبه خيمه مفكوكه
لين شفت ذا المربع اللي مغطي سيقانه وفيه أخضر .. شكله قطو مرتاع يدور أحد يشخط وجهه
للمعلوميه .. ترى فيه تمساح آدمي تاكي وسط ذا الخلاقين
ذا الكمخ مسوين فيها زوجين ولهم ولد خخخخخخ
حلالاة من يمردغكم ويقطّع ذا اللبس اللي انتم كاشخين به .. ويطّلع منه تسمن بيز
ويعطيهن الحجه كونداليزا تبسط بهن على أقرب رصيف
معلومه إضافيه : البيز للي ما يعرفونه <<والله لو إنك بين خواجات>> هو قطعة خرقه مربعة الشكل
وتستخدم أكثر شي كواقي لليد
وذلك من أجل مسك الدله أو البريدز أو الزدر <<ورا ما ترجمت ذولي بعد؟>> عندما تكون حارتن جدا للوقاية من أي لقعه محتمله
ذا الثنين حفله ولبسهم تسنه كنابل قديمه
مع ذا اللي على رووسهم .. عكس اتجاه الريح
ذكروني باللي يسمونه "خيال المآته" اللي يحطونه في المزارع عشان يخوف الطيور
سؤالي الذي يمحط بنفسه قدامي في ذا اللحظه :
الحين يوم إن ذا اللي على اليمين فارن راس الغزال اللي فوق دمجته يسار
هل عشان يضبط الاستقبال مثلاً؟
وانت على ذا الرواق اللي انت لابس
حاطن تمثال فوق راسك يقالك بتخوفنا يعني؟!
أنا قاهرني إنه على ذا اللبس ما ينكتم
وين يتنفس معه وهو ما حط متسان للخشه والمناخر
على باله بذا الفتحتين شفنا عيونه الحلوه الحين
أما هنا .. سامحونا
لم نستطع منع الإغراء .. وإخفاء الكراعين .. قصدي السيقان
انحش يالمايوه المكرمش
هالثنين .. زدليلين الأدب والمروه .. ودي أولع بينهم شروخ وطراطيع
عشان يشب ذا العريش اللي على رووسهم
شرط يا ذا القرون ان تنطلدز تسنها صواريخ ما يردها إلا السقف
مدري ليه ذا الأحول اللي على اليسار إذا ركزت في خشته وتمقلت
يذكرني بواحد اسمه فرج مرزوق
يخرب بيتك انت وياه كرهتونا في شي اسمه بقدونس
عقب ما كان ينحط على التبوله والسلطات .. حطيتوه على أقنعه حولاء مدري وش تبي
هذا خدعني أول ما شفته
توقعت الدعوى ملابس مكومتها شغاله استعداداً للغسيل
ما اكتشفت إنه تمساح لين ركزت تحت ذا اللفافه البيضاء
وشفت عيون الأطخم تلاقط من ذا الشبك .. تسنها عيون قطو في وسط حطب
هنا عاد .. النعومه كلها
على ذا القصات .. مب عاقلين .. ستايل التيس ع السيار .. وستايل الخروف على اليمين
فاهمين السترتش والسكني غلط
أقول على ذا العصي اللي معكم يا ويليام انت وأخوك هاري
شكلكم ما سمعتوا بالمشعاب انت وياه
حلالاة من صن كل واحد منكم على دمجته لين تبزبز
عشان نثبّت ذا الجاعد اللي فاكينه من طبلون الدينا وحاطينه على روسكم
هنا مقدر عاد .. يا هوووووه .. على النموذج العائلي .. المشخصين بتغفليفات هدايا
أي هدايا؟! .. إلا ذكروني بالتجاليد القديمه << لا تغبر بعد انت
لا وولدهم عروسه .. وبيضاء بعد .. أم المخ يا ناس
الأخير عاد توحفه .. يسمع بالشرايط .. بس ماخذها على جلد بدل قماش
مسوي فيها كاوبوي على غفله خخخخخخخ
هذا إذا انزنقوا خوياه في شي قصوا منه قطعه
لذلك يستفاد منه في صنع نبيطه مثلاً .. نعال زبيريه كرمتوا
وأوقات أي تمساح يغازل يمزع منه ورقه للترقيم
حلالاة من ربطك بذا الخيوط
ولفلفك في جلودك هذي .. ودرباك مع نزلة الزديه << جب لها صوره لو سمحت مب كل العالم من الرياض
هاه بشروا .. عساكم استانستوا ؟!
أهم شي .. انتبهوا أحد يفكر يحاول يقلد في اللبس
يسعدكم ربي
™ تشاوو .. يرحمكم الله
jrgduhj lau,`dk >> !!
مؤشر يلامس هذا التصميم
فيصدح "صوت أخاذ" بترنيمة مؤثرة
تحاكي بعضاً من إحساس مكبوت أتعب الحال
تـنـــويه :
(حرفي/ بقلمي ولا حلل الله اللاطشون)
عبارة أتمنى أن تجد صداها في كل ضمير حي
سامح الله من تراجع عن خطأه في استعارة أحرفي
ومن استمر .. فالله حسبنا وحسبه !!
التعديل الأخير تم بواسطة ][ سعد الرجه ][ ; 08-09-2011 الساعة 06:59 AM