الموضوع
:
إستغاثــة [ مـدونـــة] ،،،
عرض مشاركة واحدة
25-07-2011, 12:15 AM
المشاركة
8
عضو له مكانه في قلوبنا
تاريخ الإنضمام :
Apr 2002
رقم العضوية :
127
المشاركات:
6,276
رد: إستغاثــة [ مـدونـــة] ،،،
يالله الخيره .. ذا المدونه بتغرق !
<< داخل ومعه حبل وطوق النجاة لستك ونيت
استهدوا بالله يالربع .. وكل واحد يصلح سيارته .. قصدي مدونته
وأكيد ما فيه زعل .. والله لا يجيب الزعل بينا وبينكم .. ولا بيني وبينتس يا مدونتي
قبل أدرعم في الموضوع وإبداء وجهة النظر المتواضعه وسدحها أمامكم
ودي أذكركم بشي سابق .. وبحكم إني في الرياض
.. خلوني أغبر عليكم بشي من الماضي << منقهر عشان ما سافر
قبل سنه ونص تقريباً أو أزود شوي .. كتبت موضوع يخص المدونات في قسم الرأي والرأي الآخر
http://www.al-amakn.net/vb/t65276.html
وكان فيه تجاوب من البعض لمناقشة نفس القضيه اللي لازالت قوانينها موضع نقاش لحد الآن
اختلفت الآراء .. واتفقت .. وتعددت الاقتراحات .. ويمكن حتى الاعتراضات .. على بعض الأشياء
والهدف الرئيسي بالتأكيد .. زي حالة الموضوع اللي حنا فيه الحين .. هو للارتقاء بالمدونات بشكل خاص .. والمنتدى بشكل عام
وحتى يكون فيه فلتره وتصفيه للأشياء اللي تطرح .. ونبعد عن الاسفاف والمخالفات بأشكالها
الجميل في الموضوع وقتها .. مع التفاعل من الأعضاء وبعض الطاقم الإشرافي .. ما كان فيه حضور إداري .. إلا أخوي
العيار
الله يذكره بالخير ويسعده
ووعد وقتها .. بعد ما قرا الموضوع مره ومرتين .. وراح يفح برا .. بسبب طول الموضوع بالنسبه له ونتج عنه نقص في الاوكسجين
<< هين بيفق ثمه ان قرا ذا المشاركه
وعد إنه في نهاية النقاش راح
تؤخذ الآراء الهادفه والاقتراحات اللي تشوف الاداره إنها مفيده وتصاغ في قوانين تحكم قسم المدونات وتنظمه بشكل أفضل
بعدها بفتره .. أتذكر أخوي
جنتل الرياض
.. قام مشكور بوضع بعض القوانين للقسم .. وحتى لو ما اتفق البعض مع أي نقاط جت فيها
إلا إن كان ينقصها التطبيق أحياناً .. والسبب كثرة المدونات وقلة المسئولين عن متابعتها .. رغم جهود الأخوات
الخلود
الله يجزاها خير و
شيزون
الله يرجعها بالسلامه .. بمتابعتهن للمدونات والصعوبات اللي كانت تواجهن
الأكيد إن شا الله إن كلنا هنا أخوه متحابين في الله .. والتقدير والاحترام محفوظ للكل
عشان تسذا .. نتناقش بأريحيه .. ونمون على بعض في الكلام .. وأكيد ما نقصد أي شخصنه للأمور أو تجريح لأحد لو مزحنا ببعض الكلمات والشطحات
وكلنا متفقين على الصراحه .. عشان نوصل لحل يرضي الجميع
أولاً .. شخصياً .. اتفق تماماً مع الإدارة وأختي
لجين
في أغلب القوانين
وبالعكس نشد على يديهم في تطبيقها .. ولا أحد يلومهم لو تصرفوا بصرامه مع بعض المخالفات
ونقول الله يجزاكم خير ويثيبكم على الحد منها .. ولا تجاملون أحد وأنا أولهم .. لو خالفت .. بس مب من الحين عاد على طول ما تصدقون خبر وتمحطون بي
بس يمكن الأسلوب كان فيه حده شوي يا لجين وأنا أخوتس .. تشتغلين عسكري انتي؟
<< برا انت ومشاركتك
صح معتس العين الحمرا مطلوبه .. اذا طفح الكيل وصارت ما تنفع التعديلات ولا الانذارات
لكن يمكن البعض اعتبر الأسلوب اللي طرحتي فيه القوانين استفزازي وفيه نوع من التهديد والتحدي
وأكيد .. عن نفسي .. ما أعتبر هالقوانين كرأي شخصي تفردتي فيه أختي
لجين
لوحدتس بمعزل عن الإداره .. أبداً
لأنه واضح إنه تم النقاش فيه والاتفاق عليه من قبل طاقم إداري متولي مسئولية هالشي
ويمكن طلعت منكم بهالشكل .. من التعب اللي شفتوه الله يعينكم .. من كثر ما ترقعون للعالم .. ومعذورين بعد
حتى أتذكر أختي
شيزون
كانت تشتكي في مدونتها من كثر المخالفات في المدونات ومن كثر ما تعبت وهي تعدل وتحذف
نجي الآن لموضع الخلاف مثل ما استشفيت من بعض الآراء المكتوبه سواء أختي
خواطر إماراتيه
.. هنا
أو أخوي
فرج مرزوق
.. الشهير ب
المانشستراوي
.. في مدونته .. وهو قافلتن معه بسبب هالنقطه
وكذلك .. من وجهة نظري الشخصية إن أكثر نقطه .. أثارتنا وضايقتنا .. وفيها إجحاف فعلاً .. حتى بحقنا حنا اللي نحاول نكتب شي يخصنا
هي تحديد المشاركات بـ
ثلاث مرات أسبوعياً
.. والله لو إنها علاج
يا ناس وش ذنب اللي يكتب شي يخصه أو يتعب في مشاركه يتوقع إنها تفيد بشي .. إنه يعامل نفس معاملة اللي ما عنده شي .. إلا فيسات يحطها والا تسلمه تسلمتين ما لها سنع .. وإلا شي منسوخ من هناك ومسدوح هنا؟!
اللي حاط فيس وبس .. لململوا فيساته واصمخوا بها راعيها في جبهته .. وخلوه يلقط فيسه مع ذا الفيسات اللي بازن بهن لحاله .. عادي غلطته ويتحملها
واللي حاطتن صوره نسائيه .. قطعوا ذا الصوره وانطلوها عليها .. واذا كررتها قولوا ما تلزمنا مدونتس دامها تسذا .. برضو عادي .. هذا طبختس يالرفلاء وإكليه
<< هين بتجيك حافظه على دمجتك
لكن ليش يعاقب الجميع .. بمخالفة عضو أو عضوين أو أكثر أو أقل؟!
يعني أي واحد فينا .. إذا استلج عنده الإحساس .. وصار وده يكتب شي يخصه .. في قرنته .. مدري ركنه الخاص .. اللي هي مدونته .. وش يسوي؟!
خلاص يكتم أم إحساسه .. ويتفاهم معه على جنب ويحاول يهديه .. ويقوله انثبر وامسك أرضك .. ما بعد جا موعد الجرعه .. تونا حاطين أخوك المحسحس في المدونه أمس .. وإنت أنتظر ثلاثة أيام لين يصير ما لك داعي
وإذا جا أخوكم الحسحوس الثالث يركض وراكم .. خلوه ينفهدز وراه .. وينطق لين نهاية الأسبوع .. عشان ندلعه في الويكند بدل ما نطلعه للثمامه نسدحه في المدونه
ثلااااااااااااث مشاركاااااااااات بس؟! .. وين تحديد نسل!
صراحه أنواع الإحباط .. وتحطيم الاحساس المستلج وراعيه
ويمكن يحسها البعض إنها تنفير .. ويبدا العزوف عن المنتدى لأن كل واحد بيروح يدور المساحه المتاحه لطرحه في متسان ثاني .. خصوصاً إذا شاف إنه ما يطرح أشياء مخالفه أو يزرف من متسان ثاني ويجيب هنا
يمكن البعض يقولون عادي وإذا صار .. المنتدى ما يتوقف على أحد!
والله عارفين هالشي .. بس الأفضل للمنتدى بعد .. إنه يكون الأسلوب محفز وجاذب لأقلام تضيف للمنتدى
وطبيعي تجي ردة الفعل بهالشكل .. زي ما قالت
خواطر
.. ليه يعاقبوني بذنب غيري؟
كل مخالف يتحمل مسئولية نفسه وأخطائه
وإذا العذر .. إن البعض عشان تزيد مشاركاته بسبب الفيسات والكلمات المختصره في مدونته
طيب .. مو فيه ناس لازالوا مشتغلين زيادة مشاركات في الأقسام الثانيه .. بردود نسخه طبق الأصل يحطونها بكل موضوع يشاركون فيه .. ومن طقة .. يسلموووو .. يعطيك العافيه .. ومن هالنمونه!
وفيه بعد معرفات .. أشوفها من مده .. تبطح في المنتدى ما شفت لها مشاركه وحده
وكل مره السؤال يقرقع في راسي ودي اسأل الإداره هي ذا المعرفات .. باتشات؟ .. وإلا إنكم متعاقدين معهم يحرسون المنتدى؟!
دايم طاقين خيمتهم وبكل وقت .. وهم أول من يدخل المواضيع الجديده .. وما يشاركون بأي رد .. شكلهم الله العالم إنهم من شلة إياهم حقين اللطش!
وأنا يا واحد .. ما يهمني عدد مشاركاتي وكم توصل .. ولو كنت أفكر بهالشكل .. كان ردي هذا بلحاله وزعته على عشرين موضوع أو أكثر وزادت مشاركاتي
ولهالسبب .. أتفق تماااااماً مع أخوي
كحيلان11
في اقتراحه .. لا تحسبون عدد المشاركات في المدونات ضمن مشاركات الأعضاء
لكن لا تزنقون كتاباتنا فيها .. وتحددونها بثلاث بس
اتركوا لنا الحريه في عدد المشاركات .. وليس الحريه في المخالفات طبعا
الكلام يطول .. ووجهات النظر تتعدد .. وتختلف وتتفق .. والوصول للهدف يحتاج التريث وسماع وجهة النظر الأخرى
وكلنا ثقه .. أن الإداره وطاقم الإشراف .. آذان صاغيه .. ما راح تتجاهل الآراء .. وقبلها أصحابها
ومثل ما ذكر أخوي
جنتل
.. إن القوانين قابله للتعديل .. وهذا شي طيب
دائماً نقول .. اختلاف الرأي لا يفسد للود قضيه
المعذره على الإطاله .. والله لا يجيب الزعل
دعواتي لكم بالتوفيق
و .. جميل التحايا
ask me
™
تشاوو .. يرحمكم الله
رد مع الإقتباس