معليش على التأخير << الشرهه على اللي نادوك


أول شي أشكر الأخت .. ضحكة شقاوه .. على دعوتها الجميله اللي شرفتني فيها للمشاركه هنا

الشي الثاني .. اعتذر عن التأخير لأني في البدايه نسيت الدعوه <<معترف إنك متنّح >> وأمس كان موقف المنتدى <<هين دور أي عذر


لكن يالله .. لكم حق تزعلون ولكم نرضيكم .. وإن شا الله الإجابات تبسطكم شوي



[ المحطه الاولى ]

اوصف طفولتك بجملة واحدة


طفولة بسيطة امتزجت فيها الشقاوة بالعفوية في مجتمع كان متآلفاً حينها.
.

[ المحطة الثانية ]

ما هو أجمل موقف أو أجمل ذكرى تتذكرها من طفولتك ؟

معظم ذكريات الطفولة جميلة <<بلا فلسفه>> لكن من أجملها .. أول يوم لي في المدرسة .. بعد ما أخذني الوالد رحمة الله عليه للمدرسة وجلس معي شوي هناك على باله بآخذ على الجو
ما أمداه يروح من هنا إلا أدنها بتسوه من هنا .. اللي خلاني أصيح زود يوم قعدوا الفصل كلهم يضحكون عليّ انقهرت <<تصيح أكيد بيضحكون عليك



.
.

[ المحطة الثالثة ]

ما هو أصعب أو أحزن موقف مر عليك في طفولتك ؟

هي ثلاثة مواقف متشابهه في نتيجتها ومختلفه في طريقة حدوثها وكانت في أوقات متقاربه .. الموقف الأول وفاة أخ لي بعمر خمس سنوات بسبب مرض أصابه ولازلت أتذكره يحتضر وأنا أشوف
الموقف الثاني .. فقدت أخت لي وعمرها أربع سنوات .. صدمتها سيارة أمامنا أيضاً ونزفت وفارقت الحياة قدامنا
الموقف الثالث .. ما كان في طفولتي بالضبط ولكن في مرحلة المراهقه .. توفيت أختي الصغيرة وعمرها سنة .. ولازال في مخيلتي منظر والدتي أمد الله في عمرها وهي تصارخ وأختي على يديها وقد توفاها الله .. ولم تكن مريضة .. لكنه الحق من ربنا .. فالله من أعطى وقد أخذ أمانته
وأدعو الله أن يجعلهم شفعاء لوالديهم يوم الحساب .. إنه سميع مجيب
.
.

[ المحطة الرابعة ]

ما هي أجمل هدية تلقيتها في طفولتك ولم تنساها لليوم ؟

هذي مفروض ما أقولها <<انت فضيحه>> بس علشان أطلعكم من جو الحزن اللي قبل شوي .. أجمل هدية ويمكن أول هدية أتذكرها كانت سيكل أم ثلاث جابها لي الوالد الله يسكنه الجنة
وكنت مبسوط بها على الآخر .. بس اكتشفت وقتها إنهم جايبينها لي علشان يصرفوني << لأنك لازق لهم

.
.

[ المحطة الخامسة ]

هل هناك انسان معين كرهته في طفولتك .. ولماذا؟

ليس هناك كره بمعنى الكلمة لأي شخص .. لكنهم أشخاص مختلفين في ذلك الوقت كرهت تصرفهم في مواقف معينة حدثت ولكن لم اكرههم كأشخاص وليس لأحد كره في قلبي ولله الحمد.
.

[ المحطة السادسة ]

ما هي أصعب مرة أأنضربتـــ فيها ولا زالت محفورة في ذاكرتك وسبب الضربــ , وش كان؟

هي محفورة في ذاكرتي .. ومحفورة في جبهتي بعد .. مرة من المرات الوالد رحمة الله عليه أرسلني أجيب له غرض ورحت ولقيت عيال الحاره يلعبون وفليتها معهم ونسيت وش وصاني عليه
المهم رجعت له بعدها وأنا خايف .. وواقف بعيد وينادي تعال .. تعال .. وأنا رافض .. المهم تصيد لي يوم التفت أرسل علي مجموعة مفاتيحه ما أمداني أطالع فيه ثانيه الا المفاتيح في راسي .. وخذ يا دم وقلبت طاقيتي حمراء ..
عاد أنا شفت الدم .. مسكت طاقيتي وأنا أصيح دم .. دم .. ورحت للوالدة الله يجزاها الجنة وردمت الجرح بمسمار وتمرة .. المهم لين وقف النزيف
والحين باقي ندب بسيط في زاوية الجبهه .. كل ما شفته دعيت له بالرحمة .. لأن هالموقف علمني شي مهم وهو .. التزام الشخص بكلمته والمسئوليه اللي تعطى له .
.

[ المحطة السابعة ]

هل كنت غيور بطفولتك من اخوانك وتحس فيه تمييز بينك وبينهم ؟

أبدا .. لم يحدث هذا الشيء .. يمكن غيرة لحظه لأجل لعبه وإلا هديه .. لكن كإحساس مستمر بالغيرة ما كان موجود ولله الحمد.
.

[ المحطة الثآمنه ]

ما هي اكثر وافضل لعبة كنت تلعبها و أنت صغير ؟

الكوره طبعا .. كنت مهووس بها بشكل رهيب <<حتى وهو من جنبها>> لدرجة إني كنت ألعب أيام الامتحانات <<هذا اللي ضيعك>> وأحيانا مباراتين في اليوم .. وكنت مستمر فيها من الصغر إلى وقت قريب .. وتوقفت عنها لإصابة .
.

[ المحطة التاسعة ]

هل ستربي اولادك بنفس الطريقة التي تربيت بها في طفولتك؟

زي ما يقولون لكل زمن دولة ورجال <<وش علاقة أم ذا المثل>> فطبعا الوقت مختلف وأساليب التربية اختلفت .. لأجل كذا فيه أشياء كثيره راح تتغير




دمتم بود