سبحان من يرزق بتوع الملاييـن=الرازق اللي ما يخيب الرجـا بـه
لي عم عنده معـرضٍ للصواليـن=أموت واعرف بس من وين جابـه
وإذا سألته قـال بعـت الدكاكيـن=ما يدري إني ما هضمت الإجابـه
الشاهد إني رحت له قبـل يوميـن=في قصره العامـر ودقيـت بابـه
قال أرحب أرحب عدّد ورد البساتين=يا مرحبا باللـي لفـا يـا هلا بـه
قلت البقا عـدّ النفـل والرياحيـن=يا شيخ شمل أهل الكرم والذرابـه
قال اسلم الله يحفظك لي من العين=وآمر أوامر حضرتـك مستجابـه
قلت الصراحة طالبٍ قرب غاليـن=ودي تزوجنـي كريمتـك يـا بـه
ثنّى وقال أهليـن والله وسهليـن=والكون ترخص لجل عينك رقابـه
لكن ترا عندي شـروط وقوانيـن=قلت اشرط اشرط يا حبيب الغلابـه
قال أولاً مهر العروسـه ثمانيـن=غير الرسوم وغير حق العصابـه
والثانيه عمك يبي منـك سبعيـن=رسم الأبـوّه والنسـب والقرابـه
وأم العروسه حقها منـك ستيـن=عشانها ست الحسـن والمهابـه
وإخوانها كلن يبي منـك خمسيـن=عداً ونقـداً تنـدرج فـي حسابـه
وخواتها الخمس عطهن من ثلاثين=عشان تتوثـق عـروق النسابـه
وتجيب طقم عيار واحد وعشرين=وخاتم من الماس المصفى ترابـه
وأكياس متروسه كعوب وفساتيـن=ألوانهـا وأشكالهـا مـا تشابـه
وموتر بسوّاقـه وفيـلا بدوريـن=أثاثهـا مـن بطرتـه ينحكـى بـه
واحجز لنا قاعه بقصر السلاطيـن=واحجز بهـا رقاصتيـن وربابـه
هذي الشروط اللي على بالي الحين=وذكّرني اللي ما حسبنـا حسابـه
قلت اذكر الله يا عـدو المساكيـن=واستغفـره لا يبتلـيـك بعـذابـه
الظاهر إنك منت عارف أنا ميـن=أنا لو أرقى فـوق متـن السحابـه
ما جبت حتى نص درزن مواعيـن=واضحك بكيفك واعتبرهـا دعابـه
شروطكم هذي شـروط المجانيـن=شروطكم شغـل ابتـزاز ونهابـه
شروطكم تقصم ظهـور البعاريـن=شروطكـم همّـن وغـم وكآبـه
شروطكم والله سيوف وسكاكيـن=تذبح بنات المجتمع مـع شبابـه
وين الرضا والعطف واليسر والليـن=اللي ذكرهـا الله بمحكـم كتابـه
وين الصفات اللي أمرنا بها الديـن=وين اختفى نهج النبي والصحابـه
يا عم جعل اللي خلقنا من الطيـن=يرد عقلك مـن خطـاه لصوابـه
ويجعل نصيبي عند غيرك قل آمين=ويحسن عزا الصابر ويجزل ثوابه
قال أنت لو فكرت تفكير صاحيـن=ما شفت في مجمل شروطي غرابه
حنا بعصـر العولمـه والمزاييـن=ماهوب عصر الفلسفه والخطابـه
الناس تسعى للرتـب والنياشيـن=وأنت اهتمامك بالشعـر والكتابـه
والشعر ما ينفعك لو هو دواويـن=ما دام جيبك مثـل بيـت الخرابـه
يا بوك لا تسمع كلام المصاخيـن=واسأل مجرب عاش في وسط غابه
قلت الله أكبر يا محـرر فلسطيـن=من يسمعك يحسبك ذيـب الذيابـه
تراك شايب رأس مالـك رياليـن=والبنت ما تسوى جنـاح الذبابـه
قال انقلع مالت على وجهك الشين=لا عاد أشوفـك عندنـا يالزلابـه
قلت ابشر أبشر لكن الباب من وين=وأقفيت من عنده على صوت بابـه