طاب السكوت وجرح الايام ماطاب = وعانيت من جور الليال ونكدها
حزني كبير ونبض الاحساس منصاب = من صدمةٍ هزت ضلوعي رعدها
جرح المشاعر دمعةٍ وسط الاهداب = حبستها والعين طوّل سهدها
الحزن ماقدّر مشاريه وعتاب = لاحل في روحٍ تحطمّ عمدها
أبعد بجرحي عن سواليف مغتاب = اللي بعينه كل زله رصدها
أخيل برق الحزن في راس مرقاب = وأخذ نفس والروح بآخر جهدها
على كثر ماذكر من الناس غيّاب = طعم الاسى بغيابها إمر وأدها
الوقت في كل المواعيد كذاب = الا الطعون اللي تجي في وعدها
مامر صدري للفرح صوت ترحاب = ماتت وكفنت الفرح في لحدها
بين الجروح وغربة أحساس مرتاب = غيابها يرثي حضوري بعدها
ملامحي تحكي تفاصيل الاسباب = لازلت أعيش أحساس طفلٍ فقدها
صديت وأحزاني نياشين وأحراب = ونار المواجع كيف أطفّي وقدها
وقفت أعيد أيام في صفحة كتاب = صرخات روحٍ غاب عنها سندها
(أمي) بدعوتها مفاتيح وحجاب = عن كيد كل المغرضين وحسدها
أخت الوفا عزوة عريبين الانساب = يفدى قدمها من تجاهل عهدها
اللي رضاها غيث وأنفاسها أطياب = راحت وأنا روحي على كف يدها
غابت وشفت الوقت كشّر بالانياب = وجيوش همه وسط صدري حشدها
ضاق الفضاء والصبر بصدور الاقراب = طاح القناع وجرح نفسي لهدها
في ليلةٍ نامت بها عيون الاصحاب = يافجرها لا تصّحي اللي رقدها
أنا الغريب ورحلتي كلها أتعاب = لكن مسافة خطوتي من نشدها
عن صبري اللي فوق صدر الشقا ذاب = عن جرحي اللي بغربتي ماجحدها
كم كلمةٍ تحتاج ترتيب وأعراب = تركتها في زاوية مستندها
لن التجارب علمتني وأنا شاب = ماكل من يزرع فضيله حصدها
وأنا عزاي بموقف الضيق ماهاب = نفسي تشوم ودعوة أمي سعدها
(أمي) عسى يكتب لها رب الارباب = أعظم من أجنان الحياة ورغدها
من رحمتك يارب تفتح لها أبواب = في جنةٍ يسقي ثمرها شهدها
يامن تضرع لك رجا كل طلاب = وناجاك خوف بكل سجده سجدها
أغفر لها ياغافرٍ ذنب من تاب = ياسامعٍ بالغيب دعوة ولدها

الموضوع الأصلي: بـرق الحـزن .. ( مصافحة أولى ) || الكاتب: منصور الرويلي || المصدر: منتديات الأماكن

المصدر: منتديات الأماكن