الله يعين عليك يا فاقدوووه


شكلك ما استوعبت .. وتبغانا نقلبها دردشه .. وهذا مو مكانها

والله إني قايل .. حدك يا تبيع جح .. يا شريطي غنم .. غير كذا الله يخلي المهايط

وإلا وش لك ولشي اسمه بوح خاص .. أو له علاقه بالخواطر والأدب

لكن تعال .. بس عشان أريحك


أولا أنا ما شفت نفسي بالمرايه وأنا أكتب على قولك .. لسبب .. وهو إني ما احتاج مرايه تعكس حقيقتي .. أو تبين لي شخصيتي الحقيقيه


لكن شفت شي أحلى من المرايه .. وهو إنك ذيلت ردك .. بصورتك الرمزيه

على فكره .. ترى راح يمنعون صور ذوات الأرواح .. عشان كذا حاول تصور بدون ما تبين خشتك



تدري عن شي ..

ذا الخلفيه اللي تسنها جدار .. من يوم حطيتها وانت منهبل في ردودك بكل قسم !!

كل شوي جايب العيد .. في موضوع

ذكرتني بسالفة واحد دبوج من عيال الحاره .. في فترة ما .. كان حليوه ومدرمح زيك كذا .. بس أسلوبه .. طعس

وكان كل ما جا معه خمسه ريال اشترى له .. بخاخ بويه .. ويدور أحسن جدار لأقرب بيت في طريقه .. ويبدا يشخبط .. ويكتب كتابات من جنبها زيك

أشياء مثل .. جريح الحب .. هاوي وأداوي .. أروح ملح .. وراعي الجمس .. وشخابيط زي كذا

وكان عايش الجو .. ومسوي فيها عربجي .. وما يهمه أحد


وفي يوم .. طرحه الله في بيت واحد .. عنده عيال عرابجه .. أبوهم نفسه يخاف منهم

ويصيدونه .. وهو يكتب على جدار بيتهم .. ويمسكونه هو وبخاخه .. ويشخبطون بالبويه على جبهته .. وشعره

ويكتبون على ظهره .. المهايطي .. وقالوا .. الحين تتصل على أبوك يجي ياخذك .. يعني ما فكوه إلا ماخذين تعهد على ولي أمره ما يتعودها مره ثانيه

من بعدها .. صار لو يمر من عند أي جدار نظيف .. يعض ثوبه وينحاش عشان لا أحد يشوفه


الحين تدري وش صار خوينا أبو بخاخ؟!

ضربت معه .. وصار شاعر في وحده من قنوات الشعر .. ومستمر يهايط بس بشكل فضائي .. والفضل طبعا مو لموهبته .. لكن للجدران


عشان .. كذا .. يمكن هالسالفه تشجعك شوي .. عشان تتخذ قرارك وترسى لك على بر

يا تستمر في الشخبطه .. لين تصدم في جدار يصحيك من الخبال اللي انت فيه

يا تخلي عنك المهايط من بدري .. أزين لك .. وأزين للجدران وأهلها


طبعا هي نصيحة أخو خايف عليك من زود السماجه .. فهي قد تؤدي إلى مهالك أخرى


إن شا الله إنك تخلينا نقفل على المهايط والشخابيط .. وتنقل اللعبه لمكان ثاني مناسب لها غير تراتيل

فلكل مقام مقال يا فتى .. وكفى


باختصار .. اعقل الله يصلحك .. وخلنا حلوين .. يا حلو



عذراًَ .. أخي خيالك .. وأحبتي مرتادي تراتيل

أعلم .. أن هذه المهاترات .. لا تناسب ذائقتكم .. وليس مكانها هنا
لكن مشرفنا العزيز .. هدانا الله وإياه .. أحب أن يظهر شيء من خفة دمه ، ولكن خانه اختيار المكان المناسب



ودي واحترامي للجميع

دمتم بود وألف خير