لاتعتذر ماللهجر منك تبرير=وصدك بليّا ذنب والله ظليمه
ماصار لي بعدك يفوق اي تصوير=تجددت كل الجروح القديمه
بعدك لعبي هاجسي والتفاكير=وقلبٍ جريح وروح صبٍ مهيمه
ماغير اسلّي خاطري بالمشاوير=اروح وارجع والهواجس مقيمه
ياحبّي اللي بين بيض الغنادير=لك في عروش القلب قدر وقيمه
((ان كان صدّك ماخذك عنّي الغير=روّح ولو ان الخساير وخيمه))
(((وان كانها عنّي خذتك المقادير=فالعفو عند المقدره فيه شيمه)))
(يامرحبا والحب كله معاذير=تشفع لك ايام الغرام القديمه)
يوم الهوى لازارني منّك إعصير=أضم في صدري من اجلك نسيمه
((واليوم اصبّر خاطر الوجد تصبير=واقول صدّك عقب وصلك جريمه))
ولاجاك مني ياهوى البال تقصير=مواقفي وياك والله عظيمه
صخّرت لك مشاعر الشوق تصخير=وامطرتك بحبٍ تقفاه ديمه
وظلّلتك بجفني وصارت مسافير=يوم الغلا بين النديم ونديمه
واليوم ماتنفع كثير المحاذير=تفاغمت بين النفوس الحشيمه
((عسى سنينك روض عشب ونواوير=ماحدٍ لنفسه يرتضي بالهزيمه))
((إما تخاويني على الشر والخير=والا السلامه منك راس الغنيمه))

الموضوع الأصلي: (((العفو عند المقدره فيه شيمه))) || الكاتب: بندر نجد || المصدر: منتديات الأماكن

المصدر: منتديات الأماكن