اولا اشكرك اختي على هالموضوع
واشكرك على اتاحة الفرصة لي ان اكتب ما تجود به نفسي
وان شاء الله اني اقدر اضيف للموضوع شي حلو

* كم نسبتك العـأَإم الماضي او الثانويه العامه..>> يالله طلعوآ الفضآيح ؟!.

انا درسة هندسة اكترونية وكان تقدري جيد جداً
وتوظفت بعدها في مجال الحاسب الآلى بس صراحة ما حبيت هالتخصص لأني دخلته عشان اتوظف
كنت احب الادارة والبزنس بعد فتره طوله فكرت ادرس ادارة
ورجعت ادرس الجامعة من اول وجديد
ودرست ادارة اعمال مسار ادارة اعمال دولية والحمد لله خلصتها بثلاث سنوات ونصف وبقدير جيد جداً
والاسبوع اللي فات استلمت وثيقة التخرج وقبل البارح مسوي عزيمة بهالمناسبة
باركولي هههه


* كم ترتيبكـ بالعآدة؟!.

والله انا كنت شاطر بس مو فلته
يعني كنت اجيب جيدجدا مرتفع واحياناً ممتاز



* ماهي مادتكـ المفضله ؟!.

الرياضيات



* تحبـٍ/ي تذآكرـٍ/ي من الدفتر ولآ الكتآب ؟!.

ما تفرق معاي اللي اشوفه يشمل المنهج اذاكر منه


* هل إنتـٍ/ي من النوع اللي تحبـٍ/ي تشخبطـٍ/ي عَـ الكتب والدفأإآتر ؟!.

انواع الشخبطه وربي احس كتبي اول جدار مدرسة


* إذا إنتـٍ/ي متخرجـٍ/ــة شو المرحله اللي حبيتها/حبيتيها ؟!. لماذآ ؟!.

حنا من سكان الرياض واغلب اخواني مولدين فيها وكنت وانا صغير ادرس بالرياض مع اخواني وخواتي وكانوا كبار ويتحملون المسئولية
وكان الوالد له اعمال برا الرياض وكانت الوالده اغلب الوقت معاه ، فما كان هناك اهتمام من اخواني وكان مافيه اهتمام
يعني كثير من الاحيان اروح بدون فسحه او اروح وارجع رجليه للمدرسة لأن اخوي اللي يوديني مطنش او رافض يقوم من النوم
ومافيه احد يذاكر لي او يهتم فيني من الناحية التعليمية بجد كانت مرحله تعيسه الى ثاني ثانوي
ياكثر كلاااامي قصة حياته .. ما صدق احد يسألة
لكن انا اشوف الافضل كانت من نهاية الثانوي الى الجامعة

* هل أنت/ي من النوع اللي يتكلم/تتكلم كثير في الفصل ؟!.

ابداً كنت زي الاطه المغمضه ومؤدب كثير


* من آكثر معلم/معلمه حبيته/حبيتيهآ ؟!. شو يدرّس/تدرّس ؟!.

اكثر مدرس حبيته مدرس فلسطيني اردني وذاكر اسمه كثير ومستحيل انساه كان اسمه عبدالكريم الجاموس
هالمدرس كان يدرسنا رياضيات وكان شديد بالمره وكان يبينا نحفظ جدول الضرب مثل اسامينا
واللي ماخلاني انساه كف خذيته منه عشانه سألني 7 ضرب 8 كم؟ قلت 7 ضرب 8 تساوي 56
فضربني قال ما ابيك تكرر السؤال عشان تجاوب ابي تقول على طول 56
بعدها حفظت الجدول اكثر من اسمي وصارت الرياضيا من اسهل المواد واقربها لنفسي



* فين كـٍآأن مكانك في الفصل ؟!.

ههههه انا كنت الى ثالث ثانوي قصير ، كان طولي 150سم او اقل فكانوا يحطوني قدام عشان اشوف
وينهم الحين كان يحطوني اخر الفصل ههههه

* كم مره كتبتـٍ/ي تعهّد أو مخآلفه ؟!. لمآذآ ؟!. < ياللـٍه

ما اذكر ابد اني خذيت تعهد او مخالفه


*كم مره إنطردتـٍ/ي من الحصه ؟!. لمآذآ ؟!.

ابدا ما اذكر انطردت من الحصه
الا اذا جيت متأخر الصباح ووقفنا المدير وعطانا كم عصا
فبعض الاحيان ما يرضى المدرس يدخلنا الحصة الاولى


*عمرك آتهزّأتـٍ/ي من مدرسّك/مدرّستك ؟!. لمآذآ ؟!.

طقة الكف اللي من مدرس الرياضيات اللي ذكرته قبل


* هل سبق رسبت/ي بسنه ؟!. في آي صف ؟!. كم مره ؟!. لمآذآ ؟!.

ما اذكر اني رسبت بحياتي الا مره ما دخلت الاختبار


* كم مره هربتـٍ/ي من الحصّه ؟!.
وإذآ هربتـٍ/ي صآدوكـٍ/ي ولآ لآ ؟!.

حصه ما عمري هربت بس من المدرسة مره وحده
وكانت في اخر اسبوع من الدرسة في الثانوي وكان مافيه دراسة وكانوا مجلسينا في الفصول ومافيه شي
فقالي زميلي وش رايك نروح نفطر ونتمشى قلت قدام ويوم نطينا من السور وكان السيارة قريبه
شافنا الوكيل وكان واقف برا المدرسة وجانا يركض وحنا ركبنا السياره وسكرنا الابواب وكنا متلطمين وما عرفنا
وبعدها صار صاحبي يوقف سيارته بعيد عن المدرسة عشان ما يكفشنا الوكيل


*كم مره نمتـٍ/ي في الفصل ؟!. <<< اتوقع كل شباب المنتدى سوها أما البنات لا
واذا عدي واغلطي.. في اي ماده اكثر شي تناموا؟!.

والله كثير وخاصة في حصة الدين كان عندنا مدرس سوداني ممل


*إنتـٍ/ي في مدرسه أهليّه ولآحكوميه ؟!.

الاثنين << والا الثلاثاء ههههه


*في حدآ بالمنتدى معآكـٍ/ي في المدرسه ؟!.
واذا فيـٍه افضحيـٍه بوقف صآر معـٍه

لا والله مافيه


* موقف صآر لك/ي في المدرسه ومآتنسآه/تنسيه ؟!.

كنت بالمتوسطة صغير عمرا وجسماً وكان الفصل اللي انا فيه ناس كبار بالعمر والاجسام وداجين دراسياً
وكنت اشطر واحد بالفصل وكانوا ينقلون مني الواجبات ويغشون مني بالاختبار وكانوا يهتمون فيني عشان هالامور
وكنت اشاغب وكان عريف الفصل ما يقولي شي لأني مستفيد مني
ومره ازعجته وقام شالني وحطني فوق دولاب في الفصل زي المكتبة وما قدرت انزل وبلحظه الا والوكيل داخل
يااااعيني ياااليلي وقال هذا ليش هنا قال العريف ازعجنا وحطيته هنا قال نزله وضربني ضرب بالعصا مااا انساه


*كانت طاولتك بالمدرسه نظيفه وإلا تخربش عليها؟!
وشنو أكثر شي كنت تكتبه عليها ؟!

لا والله كانت حووووسه الى درجة اني خارمها من النص عشان احط العصير في الدرج واطلع الشفاط واشرب العصير


الحين اختار الاخ العطشان