امسن مع الهوجاس ياما طرالي=مشاكل الدنيا وقسمين الاخيار
واخذت اردد ماطرالي في بالي=ونظمتها وابدعتها ضمن الاشعار
مرسى رواسيها رساة الجبالي=وفيها نغم تعزف بها عزف الاوتار
عزفتها والقلب ماهوب خالي=من جور هالدنيا ونكبات الاشرار
مرخص رخصنا بعد ماكان غالي=وغالي فرض فينا غلاته بالاجبار
ياصاحب الوقفات خلك قبالي=لاتبتعد تكفى ترى دمي انهار
اسمع وصايا صاحبك فالتوالي=لك الوصايا طيرها اليوم لك طار
رفرف جناحه لين رام المعالي=ورجم المعالي مايجيها بمعسار
هذي عوايد طيري لاهب بالي=باصم عليها وتارك البصم تذكار
حافظ على اللي فيه ربك يسالي=عمود دينك لو يصير اللي ماصار
واوف ابوعودك لاعطيت المقالي=من لا وفى بوعده يسموه غدار
واحشم خويك لافهقوه الهزالي=لاتلطم ترى الخوي موقفه حار
افده براسك يابعيد المدالي=خابرك حر اليا جزلنا فالاحرار
لاتبتلي بالبوم لو جاء مجالي=خلك عقيد وقايدن كل الامهار
وخل النظر لالد .. لدة معالي=منهو تدنى مات ولاشاف الازهار
زهر المراجل لاسقته الفعالي=يبقى شذاها لين قصاف الاعمار
القول مايحسب في كل الرجالي=فعلك هو إثباتك ليا جات الاخبار
واوجب ضيوفك ياكريم السبالي=لاترتخي بواجبك وتبدي الاعذار
ولا تنبهر من كل شخصن يلالي=ماكل من لا لا يماري بالاشعار
ولاتنحمس في كل قافن يبالي=بعض البشر تكتب ولافيه معيار
ولاتنخدع في قول خلت الخيالي=يم المراجل خلتها لك بالامطار
لاتقتنع الا بفعل الجزالي=مايثبت افعال الرجل غير الابصار
ولاتامن الدنيا بخضر المفالي=ولاتامن احدن لو بعزن ومقدار
هذا الزمن لويطعمك كل حالي=لابد يسفط ياولد عذب الامرار
وش تنفع الدنيا بقيلن وقالي=رم لك ميامن مدها مد الاخيار