هذي دراسه <<أمحق>> من تأليفي شخصيا .. يعني بالعربي موب ملطوشه .. وإنما من بنات أفكاري <<الداجه طبعاً>> وتتكلم عن بعض نوعيات البنات الله يخليهم لنا ولكل عين ترجيهم <<على بالك تسلك من بدري

أتمنى محد ياخذ الموضوع بحساسيه زايده أو من باب الزعل .. فالمسأله مجرد طرح من باب الدعابه والمزح وليس من باب التجريح للي فيهن بعض هذه الصفات !!
و
إذا فيه أحد يشوف في الموضوع غير اللي أقصده وهو الضحك للضحك فقط .. فهذا اعتذاري مقدماً !!


نرجع لمحور حديثنا .. وهو نوعيات بعض البنات .. من واقع مشاهدات شخصيه .. ولا تفهمون غلط فالواحد تراه يشوف بنات في عايلته صغار وكبار ويقيس عليهم من هذا المبدأ إضافه لخيال أخوكم الواسع <<وين ثوب>> اللي يزيد البهارات شوي



طبعا ( الزاحفة ) صفه مشتركه لأغلب البنات <<قصدك السحالي>> وهذي النوعيات الدارجه :


العصلا :

وهي هيكل عظمي متحرك مغطى بالجلد فقط .. مناعتها عجيبه ضد السمنه والانتفاخ مع إنها أكثر وحده تاكل أي شي تطيح عليه .. من أخطر الأنواع لأن عظمها قوي وأي احتكاك بها أو اصطدام لو صدفه راح تكون انت الخسران وبينكسر فيك شي أكيد ..
ومتى تعرف إن فيه وحده عصلا جايه في الطريق؟ ... إذا سمعت صوت طقطقة عظام << يبغى لها تزييت



أم كراعين أو (الشبث) :

وهي ما تختلف عن (العصلا) إلا في شي واحد وهو إن كراعينها (سيقانها) طويله ويسمونها أحيانا الشبث (العنكبوت) .. لدرجة إن مشيتها تحسسك إنك تتفرج على عرض سيرك (مثل اللي يمشون على رجلين خشب) ..
ولازم تتفادى النوعيه هذي في طريقك لأنك ما تدري إلا هي خامتك ركبه على وجهك .. طبعا موب شجاعه لأنها أصلاً ما تخوّف لكن بسبب طول الكراعين ..
وإن مسكتك يخلف الله عليك صرت من صيد أمس .. بتسوي لك حركة يوقا <<إدع ربك يوقيك>> وتلفلف عليك كراعينها ويدينها نفس حركة الشبث وهو ينسج خيوطه على ضحيته .. ساعتها ابن أمه يفكك منها .. إنس !!



الرصّاصه (بتشديد الصاد) :

وهي النوع المتين مره .. استخدمها الأجداد سابقاً لتعبئة التمور (ترص التمر لين يصيح الدبس خلاص طلعت) <<وين جني طالع من آدمي>> .. وحالياً تعددت استخداماتها لكن أكثر شي يخلونها أهلها في الصاله علشان تحافظ على توازن البيت ..
وهذي متى تدري إنها جايه .. إذا حسيت إن الأرض بدت تهتز تحت رجليك والأشياء اللي حولك بدت تراقل (يعني تقرقع) ..
هذي ما تخوف أبد بس أهم شي انتبه لا تصدمك علشان فارق الوزن .. إذا بتـقهرها راكض قدامها <<ما يمديها>> وإذا بتخوفها خل معك دبوس << علشان تنسمها



الجثه :

من أضخم السحالي وهو نوع نادر .. عملاقه بشكل رهيب لدرجة إن كل ملابسها وجزمها تفصيل .. دايم مسببه عقده لأهلها <<موب عاقله كوين لطيفه>> في الأعياد والمناسبات علشان كذا يخلونها في البيت كثير ..
تستغل إمكانياتها الجسمانية في تهديد باقي السحالي لأجل يعطونها أي شي معهم <<الفتوه>> .. هذي لا تخاف منها تراها جسم بس وإلا قلبها فضيخ (يعني ضعيف) ، إزعق عليها وتنحاش !!



الكمخه :

مهما يعلمونها ما تستوعب كنك تنفخ في قربه مشقوقه .. المشكله تقولها فاهمه تقولك ايه .. شوي تسألها عن نفس الموضوع تطلع بدون نتيجه .. هذي تخليك تعرف الضغط في سن مبكره ..
فمالك ومال رفعة الضغط .. إذا عندك مخ طنشها علشان ما تأثر عليه << هذا إذا عندك مخ



الدابة السليمه :

ويسمونها أحيانا الصحيّحه (بتشديد الياء) على نياتها ودائما يلعبون عليها باقي البنات وتتحمل نتائج تصرفاتهم .. بنيّـه في الدبره (يعني يمشونها على كيفهم) وتباري الساس <<حتى الساس دايم يفوز عليها>> لا تهش ولا تنش .. بس تحسسك إنها محسوبه على مجتمع البنات !!



النشبه :

وأحيانا تسمى اللزقه مكانها دائما الحلق (تنشب في حلقك) لو تدخل معها في نقاش مستحيل تطلع بنتيجه .. بتطلع إنت الغلطان حتى لو إنك صح .. يعني بتضيع وقتك بدون فايده .. و ينبح صوتك وإنت ما تخلصت منها حتى لو تعترف إنك غلطان علشان تفتك منها بتلحقك وبتقول ليش غلطان ..
الطريقة الوحيدة للتخلص منها هي اللزخ .. إلزخها لين تدوخ ورح وخلها



المهفه :

وتسمى أيضاً المروحه لأن أي شي وأي أحد يقدر يحركها بسهوله لأنها تسمع أي نصبه تقال لها أو تصريفه وتصدق .. وتطير في العجه وفي وجهك طبعا وانت ما بعد قلت شي ..
لا تتعب نفسك انفخ عليها وتروح لغيرك !!



المنعفطه :

وهي اللي تتمايل في مشيتها على بالها تغري خلق الله .. وهي شكلها تقول أحد ماغطها بماصوره على ظهرها لا ومن زين الطبايع تلبس كعب طويل علشان تزيد الانعفاط ..
هذي لا تهمك انطل في طريقها قشرة موزه وإلا علبة ببسي بعد ما ترجها .. بعدها راح تشوف أنواع حركات ورقصات الباليه << بتتعفط زياده بس في الهوا



المايعه :

هذي عاد اللي تكره الناس في جميع الحروف وأساليب الكلام والدلع .. هي تسمع بالدلع والغنج بس ما عطوها الكتلوج
علشان كذا تخترع أساليب نطق تسد النفس وتدبل التسبد وتلوي حنتسها لدرجة الغثيان .. لدرجة إنك تقول أشوى إن سيبويه ميت <<وش دخله؟
المشكله ماخذه مقلب في نفسها <<حليمه بولند>> إنها ذابحة العالم بدلعها وهي ذابحتهم قهر وودهم يلكّمونها لين يعدلون حنتسها (حنكها)
هذي لا تسولف معها .. وإلا ترى بينعوج لسانك ويحسبونك ربعك من الأجانيب <<غير الأجانب؟



الميته :

وتسمى أحيانا البارده .. وهي قروب زوله (مجموعة كسولين) مختزلين في بنت .. لو تطلب منها تجيب لك غرض أو تسوي لك شي .. على ما يطري على أهلها وتفكر تتحرك وتقوم إلا انت مهون عن اللي طلبته منها.. تخليك تكره تطلبها شي ..
حتى في أحاسيسها ثلجه .. يبغى لك دريل ويالله علشان تحسحسها <<وين راس ذبيحه>> لو يصير في بيتهم وش ما يصير آخر من يشيل هم أو يجيب خبر أحد هي ..
طبعا هذي إذا حصلك وشفتها ما لك إلا تقول شي واحد ... الله من الدجه !!



الهامله :

تحب الهجوله من بيت لبيت ودايم معلقه شنطتها بيدها .. على بالها موديل هي وخشتها .. حتى وشنطتها ما فيها إلا الضعوي (فاضيه) .. يا سيرت على فلانه بدون موعد وإلا راحت مع فلانه ثانيه للسوق حتى لو ما يشترون شي وإلا درعمت في مدرسة بنات تحضر مجلس الأمهات وهي ما تزوجت أصلا ولا لها خوات في المدرسة ..
طبعا هذي أهلها ما يفقدونها متعودين إنها دايم برا .. هذي ما لك إلا تحمد ربك على العافيه !!



القالطه :

وتشبه الهامله لكنها تفرق عنها في إنها تتصيد لأي باب بيت مفتوح خصوصاً اللي عندهم عزيمه وإلا عزاء إن شاء الله عندهم عمال يرممون البيت ، يغريها الباب المفتوح بشكل ما تقدر تقاوم .. يعني اعتبرها داخله داخله .. معزومه .. ما عزمت ما يهمها ... يفطرون .. يتغدون .. وقت عشاء ما تفرق عندها ..
عاد هي وحظها في البيت اللي تدخله إذا هم حاطين أكل وإلا قهوه وشاهي وحلا وحركات بتفلها معهم .. حتى لو إنهم صايمين بتقلط ..
وعلشان تمنعها تدخل بيتكم ما لك إلا تحط عند بابكم حفرية ويالله تخليها تغير مسارها !!



النحوته ( النضوله ) :

هذي اللي تطرح الطير من السماء .. مهما كان عندها من خير ما تشوف إلا اللي عند غيرها .. أي واحد في الحاره يتعب ويقرون عليه ويتضح إنه مصاب بعين .. على طول يروحون لها ياخذون من سعابيلها وعساها توافق من زود النذالة <<متعوده دايم يجيها عروض وإغراءات ماديه علشان سعبوله
إذا شفتها صد لا تشوفك وإلا سو نفسك ضعيّف ومسكين يمكن تعدي ما انتبهت لك .. أهم شي لا تخليها تكحل عيونها بخشتك وإلا اعتبر نفسك في خبر كان !!



الحرباء :

تتلون حسب الموقف والمكان ومع مصلحتها .. يعني ما لها أمان شوي معك شوي تقلب عليك .. تعيش منبوذه وتلقاها دايما وحدانيه ويالله تمشي .. زهقانه من نفسها ومن دنياها .. أكثر ما تمشي بنص الشارع علشان يصدمها أحد وترتاح ..
هذي سو نفسك ما دريت و .... (لا تبسوها يا عبدالهادي حسين على غفله) شتها ظفر من طريقك لآخر الشارع !!



العقربه :

وهي اللي تقرص من تحت لتحت وكثير ما تكون قرصاتها للقريبين منها (مثل ما يقولون بعض الأقارب عقارب) ..
هذي بسيطة اكسر شوكتها يصير ما عاد منها خوف .. وإذا ودك تحط متحف حطها في قزازه فاضيه !!



الحيه :

وأحيانا يسمونها (أم 44) <<وين موديل>> .. أخطر نوع في السحالي لدغتها والقبر إلا إن الله ينجي ضحيتها .. ما لها أمان ولا تنشاف وتتسحب لين تتمكن من فريستها ..
إذا الله ألهمك وانتبهت لها قبل تضحي بك مالك إلا تفضخ راسها بأقرب بلكه !!






طبعا هناك نوعيات جميله ومحبوبه ومرغوبه <<مسك خط>> من البنات وهي قليله مقارنة بما سبق مثل :

الأجوديه :

وهي اللي دايما في حالها وتحب الخير للآخرين وتساعدهم وتدور ما عند الله ودائماً مسالمه إلا إذا أحد داس لها على طرف وهنا ما تنلام ..
وهذه نوعية ينصح بالارتباط بها !!


الشقرديه :

وهي البنت اللهلوبه (على قول أخوانا المصريين) تعجبك في نشاطها وحيويتها <<في طلعات البر والبحر>> ووقفاتها وقت الأزمات وفي بعض المواقف تكون عن ألف تمساح ..
هذي بعد اللي تحصل له يرتبط بها ما راح يندم !!


طبعا فيه نوعيات أخرى لم يتسع المجال لذكرها .. ونخليها بعدين !!



دمتم بود