فديتكـ ياهوى نفسي مع الشدات خاويني
فديتكـ لا قسى وقتي علي وناحت أشجاني
أبيك في لحظة الفزعه تحط ايديك بيديني
وأبيك ليا شكيت الياس تكون بساحة أوطاني
أبيك البلسم لجرحي وأبيك النوم في عيني
وأبيك ليا مني صحيت ألقاه بأحضاني
طلبتك يابعد ذاتي أمااااانه لا تخليني
تراني لو رحلت أبقى ضحية كيد عدواني
سألتك بالله الوالي سألتك لا تجافيني
لأني اموت بغيابك ياروحي وجثماني
معي واصل مشاويرك أواسيك وتواسيني
معي إبقى مثل ظلي حذاري حذاري لا تعاديني
أبي منك الوعد إنك على غيري تبديني
وأنا هذا وعد مني ماأبيعك واشري الثاني
وإذا بلسانك الصادق نطقت وقلت تغليني
أنا بعلن خبر عاجل تعالو اقرو اعلاني
ابكتب داخل العنوان الى من صار يغليني
الى قلبي الى عمري الى من صار يهواني
إليك اهدي نغم شعري وكل عرق نبض فيني
وإليك اهدي شذى عطري ويأسميني وريحاني
وأيكتب داخل الاعلان وصيه كان شاريني
معي بالطيب عاملني ولا تجرح بهجراني
ومهما تقسى الدنيا علينا لاتعاديني
ولا تسعى أبد في يوم في عندي وعصياني
أبيك دكتور لآلامي من أحزاني تداويني
وأبي لاكفت ابصاري تكون النور لأعياني
وأإبي لافاضت أنفاسي تكون أول معزيني
وأبيك بيدينك الثنتين تلف الجسم بأكفاني
وبعد ماأكون في قبري تذكرني وتبكيني
وأكون حزن على بالك ماتغفل وتنساني
أبي لا قالو العذال وش اللي بينك وبيني ؟
تبسم وتدمع عيونك من الحسره وفقداني
وتجاوبهم إني حي وبالأضلاع تخفيني
وإني سلوة الخاطر معك لا صرت وحداني
أبيك تقول هو مامات أحاكيه ويحاكيني
أبيك تقول هو موجود وخبيته بوجداني
أبيك تقول هو دمي اللي في شرايني
لانك دمي اللي كان يضخه عرق شرياني
وأبي لازادت جراحك تخليني وتناديني
وتفتش داخل شعورك وتهمسلي وتلقاني
وإذا طال السفر إقرا كتابتي ودواويني
وقل ياكثر ماخلي كتب لي شعر واهداني
ترى لو للقصيد عيون والله ماتقديني
لأني للقصيد عيون وإسمك رمز ديواني
وترى لو للحروف أهداب تعجز ماتغطيني
لأني للحروف إحيا ووحيك سر لإذعاني
تداركت الزمن يمك الا ياليت يمديني
أخاف أجيك متأخر وسيف الوقت يأطاني
نسيت من أجلك الصادق اللي الروح يعطيني
ونسيت الاول والاخير والقاصي مع الداني
وجاري المسح للباقي وانت اللي تكفيني
حرام احط معك غيرك واحبك واظلم الثاني
كفايه انت في دنياي أمل باقي يسليني
أمل صوته إذا ضاع الامل ألقاه بأركاني
كفايه همسك الحاني إذا جاني يدفيني
ويبدد وحشة ظروفي وتشرق فرحة أكواني
تراك بعالمي شمعه تبدد ظلمة سنيني
وتراك بدنيتي دنيا لها لون وشكل ثاني
ودنيا " مابها حسكـ ماأبيها وعمرنا فاني :
آنــا سميتكـ الدنياا وآنته وش تسميني !! ؟